ಟೀಂ ಇಂಡಿಯಾ ಕೋಚ್​ ರಾಹುಲ್ ದ್ರಾವಿಡ್​ ಅವರನ್ನು ನಾನು ಚಿಕ್ಕಂದಿನಿಂದಲೂ ನೋಡಿದ್ದೇನೆ. ಇದು ನನ್ನ ಅದೃಷ್ಟ ಎಂದು ಭಾರತದ ಕ್ರಿಕೆಟಿಗ ಕೆಎಲ್​ ರಾಹುಲ್ ತಿಳಿಸಿದ್ದಾರೆ.​

ಮಾಧ್ಯಮಗೋಷ್ಟಿಯೊಂದರಲ್ಲಿ ಮಾತನಾಡಿರುವ ಕೆಎಲ್​ ರಾಹುಲ್​, ನಾನು ಚಿಕ್ಕವನಿದ್ದಾಗ ದ್ರಾವಿಡ್​ ಅವರ ಆಟವನ್ನು ನೋಡಿ, ಅವರಂತೆಯೇ ಅಭ್ಯಾಸ ಮಾಡ್ತಿದ್ದೆ. ದ್ರಾವಿಡ್​ ಕೂಡ ಕರ್ನಾಟಕದಲ್ಲಿ ನಮಗೆ ಸಾಕಷ್ಟು ಬಾರಿ ಪಂದ್ಯಗಳಲ್ಲಿ ಆಡುವಾಗ ಸಲಹೆ, ಸೂಚನೆ ಕೊಟ್ಟಿದ್ದಾರೆ. ಈಗ ಟೀಂ ಇಂಡಿಯಾಗೆ ಕೋಚ್​ ಆಗಿರುವ ದ್ರಾವಿಡ್​ರಿಂದ ನಾವೆಲ್ಲಾ ಹೆಚ್ಚಿನದ್ದನ್ನು ಕಲಿಯುವ ಅವಕಾಶ ಕೂಡ ಇದೆ ಎಂದು ಆತ್ಮವಿಶ್ವಾಸದ ಬಗ್ಗೆ  ಮಾತಾಡಿದ್ದಾರೆ.

ಇಂಗ್ಲೆಂಡ್​ ಟೆಸ್ಟ್​ ಸರಣಿ ಮತ್ತು ಐಸಿಸಿ ಟಿ20 ವಿಶ್ವಕಪ್​​ನಲ್ಲಿ ಸತತ ಸೋಲಿನಿಂದ ಕಂಗೆಟ್ಟಿರುವ ಟೀಂ ಇಂಡಿಯಾ, ಮುಂಬರುವ ನ್ಯೂಜಿಲೆಂಡ್​ ವಿರುದ್ಧದ ಸರಣಿಗಾಗಿ ಕಠಿಣ ಅಭ್ಯಾಸದಲ್ಲಿ ತೊಡಗಿದೆ. ನಾಳೆ ಜೈಪುರದಲ್ಲಿ ಮೊದಲ ಟಿ20 ಪಂದ್ಯ ನಡೆಯಲಿದ್ದು, ಜೈಪುರ ಕ್ರೀಡಾಂಗಣದಲ್ಲಿ ಮಿಂಚಲು ಬ್ಲೂ ಬಾಯ್ಸ್​ ರೆಡಿಯಾಗ್ತಿದ್ದಾರೆ. ಇನ್ನೂ ರಾಹುಲ್​ ದ್ರಾವಿಡ್​ ಟೀಂ​ ಇಂಡಿಯಾಗೆ ಕೋಚ್​ ಆದ ಬಳಿಕ ಇದು ಮೊದಲ ಸರಣಿಯಾಗಿದ್ದು, ಈ ಪಂದ್ಯವನ್ನು ಆಟಗಾರರು ಹಾಗೂ ದ್ರಾವಿಡ್​ ಸಹ ಪ್ರತಿಷ್ಠೆಯಾಗಿ ತೆಗೆದುಕೊಂಡಿದ್ದಾರೆ.