ಟಿ-20 ವಿಶ್ವಕಪ್​​​​ನಲ್ಲಿ ಟೀಮ್​ ಇಂಡಿಯಾ ಅಂತೂ ಖಾತೆ ತೆರೆದಿದೆ. ಪಾಕಿಸ್ತಾನ, ನ್ಯೂಜಿಲೆಂಡ್​​ ಎದುರು ಸೋತ ಕೊಹ್ಲಿ ಸೇನೆ, ಆಫ್ಘನ್​ ವಿರುದ್ಧ 66 ರನ್​ಗಳ ಗೆಲುವು ದಾಖಲಿಸಿದೆ. ಇದರೊಂದಿಗೆ ಸೆಮಿಫೈನಲ್​​​ ಕನಸು ಕೊಂಚಮಟ್ಟಿಗೆ ಚಿಗುರಿಸಿಕೊಂಡಿದೆ. ಭಾರತಕ್ಕೆ ಸೆಮಿಫೈನಲ್​ ಪ್ರವೇಶಿಸುವ ಅವಕಾಶ ಇದೆ. ಆದರೆ ಸಾಕಷ್ಟು ಜಟಿಲವಾಗಿದೆ. ಅದಕ್ಕಾಗಿ ನೆಟ್​​ ರನ್​​​ರೇಟ್​ ಲೆಕ್ಕಾಚಾರ ನಡೆಯುತ್ತಿದೆ.

ವಿಶ್ವಕಪ್​ ಸೂಪರ್​​-12 ಗ್ರೂಪ್​​​-2ರ ಅಂಕಪಟ್ಟಿಯಲ್ಲಿ ಟೀಮ್ ಇಂಡಿಯಾ, ನಾಲ್ಕನೇ ಸ್ಥಾನದಲ್ಲಿದೆ. ಮೊದಲ ಸ್ಥಾನದಲ್ಲಿರುವ ಪಾಕಿಸ್ತಾನ 4 ಪಂದ್ಯಗಳಲ್ಲಿ ಗೆದ್ದು, ಒಂದು ಪಂದ್ಯ ಬಾಕಿ ಇರುವಾಗಲೇ ಸೆಮಿಫೈನಲ್​​ಗೆ ಲಗ್ಗೆ ಇಟ್ಟಿದೆ. ಆಫ್ಘಾನಿಸ್ತಾನ ನಾಲ್ಕು ಪಂದ್ಯಗಳಲ್ಲಿ ಎರಡರಲ್ಲಿ ಗೆದ್ದು, ಎರಡರಲ್ಲಿ ಸೋತಿದೆ. 4 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದು, +1.481 ರನ್​ರೇಟ್​ ಹೊಂದಿದೆ. ಇನ್ನ ನ್ಯೂಜಿಲೆಂಡ್ 3 ಪಂದ್ಯಗಳಲ್ಲಿ 2ರಲ್ಲಿ ಗೆದ್ದಿದೆ. 4 ಅಂಕ ಹೊಂದಿದ್ದು +0.816​ ರನ್​​ರೇಟ್​​ನೊಂದಿಗೆ 3ನೇ ಸ್ಥಾನದಲ್ಲಿದೆ.

ಆಫ್ಘನ್​​ ವಿರುದ್ಧ ಭಾರತ 66ರನ್​​ಗಳ ಅಂತರ ಗೆಲುವು ದಾಖಲಿಸಿದ ಪರಿಣಾಮ, ಮೈನಸ್​​​​ನಲ್ಲಿದ್ದ ನೆಟ್​​ ರನ್​​ರೇಟ್​​​ ಪ್ಲಸ್​​​​​​​​​​​​ ಆಗಿದೆ. ಮೈನಸ್ 1.609 ಇದ್ದ ನೆಟ್ ರನ್ ರೇಟ್ +0.073ಕ್ಕೆ ಏರಿದೆ. ಆದರೆ ನ್ಯೂಜಿಲೆಂಡ್​ – ಭಾರತ ಇನ್ನೂ ಎರಡು ಪಂದ್ಯಗಳು ಆಡಬೇಕಿರುವ ಕಾರಣ, ಅಚ್ಚರಿ ಬೆಳವಣಿಗೆಗಳು ನಡೆದರೂ ಅಚ್ಚರಿ ಇಲ್ಲ. ಟೀಮ್​ ಇಂಡಿಯಾ ಸೆಮಿಫೈನಲ್​ ಬಾಗಿಲು ಬಡಿಯಬೇಕೆಂದರೆ ಸಾಕಷ್ಟು ಅವಕಾಶಗಳಿವೆ. ಆದ್ರೆ ಇದ್ರಲ್ಲಿ ಒಂದು ಅವಕಾಶ ಕೈ ತಪ್ಪಿದರೂ ಮನೆಗೆ ವಾಪಸ್​ ಬರಬೇಕಾಗುತ್ತೆ.

ಹೇಗಿರಬೇಕು ಲೆಕ್ಕಾಚಾರ..?

• ಉಳಿದ ಎರಡೂ ಪಂದ್ಯಗಳಲ್ಲಿ ಭಾರತಕ್ಕೆ ಗೆಲುವು ಅನಿವಾರ್ಯ. ಒಂದು ಪಂದ್ಯ ಸೋತರೂ ಸೆಮಿಫೈನಲ್​ ಬಾಗಿಲು ಮುಚ್ಚಿದಂತೆ.
• ನ್ಯೂಜಿಲೆಂಡ್​​​ ಕೂಡ ಎರಡು ಪಂದ್ಯಗಳನ್ನ ಆಡಲಿದ್ದು, ಒಂದು ಪಂದ್ಯವಾದರೂ ಸೋಲಬೇಕಾಗುತ್ತೆ. ಎರಡೂ ಗೆದ್ದರೆ ಟೀಮ್​ ಇಂಡಿಯಾ ಸೆಮೀಸ್​​ ಕನಸು ಭಗ್ನಗೊಳ್ಳಲಿದೆ. ಒಂದು ಪಂದ್ಯ ಸೋತರೆ ಭಾರತಕ್ಕೆ ಸೆಮೀಸ್​​ ಜೀವಂತ.
• ಒಂದು ವೇಳೆ ನ್ಯೂಜಿಲೆಂಡ್​ ಉಳಿದೆರಡು ಪಂದ್ಯಗಳಲ್ಲಿ ಸೋತರೆ, ಸೆಮೀಸ್​​​​ಗಾಗಿ ಆಫ್ಘನ್​ -ಟೀಮ್​ ಇಂಡಿಯಾ ನಡುವೆ ನೆಟ್ ​ರನ್​ರೇಟ್​​ ಲೆಕ್ಕಾಚಾರ ನಡೆಯುತ್ತೆ.
• ನಮೀಬಿಯಾ ಎದುರು ಕಿವೀಸ್​ ಸೋತು, ಆಫ್ಘನ್​ ವಿರುದ್ಧ ಗೆದ್ದರೆ, ಆಗ ಭಾರತ-ನ್ಯೂಜಿಲೆಂಡ್ ನಡುವೆ ರನ್​​ರೇಟ್ ಲೆಕ್ಕಾಚಾರ ನಡೆಯುತ್ತೆ.
• ಅಥವಾ ನಮೀಬಿಯಾ ವಿರುದ್ಧ ನ್ಯೂಜಿಲೆಂಡ್ ಗೆದ್ದು ಆಫ್ಘನ್​ ವಿರುದ್ಧ ಸೋತಿದ್ದೇ ಆದರೆ ಆಗ ಮೂರು (ಕಿವೀಸ್​, ಭಾರತ, ಆಫ್ಘನ್​) ತಂಡಗಳ ನಡುವೆ ರನ್​​ರೇಟ್​​ ಲೆಕ್ಕಾಚಾರ ಎದುರಾಗುತ್ತೆ, ಇದರಲ್ಲಿ ಕಿವೀಸ್​​, ಆಫ್ಘನ್​​​ಗಿಂತ ರನ್​​ರೇಟ್​​ ಹೆಚ್ಚಿದ್ದರೆ ಮಾತ್ರ ಭಾರತ ಸೆಮೀಸ್​ಗೆ ಪ್ರವೇಶ ಪಡೆಯಲಿದೆ.

ಭಾರತಕ್ಕೆ ಗೆಲುವಿನ ಅಂತರಗಳು ಹೇಗಿರಬೇಕು..?
ಸ್ಕಾಟ್ಲೆಂಡ್-ನಮೀಬಿಯಾ ಎದುರು ಭಾರತ ಮೊದಲಿಗೆ ಬ್ಯಾಟಿಂಗ್​​ ನಡೆಸಿದರೆ 60 ರನ್​​ಗಳ ಅಂತರದಿಂದ ಗೆಲುವು ದಾಖಲಿಸಬೇಕು. ಆದರೆ ಚೇಸಿಂಗ್​​​ ಮಾಡಿದ್ದೇ ಆದರೆ 13 ಓವರ್​​​ಗಳ ಮೊದಲೇ ಚೇಸ್​ ಮಾಡಬೇಕಿರೋದು ಅಗತ್ಯ. ಇದಿಷ್ಟೇ ಅಲ್ಲ, ಆಫ್ಘನ್​​-ಕಿವೀಸ್​​​​ ಕೂಡ ಉಳಿದ ಪಂದ್ಯಗಳಲ್ಲಿ ಭಾರಿ ಅಂತರದ ಗೆಲುವು ದಾಖಲಿಸಬಾರದು.

ಒಟ್ನಲ್ಲಿ ಇಷ್ಟೆಲ್ಲಾ ನಡೆದರೆ ಮಾತ್ರ ಟೀಮ್​ ಇಂಡಿಯಾಗೆ ಸೆಮೀಸ್​ ಆಸೆ ಜೀವಂತವಾಗಿರಲಿದೆ. ಇಲ್ಲಿ ಒಂದು ಅವಕಾಶ ಕೈ ತಪ್ಪಿದರೂ ಭಾರತದ ಸೆಮಿಫೈನಲ್​​ ಕನಸು ಭಗ್ನವಾಗಲಿದೆ.