ಟೆಸ್ಟ್​ ಸರಣಿ ಗೆದ್ದ ಭಾರತ; ನಾಲ್ವರು ಹೀರೋಗಳ ಶ್ರಮಕ್ಕೆ ಸಿಕ್ಕ ಯಶಸ್ಸು ಇದು..!


ನ್ಯೂಜಿಲೆಂಡ್​​ ವಿರುದ್ಧದ 2ನೇ ಟೆಸ್ಟ್​​ ಪಂದ್ಯದಲ್ಲಿ ಟೀಮ್​ ಇಂಡಿಯಾ, 372ರನ್​​​​ಗಳ ಭರ್ಜರಿ ಗೆಲುವು ದಾಖಲಿಸಿದೆ. ಜೊತೆಗೆ ಸರಣಿಯನ್ನೂ ಕೈ ವಶಪಡಿಸಿಕೊಂಡಿದೆ. ಆದರೆ ಈ ಸರಣಿ ಗೆಲುವಿಗೆ ಪ್ರಮುಖ ಕಾರಣವಾಗಿದ್ದು, ಮಾತ್ರ ಆ ನಾಲ್ವರು. ಹೀಗಾಗಿ ಆ ನಾಲ್ವರು ಹೀರೋಗಳು, ಟೀಮ್ ಇಂಡಿಯಾದ ಮ್ಯಾಚ್ ವಿನ್ನರ್ಸ್​​ ಎನಿಸಿಕೊಂಡಿದ್ದಾರೆ.

ನ್ಯೂಜಿಲೆಂಡ್​​ ವಿರುದ್ಧ ಟೀಮ್​ ಇಂಡಿಯಾ, ಐತಿಹಾಸಿಕ ಟೆಸ್ಟ್​ ಸರಣಿ ಗೆದ್ದಿದೆ. ಎರಡು ಪಂದ್ಯಗಳ ಟೆಸ್ಟ್​​ ಸರಣಿಯನ್ನ 1-0 ಅಂತರದಲ್ಲಿ ಕೈವಶ ಮಾಡಿಕೊಂಡಿದೆ. ಬ್ಯಾಟಿಂಗ್​ ಮತ್ತು ಬೌಲಿಂಗ್​​​​ನಲ್ಲಿ ಆಲ್​​​​​​​ರೌಂಡ್​​ ಆಟವಾಡಿದ ಭಾರತ, ಎರಡನೇ ಟೆಸ್ಟ್​​​​​ನಲ್ಲೂ ಪ್ರವಾಸಿ ತಂಡಕ್ಕೆ ಮಣ್ಣು ಮುಕ್ಕಿಸಿದೆ. ಜೊತೆಗೆ ತವರಿನಲ್ಲಿ ಕಿವೀಸ್​ ವಿರುದ್ಧ 24 ವರ್ಷಗಳ ಗೆಲುವಿನ ಓಟವನ್ನ, ಭಾರತ ಮುಂದುವರೆಸಿದೆ. ಆದರೆ ಈ ಸರಣಿ ಗೆಲುವಿಗೆ ಕಾರಣವಾಗಿದ್ದು ಮಾತ್ರ, ಈ ನಾಲ್ವರು.

Image

ಭಾರತದ ಐತಿಹಾಸಿಕ ಟೆಸ್ಟ್ ಸರಣಿ​ ಗೆಲುವಿನ ಹೀರೋಗಳೆಂದರೆ ಶ್ರೇಯಸ್​​​​ ಅಯ್ಯರ್​, ಮಯಾಂಕ್​ ಅಗರ್ವಾಲ್​, ಅಶ್ವಿನ್, ಅಕ್ಷರ್​ ಪಟೇಲ್​ ಮತ್ತು ಜಯಂತ್​ ಯಾದವ್.! ಹೌದು..! ಟೆಸ್ಟ್​ ಸರಣಿ ಗೆದ್ದಿದ್ದೇ ಇವರಿಂದಲೇ. ಏಕೆಂದರೆ ಹಾಗಿತ್ತು ಅವರ ಬೊಂಬಾಟ್​ ಪ್ರದರ್ಶನ. ಹಾಗಂತ ಉಳಿದ ಆಟಗಾರರ ತಂಡಕ್ಕೆ ಕೊಡುಗೆ ನೀಡಲಿಲ್ಲವೆಂದಲ್ಲ. ಆದರೆ ಈ ನಾಲ್ವರ ಪ್ರದರ್ಶನ ಗೆಲುವಿನ ಮೇಲೆ ಅಷ್ಟು ಇಂಪ್ಯಾಕ್ಟ್​​​​ ಆಗಿತ್ತು. ಇದರಿಂದಲೇ ಸರಣಿ ಗೆಲ್ಲಲು ಸಾಧ್ಯವಾಗಿದ್ದು.

ಪದಾರ್ಪಣೆ ಪಂದ್ಯದಲ್ಲೇ ಶತಕದ ‘ಶ್ರೇಯಸ್ಸು’
ಮೊದಲ ಪಂದ್ಯ ಡ್ರಾ ಆದ್ರೂ, ಭಾರತದ ಆಟಗಾರರ ಪ್ರದರ್ಶನ ಗಮನ ಸೆಳೆದಿತ್ತು. ಅದರಲ್ಲೂ ಹೆಚ್ಚು ಚರ್ಚೆಯಾಗಿದ್ದು, ಚೊಚ್ಚಲ ಟೆಸ್ಟ್​​​ ಸರಣಿ ಆಡಿದ್ದ​ ಶ್ರೇಯಸ್​​ ಅಯ್ಯರ್​​ ಬ್ಯಾಟಿಂಗ್​. ಮೊದಲ ಪಂದ್ಯದ ಮೊದಲ ಇನ್ನಿಂಗ್ಸ್​​​ನಲ್ಲೇ ಶತಕ ಸಿಡಿಸಿದ ಅಯ್ಯರ್​, ಬಳಿಕ 2ನೇ ಇನ್ನಿಂಗ್ಸ್​​​​ನಲ್ಲೂ ಅರ್ಧಶತಕ ಸಿಡಿಸಿ ಮಿಂಚಿದರು. ಅಯ್ಯರ್ ಸಿಡಿಸಿದ​​ ಶತಕ ಮತ್ತು ಅರ್ಧಶತಕದ ಬಲದಿಂದ, ಮೊದಲ ಪಂದ್ಯದ ಮೇಲೆ ಹಿಡಿತ ಸಾಧಿಸುವಲ್ಲಿ ಯಶಸ್ವಿಯಾಗಿತ್ತು. ಆದರೆ ಕೊನೇ ಗಳಿಗೆಯಲ್ಲಿ ಗೆಲುವು ಕೈ ತಪ್ಪಿತ್ತು.

ಮಯಾಂಕ್​ ಅಗರ್​ವಾಲ್​​ ಮನಮೋಹಕ ಶತಕ
ಮೊದಲ ಪಂದ್ಯದ ಹೀರೋ ಆಗಿದ್ದು, ಶ್ರೇಯಸ್​ ಅಯ್ಯರ್​ ಆದರೆ, 2ನೇ ಟೆಸ್ಟ್​​ ಹೀರೋ ಆಗಿದ್ದು ಮಯಾಂಕ್​​ ಅಗರ್ವಾಲ್​. ಹೌದು.. ಸತತ ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಭಾರತಕ್ಕೆ ಆಸರೆಯಾಗಿದ್ದೇ, ಕನ್ನಡಿಗ ಮಯಾಂಕ್​ ಮನಮೋಹಕ ಶತಕ. ಹಾಗಾಗಿ ಮೊದಲ ಪಂದ್ಯದಲ್ಲಿ ಡ್ರಾ ಸಾಧಿಸಿದ್ದ ಭಾರತ, 2ನೇ ಟೆಸ್ಟ್​​ನಲ್ಲಿ ಭರ್ಜರಿ ಗೆಲುವು ದಾಖಲಿಸಿತು. ಮಯಾಂಕ್ ಕೂಡ ಪ್ರಥಮ ಇನ್ನಿಂಗ್ಸ್​​​​ನಲ್ಲಿ​​​​ 150 ರನ್​​​​ ಮತ್ತು ದ್ವಿತೀಯ ಇನ್ನಿಂಗ್ಸ್​​​ನಲ್ಲಿ ಅರ್ಧಶತಕ ಸಿಡಿಸಿ, ಗೆಲುವಿಗೆ ಪ್ರಮುಖ ರೂವಾರಿಯಾದರು.

ಕಿವೀಸ್​​ ಬ್ಯಾಟಿಂಗ್​​ ಮಂತ್ರಕ್ಕೆ ಅಶ್ವಿನ್​​​​​ ಸ್ಪಿನ್​ ಮಂತ್ರ
ಅಯ್ಯರ್​, ಮಯಾಂಕ್​ ಬ್ಯಾಟಿಂಗ್​​ನಲ್ಲಿ ಸದ್ದು ಮಾಡಿದ್ರೆ, ಆರ್​​​.ಅಶ್ವಿನ್​ ತಮ್ಮ ಕೈಚಳಕದ ಮೂಲಕ ಹೀರೋ ಆಗಿದ್ದಾರೆ. ಭಾರತದ ಪಾಲಿಗೆ ಅಶ್ವಿನ್ ಹೀರೋ. ಅದರಲ್ಲೂ ಅಶ್ವಿನ್​​ ಸ್ಪಿನ್​ ದಾಳಿಗೆ ತತ್ತರಿಸಿದ ಪ್ರವಾಸಿ ತಂಡದ ಎದುರು ಉತ್ತರ ನೀಡೋದಕ್ಕೆ ಹೆಣಗಾಡಿತು. ಹೀಗಾಗಿ ಅಶ್ವಿನ್,​ ಎರಡೂ ಪಂದ್ಯಗಳಲ್ಲಿ ಒಟ್ಟು 14 ವಿಕೆಟ್​ ಕಬಳಿಸಿ ಮಿಂಚಿದರು. ಅಲ್ಲದೆ, ಹಲವು ದಾಖಲೆಗಳನ್ನೂ ಬರೆದಿರುವ ಕೇರಂ ಸ್ಪಿನ್ನರ್​​, ಸರಣಿ ಶ್ರೇಷ್ಠ ಪ್ರಶಸ್ತಿಯನ್ನೂ ಬಾಚಿಕೊಂಡರು.

Image

ಬ್ಯಾಟಿಂಗ್​​, ಬೌಲಿಂಗ್​​​​​ನಲ್ಲಿ ಕಮಾಲ್ ಮಾಡಿದ ಅಕ್ಷರ್​​..!
ಟೀಮ್​ ಇಂಡಿಯಾದ ಮತ್ತೊಬ್ಬ ಹೀರೋ, ಅಕ್ಷರ್​ ಪಟೇಲ್​. ಅತ್ತ ಬ್ಯಾಟಿಂಗ್​​​​ನಲ್ಲಿ, ಇತ್ತ ಬೌಲಿಂಗ್​​​​ನಲ್ಲಿ ಕಿವೀಸ್​​ ತಂಡವನ್ನ ಇನ್ನಿಲ್ಲದಂತೆ ಕಾಡಿದ್ದಾರೆ. 2ನೇ ಟೆಸ್ಟ್​​ನ ಮೊದಲ ಇನ್ನಿಂಗ್ಸ್​​ನಲ್ಲಿ ತಮ್ಮ ಮೊದಲ ಅರ್ಧಶತಕ ಸಿಡಿಸಿದ ಅಕ್ಷರ್​, ಎರಡನೇ ಇನ್ನಿಂಗ್ಸ್​​ನಲ್ಲಿ ಸ್ಫೋಟಕ 41ರನ್​​ ಗಳಿಸಿದ್ದರು. ಇನ್ನು 2 ಪಂದ್ಯಗಳಿಂದ ಬ್ಯಾಟಿಂಗ್​​​​ನಲ್ಲಿ 124ರನ್​​ ಗಳಿಸಿದ್ದರೆ, ಬೌಲಿಂಗ್​​​​ನಲ್ಲಿ 9 ವಿಕೆಟ್​​ ಕಬಳಿಸಿದ ಸಾಧನೆ ಮಾಡಿದ್ರು. ಪಂದ್ಯದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

ಇವರಷ್ಟೆ ಅಲ್ಲದೆ, ಜಯಂತ್​ ಯಾದವ್​, ಶುಭ್​​ಮನ್​ ಗಿಲ್​​ ಕೂಡ, ತಂಡದ ಗೆಲುವಿಗೆ ಕೊಡುಗೆ ನೀಡಿದ್ದಾರೆ. ಹೀಗಾಗಿಯೇ ಕಿವೀಸ್​ ಸರಣಿಯಲ್ಲಿ ಟೀಮ್​ ಇಂಡಿಯಾ ಮೇಲುಗೈ ಸಾಧಿಸೋಕೆ ಕಾರಣವಾಗಿದೆ. ಒಟ್ನಲ್ಲಿ… ಈ ನಾಲ್ವರು ಆಟಗಾರರು ಮುಂದಿನ ಪಂದ್ಯಗಳಲ್ಲೂ ಇದೇ ರೀತಿ ತಂಡಕ್ಕೆ ಯಶಸ್ಸು ತಂದುಕೊಡಲಿ ಅನ್ನೋದೆ, ಕ್ರಿಕೆಟ್ ಅಭಿಮಾಣಿಗಳ ಆಶಯ.

News First Live Kannada


Leave a Reply

Your email address will not be published. Required fields are marked *