ಒಂದೆಡೆ ರಿಟೆನ್ಶನ್​, ಮೆಗಾ ಆಕ್ಷನ್​ ಲೆಕ್ಕಾಚಾರ ನಡೀತಾ ಇದ್ರೆ, ಇನ್ನೊಂದೆಡೆ ಟೂರ್ನಿ ಆಯೋಜನೆಗೆ ಮುಂದಾಗಿರೋ ಬಿಸಿಸಿಐ ಹೊಸ ಗೊಂದಲಕ್ಕೆ ಸಿಲುಕಿದೆ. ಈ ಗೊಂದಲ ಕೆಲವೇ ದಿನಗಳಲ್ಲಿ ಬಗೆ ಹರಿಯದೇ ಇದ್ರೆ, ಮುಂದಿನ ಆವೃತ್ತಿಯ ಐಪಿಎಲ್​ನ ಸ್ವರೂಪವೇ ಬದಲಾಗಲಿದೆ. ಅಷ್ಟಕ್ಕೂ ಏನದು ಗೊಂದಲ.? ಇಲ್ಲಿದೆ ಡಿಟೇಲ್ಸ್.

ದಿನ ಕಳೆದಂತೆ ಇಂಡಿಯನ್​ ಪ್ರೀಮಿಯರ್​ ಲೀಗ್​ನ ಲೆಕ್ಕಾಚಾರಗಳು, ಜೋರಾಗಿವೆ. ಯಾವ ತಂಡ ಯಾವೆಲ್ಲಾ ಆಟಗಾರರನ್ನ ರಿಟೈನ್​ ಮಾಡಿಕೊಳ್ಳುತ್ತೆ..? ಮೆಗಾ ಆಕ್ಷನ್​ ಅಖಾಡದಲ್ಲಿ ಯಾರೆಲ್ಲಾ ಇರಲಿದ್ದಾರೆ ಎಂಬ ಚರ್ಚೆ ಜೋರಾಗಿದೆ. ಇದರ ಜೊತೆಗೆ ಯಾವೆಲ್ಲಾ ಆಟಗಾರರು ಹೊಸ ತಂಡಗಳ ಪಾಲಾಗ್ತಾರೆ ಅನ್ನೋದು, ಹಾಟ್​​ ಟಾಪಿಕ್​ ಆಗಿಯೂ ಮಾರ್ಪಟ್ಟಿದೆ. ಆದ್ರೆ ಈ ಹೊಸ ತಂಡದ ವಿಚಾರವಾಗಿಯೇ ಬಿಸಿಸಿಐ, ಇದೀಗ ಗೊಂದಲಕ್ಕೆ ಸಿಲುಕಿದೆ.

14ನೇ ಆವೃತ್ತಿ ಐಪಿಎಲ್​ ಮುಗಿದ ಬೆನ್ನಲ್ಲೇ, ಬಿಡ್ಡಿಂಗ್​ ನಡೆಸಿದ್ದ ಬಿಸಿಸಿಐ ಮುಂದಿನ ಆವೃತ್ತಿಗೆ 2 ಹೊಸ ತಂಡಗಳ ಸೇರ್ಪಡೆಯನ್ನ ಖಚಿತಗೊಳಿಸಿತ್ತು. ಲಖನೌ ಹಾಗೂ ಅಹಮದಾಬಾದ್​ ತಂಡಗಳು ಮುಂದಿನ ಆವೃತ್ತಿಯಲ್ಲಿರಲಿದ್ದು, 10 ತಂಡಗಳು ಭಾಗವಹಿಸಲಿವೆ ಎಂದು ಮಾಹಿತಿ ನೀಡಿತ್ತು. ಆದ್ರೆ, ಬರೋಬ್ಬರಿ 5,625 ಕೋಟಿ ರೂಪಾಯಿ ಕೊಟ್ಟು ಅಹಮದಾಬಾದ್​ ಫ್ರಾಂಚೈಸಿ ಖರೀದಿಸಿದ ಸಿವಿಸಿ ಕ್ಯಾಪಿಟಲ್ಸ್​​ ಬಗ್ಗೆ, ಅಂದಿನಿಂದ ಇಂದಿನವರೆಗೆ ಸದ್ದಿಯೇ ಇಲ್ಲ. ಇದೇ ಹೊಸ ಗೊಂದಲ ಹುಟ್ಟಿಸಿದೆ.

ಬಿಸಿಸಿಐಗೇ ಗೊಂದಲ..!
ತಂಡವನ್ನ ಬಿಡ್ಡಿಂಗ್​ನಲ್ಲಿ ಖರೀದಿಸಿದ ದಿನದಿಂದ ಈವರೆಗೆ, ಫ್ರಾಂಚೈಸಿ ಬಗ್ಗೆ ಮಾಹಿತಿಯೇ ಸಿಕ್ಕಿಲ್ಲ ಅನ್ನೋದು ಬಿಸಿಸಿಐನಲ್ಲಿ ಗೊಂದಲ ಹುಟ್ಟುಹಾಕಿದೆ. ಮೆಗಾ ಆಕ್ಷನ್​, ಆಟಗಾರರ ರಿಟೈನೇಶನ್​ ಬಗ್ಗೆ ಅಷ್ಟೆಲ್ಲಾ ಚರ್ಚೆಗಳು ನಡೀತಿದ್ರೂ ನೂತನ ಫ್ರಾಂಚೈಸಿ ಮಾತ್ರ ಮೌನಕ್ಕೆ ಜಾರಿದೆ. ಇದೇ ಈಗ ಮುಂದಿನ ಆವೃತ್ತಿಯಲ್ಲಿ ಕಣಕ್ಕಿಳಿಯೋದು, ಕೇವಲ 9 ತಂಡಗಳಾ? ಎಂಬ ಪ್ರಶ್ನೆ ಹುಟ್ಟುಹಾಕಿದೆ. ಅದರ ಜೊತೆಗೆ ಇದೇ ಫ್ರಾಂಚೈಸಿಯನ್ನ 5,100 ಕೋಟಿಗೆ ಬಿಡ್​ ಮಾಡಿದ್ದ ಅದಾನಿ ಗ್ರೂಪ್ಸ್​ಗೆ ಮಾಲಿಕತ್ವವನ್ನ ಹಸ್ತಾಂತರಿಸಲಾಗುತ್ತಾ ಎಂಬ ಚರ್ಚೆಯೂ ಎದ್ದಿದೆ.

ಸಿವಿಸಿ ಕ್ಯಾಪಿಟಲ್ಸ್​​ ಮೇಲಿದೆ ದೊಡ್ಡ ಆರೋಪ
ಸಿವಿಸಿ ಕ್ಯಾಪಿಟಲ್ಸ್​ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಅನ್ನೋದು ಒಂದೆಡೆಯಾದ್ರೆ, ಇನ್ನೊಂದೆಡೆ ಕಂಪನಿಯ ಮೇಲಿರೋ ಆರೋಪ ಬಿಸಿಸಿಐ ತಲೆನೋವನ್ನ ಇನ್ನಷ್ಟು ಹೆಚ್ಚಿಸಿದೆ. ತಂಡದ ಬಿಡ್ಡಿಂಗ್​ ಮಾಹಿತಿ ಹೊರ ಬಿದ್ದ ಬೆನ್ನಲ್ಲೇ ಟ್ವೀಟ್​ ಮಾಡಿದ್ದ ಲಲಿತ್​ ಮೋದಿ ಬೆಟ್ಟಿಂಗ್​ ಕಂಪನಿಗಳು ಐಪಿಎಲ್​ ಒಡೆತನವನ್ನ ಹೊಂದಬಹುದಾ ಎಂದು ಪ್ರಶ್ನಿಸಿದ್ರು. ಸಿವಿಸಿ ಕ್ಯಾಪಿಟಲ್ಸ್​ ವಿಶ್ವದ ವಿವಿಧ ಬೆಟ್ಟಿಂಗ್​ ಕಂಪನಿಗಳಲ್ಲಿ ಹೂಡಿಕೆ ಮಾಡಿರೋದು ಇದಕ್ಕೆ ಕಾರಣವಾಗಿತ್ತು. ಈ ಆರೋಪದ ಬಗ್ಗೆಯೂ ಸ್ಪಷ್ಟ ಮಾಹಿತಿ ಬಿಸಿಸಿಐಗೆ ಇನ್ನೂ ಸಿಕ್ಕಿಲ್ಲ.

ಗೊಂದಲ ನಿವಾರಣೆಗೆ ಸಮಿತಿ ರಚನೆ ಮುಂದಾದ ಬಿಸಿಸಿಐ
ಇದೀಗ ಈ ಎಲ್ಲಾ ಗೊಂದಲಗಳನ್ನ ಬಗೆ ಹರಿಸಿಕೊಳ್ಳಲು ಬಿಸಿಸಿಐ ಹಾಗೂ ಐಪಿಎಲ್​ ಆಡಳಿತ ಮಂಡಳಿ ನಿರ್ಧರಿಸಿವೆ. ಹೀಗಾಗಿಯೇ ಮುಂಬರುವ ಎಜಿಎಮ್​ ಸಭೆಗೂ ಮುನ್ನ ಈ ಕರಿತ ತನಿಖೆಗೆ ಹೊಸ ಪ್ಯಾನಲ್​ ರಚಿಸಲು ಮುಂದಾಗಿದೆ. ಈ ಪ್ಯಾನಲ್​ನ ವರದಿ ಬಳಿಕ ಮುಂದಿನ ನಿರ್ಧಾರ ಕೈಗೊಳ್ಳೋದು ಬಿಸಿಸಿಐನ ಯೋಜನೆಯಾಗಿದೆ.