ಬಳ್ಳಾರಿ: ಬಿಸಿಲ ನಾಡು ಬಳ್ಳಾರಿಯಲ್ಲಿ ಮಹಾನಗರ ಪಾಲಿಕೆ ಚುನಾವಣೆ ನಡೆದು 6 ತಿಂಗಳಾಗಿತ್ತು. ಆದ್ರೆ ಮೇಯರ್​ ನೇಮಕವಾಗದೇ ಪಾಲಿಕೆ ಎಲ್ಲಾ ಕೆಲಸಗಳು ಸ್ಥಗಿತವಾಗಿದ್ವು. ಈ ಬಗ್ಗೆ ನ್ಯೂಸ್​ಫಸ್ಟ್​ ಸರಣಿ ವರದಿ ಕೂಡ ಮಾಡಿತ್ತು. ಈ ವರದಿಯ ಬಳಿಕ ಎಚ್ಚೆತ್ತಿರುವ ಬಳ್ಳಾರಿ ಜಿಲ್ಲಾಡಳಿತ ಇದೇ ತಿಂಗಳು 18ರಂದು ಮೇಯರ್​ ಚುನಾವಣೆ ನಡೆಸಲು ಭರದ ಸಿದ್ಧತೆ ಮಾಡಿಕೊಳ್ತಿದೆ.

ಬಿಸಿಲ ನಾಡಲ್ಲಿ ಕಾವೇರಿದ ‘ಮೇಯರ್​’ ಚುನಾವಣೆ​​

ಗಣಿಧಣಿಗಳ ನಾಡು ಬಳ್ಳಾರಿಯಲ್ಲಿ ಮಿನಿ ರಾಜಕೀಯ ಕಸರತ್ತು ಜೋರಾಗಿದೆ. ಕಳೆದ ಏಪ್ರಿಲ್​ ತಿಂಗಳಲ್ಲಿ ಮಹಾನಗರ ಪಾಲಿಕೆಯ ಚುಕ್ಕಾಣಿಗಾಗಿ ಕೈ – ಕಮಲ ಪಡೆ ಭಾರೀ ಸಾಹಸ ಮಾಡಿದ್ವು. ಆದ್ರೆ ಕೊರೊನಾ ಸಮಯದಲ್ಲಿ ಈ ಚುನಾವಣೆ ನಡೆದಿದ್ದ ಕಾರಣ, ಬಿಜೆಪಿ ಇದನ್ನೆ ನೆಪವಾಗಿಟ್ಟುಕೊಂಡು ಮೇಯರ್​, ಉಪಮೇಯರ್​ ನೇಮಕವನ್ನು 6 ತಿಂಗಳು ಮುಂದೂಡಿತ್ತು. ಇದರ ಬಗ್ಗೆ ನ್ಯೂಸ್​ಫಸ್ಟ್​ ಸರಣಿ ವರದಿ ಮಾಡುವ ಮೂಲಕ ಜಿಲ್ಲಾಡಳಿತ ಗಮನ ಸೆಳೆದಿತ್ತು. ನ್ಯೂಸ್​ಫಸ್ಟ್​ ವರದಿ ಬಳಿಕೆ ಗಮನಕ್ಕೆ ತೆಗದುಕೊಂಡಿರುವ ಜಿಲ್ಲಾಡಳಿತ ಕೊನೆಗೂ ಮೇಯರ್​ ನೇಮಕ ಮಾಡಲು ಮುಂದಾಗಿದ್ದು, ಇದೇ ತಿಂಗಳು 18 ರಂದು ಚುನಾವಣೆ ನಡೆಸುವುದಾಗಿ ಘೋಷಣೆ ಮಾಡಿದೆ. ಇದರಿಂದಾಗಿ ಕೈ – ಕಮಲ ಪಾಳಯದಲ್ಲಿ ಮೇಯರ್​ ಚುನಾವಣಾ ಕಸರತ್ತು ಶುರುವಾಗಿದೆ.

ಗಣಿನಾಡಲ್ಲಿ ‘ಕೈ’ ಹಿಡಿದಿದ್ದ ಮತದಾರ

6 ತಿಂಗಳ ಹಿಂದೆ ಬಳ್ಳಾರಿಯಲ್ಲಿ ನಡೆದಿದ್ದ ಪಾಲಿಕೆ ಚುನಾವಣೆಯಲ್ಲಿ 39 ವಾರ್ಡ್​ಗಳ ಪೈಕಿ 21 ಸ್ಥಾನ ಕೈ ವಶವಾಗಿದ್ರೆ, 13 ವಾರ್ಡ್​ಗಳಲ್ಲಿ ಮಾತ್ರ ಬಿಜೆಪಿ ಗೆಲುವು ಸಾಧಿಸಿತ್ತು. ಇನ್ನೂ ಕಾಂಗ್ರೆಸ್​ನಿಂದ 5 ಮಂದಿ ಬಂಡಾವೆದ್ದು ಪಕ್ಷೇತರರಾಗಿ ಕಣಕ್ಕಿಳಿದಿದ್ರು. ಚುನಾವಣಾ ಕಣದಲ್ಲಿ ಆ ಐದು ಜನ ಪಕ್ಷೇತರರು ಜಯಭೇರಿ ಗಳಿಸಿದ್ರು. ಬಳಿಕ ಪಕ್ಷೇತರ 5 ಅಭ್ಯರ್ಥಿಗಳ ಪೈಕಿ ಈಗಾಗಲೇ ನಾಲ್ಕು ಜನ ಮತ್ತೆ ಕಾಂಗ್ರೆಸ್ ಸೇರಿದ್ದಾರೆ. ಹೀಗಾಗಿ ಕಾಂಗ್ರೆಸ್ ಸಂಖ್ಯಾಬಲ 25ಕ್ಕೆ ಏರಿಕೆಯಾಗಿದೆ. ಈ ಚುನಾವಣೆ ಬಿಜೆಪಿಗೂ ಪ್ರತಿಷ್ಠೆಯ ಕಣವಾಗಿದ್ದು, ಶಾಸಕ ಸೋಮಶೇಖರ ರೆಡ್ಡಿ, ಸಚಿವ ಶ್ರೀರಾಮುಲು ಪ್ರಚಾರ ನಡೆಸಿದರು ಕೊನೆಗಳಿಗೆಯಲ್ಲಿ ಮತದಾರ ಪ್ರಭು ಮಾತ್ರ ‘ಕೈ’ ಹಿಡಿದಿದ್ರು.

ಇದೀಗ ಮೇಯರ್​ ಹಾಗೂ ಉಪ ಮೇಯರ್​ ಸ್ಥಾನಕ್ಕೆ ಮೀಸಲಾತಿ ಪ್ರಕಟವಾಗಿದೆ. ಎರಡು ಸ್ಥಾನಕ್ಕೂ ಓಬಿಸಿ ಮಹಿಳಾ ಮೀಸಲಾತಿ ಘೋಷಣೆಯಾಗಿದ್ದು, ಈಗ ಮೇಯರ್​ ಪಟ್ಟಕ್ಕೇರಲು ಕೈ ಪಾಳಯದಲ್ಲಿ ತೆರೆಮರೆಯ ಲಾಬಿ ಕಸರತ್ತು ಜೋರಾಗಿದೆ. ಇನ್ನೂ 6 ತಿಂಗಳ ಬಳಿಕ ಪಾಲಿಕೆಯ ಮೇಯರ್ – ಉಪಮೇಯರ್ ನೇಮಕಕ್ಕೆ ಆದೇಶ ಬರುತ್ತಿದ್ದಂತೆ ಸಾಕಷ್ಟು ರಾಜಕೀಯ ಕಣದಲ್ಲಿ ಕಾವೇರಿದ್ದು, ಎರಡು ಸ್ಥಾನಗಳಿಗೂ ಕಾಂಗ್ರೆಸ್ ಪಕ್ಷವೇ ಆಯ್ಕೆಯಾಗೋದು ಪಕ್ಕಾ ಎನ್ನಲಾಗಿದೆ.

ವಿಶೇಷ ವರದಿ: ಶಿವಾನಂದ‌ ಮದಿಹಳ್ಳಿ, ನ್ಯೂಸ್​​ಫಸ್ಟ್, ಬಳ್ಳಾರಿ