ಐಪಿಎಲ್ ಮೆಗಾ ಆಕ್ಷನ್​ಗೆ 2 ತಿಂಗಳು ಬಾಕಿಯಿದೆ. ಆದ್ರೆ ಈ ಮೆಗಾ ಆಕ್ಷನ್​ಗೂ​​ ಮುನ್ನ ಐಪಿಎಲ್ ಫ್ರಾಂಚೈಸಿಗಳು ಮಾತ್ರ, ಭಾರೀ ಲೆಕ್ಕಚಾರಲ್ಲಿ ತೊಡಗಿವೆ. ಆದ್ರೆ ಎರಡು ತಂಡಗಳು ಕೆ.ಎಲ್.ರಾಹುಲ್, ಶ್ರೇಯಸ್​ ಅಯ್ಯರ್, ಹಾರ್ದಿಕ್ ಆ್ಯಂಡ್ ವಾರ್ನರ್​ರನ್ನ ಟಾರ್ಗೆಟ್ ಮಾಡ್ತಿವೆ. ಅದ್ಯಾಕೆ ತಂಡಗಳು ಇವರ ಹಿಂದೆ ಬಿದ್ದಿವೆ ಅಂತೀರಾ..? ಇಲ್ಲಿದೆ ಡೀಟೆಲ್ಸ್.

15ನೇ ಆವೃತ್ತಿಯ ಐಪಿಎಲ್​​ ಮೆಗಾ ಹರಾಜಿಗೆ 2 ತಿಂಗಳಷ್ಟೇ ಬಾಕಿಯಿದೆ. ಈ ನಡುವೆ ಯಾರನ್ನ ಕೈಬಿಡಬೇಕು..? ಯಾರನ್ನ ಸೆಳೆದು ತಂಡದ ಬ್ರಾಂಡ್​ನ ವ್ಯಾಲ್ಯೂ ಹೆಚ್ಚಿಸಿಕೊಳ್ಳಬೇಕು? ಯಾರು ಸೇರ್ಪಡೆಯಾದ್ರೆ ಬಲಿಷ್ಠ ತಂಡ ಕಟ್ಟಬಹುದು..? ಯಾವ ಸ್ಲಾಟ್​ಗೆ ಯಾರು ಬೆಸ್ಟ್​..? ಹೀಗೆ ಹೆಜ್ಜೆ ಹೆಜ್ಜೆಗೂ ಫ್ರಾಂಚೈಸಿಗಳು, ಲೆಕ್ಕಚಾರ ಹಾಕ್ತಿವೆ. ಹಳೆಯ ಫ್ರಾಂಚೈಸಿಗಳಂತೂ ರಿಟೈನ್​ ವಿಚಾರದಲ್ಲಿ ಎಚ್ಚರಿಕೆಯ ನಡೆ ಅನುಸರಿಸುತ್ತಿವೆ. ಇತ್ತೀಚಿಗೆ ಐಪಿಎಲ್​​ಗೆ ಎಂಟ್ರಿ ಕೊಟ್ಟಿರುವ ಲಕ್ನೋ ಮತ್ತು ಅಹ್ಮದಾಬಾದ್​​ ಫ್ರಾಂಚೈಸಿಗಳಂತೂ, ಹೆಚ್ಚು ಅಭಿಮಾನಿಗಳನ್ನ ಹೊಂದಿರೋ​​​​ ಆಟಗಾರರನ್ನೇ ಟಾರ್ಗೆಟ್​ ಮಾಡ್ತಿವೆ.

ಮೆಗಾ ಹರಾಜಿಗೂ ಮುನ್ನ ಡ್ರಾಫ್ಟ್​ ಸಿಸ್ಟಮ್​​ನಡಿ ಹೊಸ ತಂಡಗಳು ಇಬ್ಬರು ಭಾರತೀಯ, ಓರ್ವ ವಿದೇಶಿ ಆಟಗಾರರನ್ನ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ. ಈ ಅವಕಾಶವನ್ನೇ ಎನ್​ಕ್ಯಾಶ್​ ಮಾಡಿಕೊಳ್ಳಲು ಮುಂದಾಗಿರುವ ಲಕ್ನೋ ಮತ್ತು ಅಹ್ಮದಾಬಾದ್, ತನ್ನ ಬ್ರ್ಯಾಂಡ್ ವಾಲ್ಯೂ ಜೊತೆಗೆ ಬಲಿಷ್ಠ ತಂಡವನ್ನ ಕಟ್ಟುವ ಲೆಕ್ಕಚಾರದಲ್ಲಿವೆ. ಹೀಗಾಗಿಯೇ ಕೆಲ ಸ್ಟಾರ್​​ ಆಟಗಾರರ ಮೇಲೆ ಕಣ್ಣಿಟ್ಟಿವೆ.

ಡೇಂಜರಸ್​​​​ ವಾರ್ನರ್ ಮೇಲೆ ಲಕ್ನೋ ಕಣ್ಣು..!
ಕಳೆದ ಆವೃತ್ತಿಯಲ್ಲಿ ಡೇವಿಡ್ ವಾರ್ನರ್ ಹೈದ್ರಾಬಾದ್​ ಪರ​ ಕಳಪೆ ಪದರ್ಶನ ನೀಡಿದರೂ, ಲಕ್ನೋ ತಂಡದ ಕಣ್ಣು ಮಾತ್ರ ಡೇವಿಡ್ ವಾರ್ನರ್​​​ ಮೇಲೆ ನೆಟ್ಟಿದೆ. ಇದಕ್ಕೆ ಕಾರಣ ಲಕ್ನೋನ ಹೋಮ್ ಗ್ರೌಂಡ್, ಶಾರ್ಟ್​ ಬೌಂಡರಿಗಳನ್ನ ಹೊಂದಿರೋದು. ಹೀಗಾಗಿ ಡೇವಿಡ್ ವಾರ್ನರ್ ಪರಿಣಾಮಕಾರಿಯಾಗಬಲ್ಲರು. ಅಷ್ಟೇ ಅಲ್ಲ.. ಆತನ ನಾಯಕತ್ವದ ಗುಣಗಳು ತಂಡಕ್ಕೆ ಲಾಭದಾಯಕವೇ ಆಗಿರಲಿದೆ. ಭಾರತದಲ್ಲಿ ವಿಶೇಷ ಅಭಿಮಾನಿ ಬಳಗವನ್ನ ಹೊಂದಿದ್ದಾರೆ. ಹೀಗಾಗಿ ಇವರನ್ನ ತಂಡಕ್ಕೆ ಕರೆತರಲು, ಫ್ರಾಂಚೈಸಿ ಮುಂದಾಗಿದೆ.

ಜಸ್ಟ್ ವಾರ್ನರ್​ ಮೇಲೆ ಮಾತ್ರವಲ್ಲ. ಮುಂಬೈ ಇಂಡಿಯನ್ಸ್​ನ ಸೂರ್ಯಕುಮಾರ್ ಯಾದವ್, ಇಶಾನ್ ಕಿಶನ್​ರನ್ನೂ, ಈ ಫ್ರಾಂಚೈಸಿ ಟಾರ್ಗೆಟ್ ಮಾಡ್ತಿದೆ. ಯಾಕಂದ್ರೆ, ಮುಂಬೈ ಇಂಡಿಯನ್ಸ್​ನ ಮೊದಲ ರಿಟೈನ್ ಆಯ್ಕೆ, ರೋಹಿತ್ ಶರ್ಮಾ, ಕಿರನ್ ಪೋಲಾರ್ಡ್, ಜಸ್​ಪ್ರೀತ್​ ಬೂಮ್ರಾ ಆಗುವ ಸಾಧ್ಯತೆ ಇದೆ. ಇನ್ನೊಂದು ಆಯ್ಕೆಯಲ್ಲಿ ಸೂರ್ಯ ಕುಮಾರ್ ಅಥವಾ ಇಶಾನ್ ಕಿಶಾನ್.. ಇಬ್ಬರಲ್ಲಿ ಒಬ್ಬರು ಮಾತ್ರ ತಂಡದಲ್ಲಿ ಉಳಿಯಬಹುದಾಗಿದೆ. ಹೀಗಾಗಿ ಈ ಇಬ್ಬರಲ್ಲಿ ಒಬ್ಬರು ಹೊರಬೀಳೋದು ಗ್ಯಾರಂಟಿ. ಇದನ್ನೇ ಈಗ ಬಂಡವಾಳ ಮಾಡಿಕೊಳ್ಳಲು, ಲಕ್ನೋ ಮುಂದಾಗೋ ಸಾಧ್ಯತೆ ಇದೆ. ಅಷ್ಟೇ ಅಲ್ಲ..! ಲೋಕಲ್ ಹೀರೋಸ್ ಸುರೇಶ್​ ರೈನಾ ಮತ್ತು ಭುವನೇಶ್ವರ್​ರನ್ನ ತಂಡದ ಭಾಗವಾಗಿಸಿಕೊಳ್ಳಲು ಮುಂದಾಗಿದೆ ಅಂತಾನೇ ಮೂಲಗಳು ಹೇಳ್ತಿವೆ.

ಅಹ್ಮದಬಾದ್​ಗೆ ಭಾರತದ ಸ್ಟಾರ್​ ಆಟಗಾರರೇ ಟಾರ್ಗೆಟ್..!
ಹೌದು.. ಈಗಾಗಲೇ ಕೆ.ಎಲ್.ರಾಹುಲ್ ಮತ್ತು ಯಸ್​ ಅಯ್ಯರ್, ಫ್ರಾಂಚೈಸಿ ತೊರೆಯುವ ನಿಟ್ಟಿನಲ್ಲಿ ಹೆಜ್ಜೆ ಹಾಕಿದ್ದಾರೆ. ಅದ್ರಲ್ಲೂ ಬ್ಯಾಟಿಂಗ್​ನಲ್ಲಿ ಕಮಾಲ್ ಮಾಡಬಲ್ಲ ಈ ಇಬ್ಬರು, ತಂಡವನ್ನ ಸಮರ್ಥವಾಗಿ ಮುನ್ನಡೆಸಬಲ್ಲರು. ಓರ್ವ ಟಾಪ್ ಆರ್ಡರ್​ಗೆ ಬಲ ತುಂಬಿದರೆ, ಮತ್ತೊಬ್ಬ ಮಿಡಲ್ ಆರ್ಡರ್​ಗೆ ಶಕ್ತಿಯಾಗಬಲ್ಲ.. ಹೀಗಾಗಿ ಇವರನ್ನ ತನ್ನತ್ತ ಸೆಳೆಯಲು ಎಲ್ಲಾ ಪ್ರಯತ್ನಗಳು ತೆರೆ ಹಿಂದೆ ನಡೆಯುತ್ತಿದೆ. ಇದರ ಜೊತೆಗೆ ತಂಡಕ್ಕೆ ಲೋಕಲ್ ಫೇವರ್​ ನೀಡುವ ಸಲುವಾಗಿ ಆಲ್​​ರೌಂಡರ್​ ಹಾರ್ದಿಕ್​ಗೆ ಮಣೆಹಾಕಲು ಸ್ಕೆಚ್​ ಹಾಕಿದೆಯಂತೆ.. ಆದ್ರೆ, ಇವರಲ್ಲಿ ಯಾರು ರಿಟೈನ್ ಆಗದೇ ಉಳಿಯುತ್ತಾರೆ ಎಂಬ ಅಂಶದ ಮೇಲೆಯೇ ಎಲ್ಲವೂ ನಿರ್ಧಾರವಾಗಲಿದೆ.