ಕಿವೀಸ್​ ವಿರುದ್ಧದ ಟೆಸ್ಟ್​ ಸರಣಿಗೆ ತಂಡವನ್ನ ಪ್ರಕಟಿಸಲು ಸೆಲೆಕ್ಷನ್ ಕಮಿಟಿ ಸಿದ್ಧತೆ ನಡೆಸ್ತಿದೆ. ಈ ವೇಳೆ ಓರ್ವ ಯಂಗ್ ವಿಕೆಟ್​ ಕೀಪರ್​ಗೆ ಮಣೆಹಾಕಲು, ಸೆಲೆಕ್ಟರ್ಸ್ ಮುಂದಾಗಿದ್ದಾರೆ. ಇದು ಅನುಭವಿ ವಿಕೆಟ್​ ಕೀಪರ್ ವೃದ್ಧಿಮಾನ್ ಸಾಹ ಆತಂಕಕ್ಕೆ, ಕಾರಣವಾಗಿದೆ.

ನ್ಯೂಜಿಲೆಂಡ್ ವಿರುದ್ಧದ 2 ಪಂದ್ಯಗಳ ಟೆಸ್ಟ್​ ಸರಣಿ, ಇದೇ 25ರಿಂದ ಆರಂಭಗೊಳ್ಳಲಿದೆ. ಇದಕ್ಕಾಗೆ ಟೆಸ್ಟ್ ತಂಡವನ್ನ ಪ್ರಕಟಿಸಲು ಸೆಲೆಕ್ಷನ್ ಕಮಿಟಿ ಸನ್ನದ್ಧವಾಗಿದೆ. ಟಿ20 ಮಾದರಿಯಂತೆ ಟೆಸ್ಟ್​ ತಂಡದಲ್ಲೂ ಕೆಲ ಬದಲಾವಣೆಗಳಾಗುವ ಸಾಧ್ಯತೆ ಇದೆ. ಹೌದು..! ಸದ್ಯ ಟಿ20 ತಂಡದಲ್ಲಿ ಬದಲಾವಣೆ ತಂದಿರುವ ಸೆಲೆಕ್ಷನ್ ಕಮಿಟಿ, ಈಗ ಟೆಸ್ಟ್​ ತಂಡದಲ್ಲೂ ಅಂಥದ್ದೇ ನಡೆ ಅನುಸರಿಸಲು ಮುಂದಾಗಿದೆ. ಹೀಗಾಗಿಯೇ ಕೆಲ ಹಿರಿಯ ಆಟಗಾರರ ಸ್ಥಾನವನ್ನ, ಅಂತತ್ರಕ್ಕೆ ಸಿಲುಕಿಸುತ್ತಿದೆ.

ವೃದ್ದಿಮಾನ್ ಸಾಹ, ಟೀಮ್ ಇಂಡಿಯಾದ ಶ್ರೇಷ್ಠ ವಿಕೆಟ್ ಕೀಪರ್ ಅನ್ನೋದ್ರಲ್ಲಿ ಎರಡು ಮಾತಿಲ್ಲ.. ವಿಕೆಟ್​ ಹಿಂದೆ ಕೈಚಳಕ ತೋರುವ ಸಾಹ, ಅವಕಾಶ ಸಿಕ್ಕಾಗ ವಿಕೆಟ್​ ಮುಂದೆ ಹೇಳಿಕೊಳ್ಳುವ ಪ್ರದರ್ಶನ ನೀಡಿಲ್ಲ. ಇದಕ್ಕಿಂತ ಹೆಚ್ಚಾಗಿ ವೃದ್ದಿಮಾನ್ ವಯಸ್ಸು, ತಂಡದಲ್ಲಿ ಮುಂದುವರಿಯಲು ಅಡ್ಡಗಾಲಾಗ್ತಿದೆ. ಹೀಗಾಗಿ ವೃದ್ದಿಮಾನ್ ಸಾಹ ಜಾಗದಲ್ಲಿ, ಯಂಗ್ ವಿಕೆಟ್ ಕೀಪರ್​ಗೆ ಅವಕಾಶ ನೀಡಲು, ಬಿಸಿಸಿಐ ಮತ್ತು ಟೀಮ್ ಮ್ಯಾನೇಜ್​ಮೆಂಟ್ ಮುಂದಾಗಿದೆ.

ಸಾಹ ಬದಲಿಗೆ ಯಂಗ್ ವಿಕೆಟ್​ ಕೀಪರ್​ ಭರತ್​​ಗೆ ಸ್ಥಾನ..?
ದೇಶಿ ಕ್ರಿಕೆಟ್​​ನಲ್ಲಿ ತನ್ನ ಪ್ರತಿಭೆ ಅನಾವರಣಗೊಳಿಸಿರುವ ಭರತ್, ಈಗ ಮತ್ತೊಮ್ಮೆ ರಾಷ್ಟ್ರೀಯ ತಂಡದ ಕದ ತಟ್ಟುತ್ತಿದ್ದಾರೆ. 2019ರ ಕೊಲ್ಕತ್ತಾ ಪಿಂಕ್​ ಬಾಲ್ ಟೆಸ್ಟ್​ ವೇಳೆ​ ತಂಡಕ್ಕೆ ಆಯ್ಕೆಯಾಗಿದ್ದ ಭರತ್​, ಹಿಂದೆ ರಿಸರ್ವ್ ವಿಕೆಟ್ ಕೀಪರ್​ ಆಗಿ ಆಸ್ಟ್ರೇಲಿಯಾ, ಇಂಗ್ಲೆಂಡ್ ಪ್ರವಾಸ ಸೇರಿದಂತೆ, ಕೆಲ ಸರಣಿಗಳಲ್ಲಿ ಕಾರ್ಯ ನಿರ್ವಹಿಸಿದ್ದಾರೆ. ಈಗ ನ್ಯೂಜಿಲೆಂಡ್ ವಿರುದ್ಧದ ಟೆಸ್ಟ್​ ಸರಣಿಗೆ ಆಯ್ಕೆ ಆಗೋದು ಬಹುತೇಕ ಖಚಿತವಾಗಿದೆ. ಐಪಿಎಲ್​ನಲ್ಲಿ ಅಮೋಘ ಪ್ರದರ್ಶನ ನೀಡಿರುವ ಕೆ.ಎಸ್.​ಭರತ್​​, ಬ್ಯಾಟಿಂಗ್​ ಜೊತೆಗೆ ಉತ್ತಮ ವಿಕೆಟ್ ಕೀಪಿಂಗ್ ಸ್ಕಿಲ್ಸ್​ ಹೊಂದಿದ್ದಾರೆ. ಟೆಸ್ಟ್​ ಕ್ರಿಕೆಟ್​ಗೆ ಬೇಕಿರುವ ಕ್ವಾಲಿಟಿಸ್​ ಈತನಲ್ಲಿವೆ.

ಪ್ರಥಮ ದರ್ಜೆ ಕ್ರಿಕೆಟ್

• ಪಂದ್ಯ 78
• ರನ್ 4283
• ಸರಾಸರಿ 37.24
• ಶತಕ 09

ಇದುವರೆಗೆ 78 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿರುವ ಕೆ.ಎಸ್​.ಭರತ್, 4283 ರನ್ ಕಲೆಹಾಕಿದ್ದಾರೆ. 37.24ರ ಸರಾಸರಿಯಲ್ಲಿ ರನ್ ಕೆಲೆಹಾಕಿರುವ ಭರತ್, 23 ಅರ್ಧಶತಕ ಹಾಗೂ 9 ಶತಕ ಸಿಡಿಸಿದ್ದಾರೆ.
ಇಂಟ್ರೆಸ್ಟಿಂಗ್ ವಿಚಾರ ಅಂದ್ರೆ, ಪ್ರಥಮ ದರ್ಜೆ ಕ್ರಿಕೆಟ್​​ನ 2015ರ ಜನವರಿ ಮತ್ತು 2018ರ ಸೆಪ್ಟೆಂಬರ್ ಅವಧಿಯಲ್ಲಿ, ಅತಿ ಹೆಚ್ಚು ಬ್ಯಾಟ್ಸ್​ಮನ್​ಗಳನ್ನ ಬಲಿ ಪಡೆದ ಇಂಡಿಯನ್ ವಿಕೆಟ್ ಕೀಪರ್ ಆಗಿದ್ದಾರೆ. ಈ ವಿಚಾರದಲ್ಲಿ ರಿಷಭ್ ಪಂತ್, ಇಶಾನ್ ಕಿಶನ್, ಸಂಜು ಸ್ಯಾಮ್ಸನ್​ರನ್ನೇ, ಭರತ್ ಹಿಂದಿಕ್ಕಿದ್ದಾರೆ. ಈ ಅವಧಿಯಲ್ಲಿ 40 ಪಂದ್ಯಗಳಿಂದ 141 ಕ್ಯಾಚ್​, 14 ಸ್ಟಂಪ್ ಮಾಡಿದ ಖ್ಯಾತಿ, ಕೆ.ಎಸ್.ಭರತ್​ಗೆ ಸೇರುತ್ತೆ. ಆದ್ರೀಗ ಬ್ಯಾಕ್​ ಅಪ್​ ವಿಕೆಟ್​ ಕೀಪರ್​ ಸ್ಥಾನ ಪಡೆಯಲು ತುದಿಗಾಲಿನಲ್ಲಿ ನಿಂತಿರುವ ಭರತ್​, ಮುದೊಂದು ದಿನ ಟೀಮ್ ಇಂಡಿಯಾ ಟೆಸ್ಟ್ ತಂಡದ ಖಾಯಂ ವಿಕೆಟ್​​​ ಕೀಪರ್​ ಆದ್ರೂ, ಅಚ್ಚರಿ ಇಲ್ಲ.