ಅಖಿಲೇಶ್​ ಯಾದವ್​ ಪ್ರತಿಸ್ಪರ್ಧಿ ಕೇಂದ್ರ ಸಚಿವ ಸತ್ಯಪಾಲ್​ ಸಿಂಗ್​ ಬೆಂಗಾವಲು ವಾಹನದ ಮೇಲೆ ಕಲ್ಲು, ಕೋಲುಗಳಿಂದ ದಾಳಿ; ಕರ್ಹಾಲ್​​ನಲ್ಲೇ ನಡೆದ ಘಟನೆ | Union Minister Satya Pal Singh Baghel convoy attacked in Karhal of Uttar Pradesh


ಅಖಿಲೇಶ್​ ಯಾದವ್​ ಪ್ರತಿಸ್ಪರ್ಧಿ ಕೇಂದ್ರ ಸಚಿವ ಸತ್ಯಪಾಲ್​ ಸಿಂಗ್​ ಬೆಂಗಾವಲು ವಾಹನದ ಮೇಲೆ ಕಲ್ಲು, ಕೋಲುಗಳಿಂದ ದಾಳಿ; ಕರ್ಹಾಲ್​​ನಲ್ಲೇ ನಡೆದ ಘಟನೆ

ಸತ್ಯಪಾಲ್​ ಸಿಂಗ್​ ಬಾಘೇಲ್​ ಕಾರಿನ ಮೇಲೆ ದಾಳಿ

ಲಖನೌ: ಕೇಂದ್ರ ಕಾನೂನು ಮತ್ತು ನ್ಯಾಯ ಸಚಿವಾಲಯ ಇಲಾಖೆ ಸಚಿವ ಸತ್ಯಪಾಲ್​ ಸಿಂಗ್​ ಬಾಘೇಲ್ (Satya Pal Singh Baghel)​ ಅವರ ಬೆಂಗಾವಲು ವಾಹನದ ಮೇಲೆ ಕಲ್ಲು ತೂರಾಟ ನಡೆದಿದೆ. ಉತ್ತರ ಪ್ರದೇಶದ ಮೇನ್​ಪುರಿ ಜಿಲ್ಲೆಯ ಕರ್ಹಾಲ್​(Karhal) ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಯಾಗಿರುವ ಸತ್ಯಪಾಲ್​ ಸಿಂಗ್​ ನಿನ್ನೆ ತಮ್ಮ ಕ್ಷೇತ್ರಕ್ಕೆ ಹೋದಾಗ ಅವರ ಬೆಂಗಾವಲು ವಾಹನಗಳ ಮೇಲೆ ಸಮಾಜವಾದಿ ಪಕ್ಷದ ಗೂಂಡಾಗಳು ಕಲ್ಲು ತೂರಾಟ, ದಾಳಿ ನಡೆಸಿದ್ದಾರೆ ಎಂದು ಉತ್ತರ ಪ್ರದೇಶ ಉಪಮುಖ್ಯಮಂತ್ರಿ ಕೇಶವ್​ ಪ್ರಸಾದ್ ಮೌರ್ಯ ಆರೋಪಿಸಿದ್ದಾರೆ. ಸತ್ಯಪಾಲ್​ ಸಿಂಗ್​ ಅವರಿಗೆ ಯಾವುದೇ ಗಾಯವಾಗಿಲ್ಲ. ಅಂದ ಹಾಗೇ, ಈ ಕರ್ಹಾಲ್​​ ವಿಧಾನಸಭಾ ಕ್ಷೇತ್ರದಿಂದ ಅಖಿಲೇಶ್ ಯಾದವ್​ ಸ್ಪರ್ಧಿಸುತ್ತಿದ್ದಾರೆ. ಅವರು ಇದೇ ಮೊದಲ ಬಾರಿಗೆ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುತ್ತಿದ್ದು, ಅಖಿಲೇಶ್​ ಯಾದವ್​ಗೆ ಸತ್ಯಪಾಲ ಸಿಂಗ್​ ಬಾಘೇಲ್​ ಪ್ರತಿಸ್ಪರ್ಧಿ.

ಕೇಂದ್ರ ಸಚಿವರ ಬೆಂಗಾವಲು ವಾಹನದ ಮೇಲೆ ಅಟ್ಟಿಕುಲ್ಲಾಪುರ ಗ್ರಾಮದ ಬಳಿ ಕಲ್ಲು ಮತ್ತು ಕೋಲುಗಳಿಂದ ದಾಳಿ ನಡೆದಿದ್ದನ್ನು ಮೇನ್​​ಪುರಿ ಪೊಲೀಸರು ದೃಢಪಡಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಘಟನೆಯನ್ನು ವಿವರಿಸಿದ ಬಾಘೇಲ್​, ನನ್ನ ಕಾರು ಅಟ್ಟಿಕುಲ್ಲಾಪುರ ಮಾರ್ಗವಾಗಿ ಕರ್ಹಾಲ್​ಗೆ ತೆರಳುತ್ತಿತ್ತು. ಅಟ್ಟಿಕುಲ್ಲಾಪುರದ ಬಳಿಕ ಹಲವು ಜನರು ಬಡಿಗೆ ಮತ್ತು ಕಬ್ಬಿಣದ ರಾಡ್​​ಗಳನ್ನು ಹಿಡಿದು ಏಕಾಏಕಿ ಬಂದು ಬೆಂಗಾವಲು ವಾಹನಗಳ ಮೇಲೆ ದಾಳಿ ನಡೆಸಿದರು. ಅವರು ಅಖಿಲೇಶ್​ಬಯ್ಯಾ ಜಿಂದಾಬಾದ್​ ಎಂದು ಘೋಷಣೆ ಕೂಗುತ್ತಿದ್ದರು ಎಂದು ಹೇಳಿದ್ದಾರೆ. ಅದರಲ್ಲಿ ಒಬ್ಬಾತ ತನ್ನನ್ನು ತಾನು ಉಮಾ ಕಾಂತ್​ ಯಾದವ್​ ಎಂದು ಹೇಳಿಕೊಂಡಿದ್ದಾನೆ. ಅಷ್ಟೇ ಅಲ್ಲ, ಸಚಿವರನ್ನು ಇಂದು ಬಿಡುವುದಿಲ್ಲ ಎಂದು ಕೂಗಿದ್ದಾಗಿ ಕೂಡ ಸತ್ಯಪಾಲ ಸಿಂಗ್​ ತಿಳಿಸಿದ್ದಾರೆ.

ವೀರಾವೇಶದಿಂದ ಕೂಗುತ್ತ ಬಂದರು. ಅಷ್ಟರಲ್ಲಿ ನನ್ನ ಬೆಂಗಾವಲು ವಾಹನದಲ್ಲಿದ್ದ ಭದ್ರತಾ ಸಿಬ್ಬಂದಿ ಕೆಳಗೆ ಇಳಿಯುತ್ತಿದ್ದಂತೆ ಅವರೆಲ್ಲರೂ ಓಡಿ ಹೋದರು. ಬೆಂಗಾವಲಿಗೆ ಇದ್ದ ಒಂದು ಕಾರಿನ ಮೇಲೆ ಗುಂಡಿನ ದಾಳಿ ಕೂಡ ನಡೆಸಲಾಗಿದೆ ಎಂದೂ ಸಚಿವರು ಆರೋಪಿಸಿದ್ದಾರೆ. ಇನ್ನೊಂದೆಡೆ ಕೇಶವ್​ ಪ್ರಸಾದ್ ಮೌರ್ಯ ಕೂಡ ದಾಳಿ ಕೋರರ ವಿರುದ್ಧ ಕಿಡಿ ಕಾರಿದ್ದಾರೆ. ಖಂಡಿತ ಈ ಬಾರಿ ಅಖಿಲೇಶ್ ಯಾದವ್ ಸೋಲುತ್ತಾರೆ. ಬಿಜೆಪಿ ಸಂಸದೆ ಗೀತಾ ಶಕ್ಯಾ ಅವರ ಮೇಲೆ ಕೂಡ ಫೆ.14ರಂದು ದಾಳಿ ನಡೆದಿತ್ತು. ಆರೋಪಿಗಳನ್ನು ಸುಮ್ಮನೆ ಬಿಡುವುದಿಲ್ಲ ಎಂದು ಹೇಳಿದ್ದಾರೆ.

TV9 Kannada


Leave a Reply

Your email address will not be published. Required fields are marked *