ಬೆಂಗಳೂರು: ಕೊರೊನಾ ಹೊಡೆತದಿಂದ ಇದೀಗ ಚೇತರಿಕೆ ಕಾಣುತ್ತಿರುವ ಬಿಎಂಟಿಸಿ, ಕೆಎಸ್‌ಆರ್‌ಟಿಸಿಗೆ ಇದೀಗ ಮತ್ತೊಂದು ಸಂಕಷ್ಟ ಎದುರಾಗಿದೆ. ನಿಗಮಗಳ ಬಸ್​ಗಳು ಸಂಚಾರ ನಿಯಮಗಳನ್ನು ಉಲ್ಲಂಘಿಸಿದ ಪರಿಣಾಮ ವರ್ಷವೊಂದರಲ್ಲಿಯೇ ಸಂಚಾರಿ ಪೊಲೀಸರಿಂದ ಬಾಕಿ ಇರುವ ಬರೋಬ್ಬರಿ ಒಂದು ಕೋಟಿಗೂ ಅಧಿಕ ದಂಡವನ್ನು ಪಾವತಿಸುವಂತೆ ನೋಟಿಸ್​ ಜಾರಿ ಮಾಡಲಾಗಿದೆ.

ಇತ್ತೀಚಿಗೆ ಸರಿಯಾಗಿ ಸಂಬಳ ಬಾರದೆ ನಿಗಳಮಗಳ ನೌಕರರು ಕಂಗಾಲಾಗಿದ್ದರು. ಕೊರೊನಾ ಬಿಕ್ಕಟ್ಟಿನಿಂದ ಆರ್ಥಿಕ ಹಿಂಜರಿಕೆ ಕಂಡಿದ್ದ ಉಭಯ ನಿಗಮಗಳು ಹಂಗೋ ಹಿಂಗೋ ಮಾಡಿ ಸಿಬ್ಬಂದಿಗೆ ಸಂಬಳ ಪಾವತಿಸುತ್ತಿದೆ. ಅಂತ್ರದಲ್ಲಿ ವಾಹನ ಚಾಲಕರು ಟ್ರಾಫಿಕ್​ ನಿಯಮಗಳನ್ನು ಉಲ್ಲಂಘಿಂಸಿ ನಿಗಮಗಳು 1 ಕೋಟಿಗೂ ಅಧಿಕ ಮೊತ್ತದ ದಂಡವನ್ನ ಪಾವತಿಸುವಂತೆ ಮಾಡಿದ್ದಾರೆ.

ಅತೀ ವೇಗದ ಹಾಗೂ ನಿರ್ಲಕ್ಷ್ಯದ ಚಾಲನೆ, ಸಿಗ್ನಲ್ ಜಂಪ್, ನೋ ಪಾರ್ಕಿಂಗ್, ಕಂಡ ಕಂಡಲ್ಲಿ ಬಸ್ ನಿಲ್ಲಿಸುವ ಮೂಲಕ ಸಂಚಾರ ನಿಯಮ ಉಲ್ಲಂಘನೆ ಮಾಡಲಾಗಿದೆ. ಅಂತಹ ಬಸ್​ ಡಿಪೋಗಳಿಗೆ ಇಲಾಖೆಯಿಂದ ಬಸ್‌ಗಳ ನಂಬರ್ ಉಲ್ಲೇಖಿಸಿ ದಂಡ ಪಾವತಿಸುವಂತೆ ನೋಟಿಸ್ ಕಳುಹಿಸಲಾಗಿದೆ.

ಕಳೆದ ಮೂರು ವರ್ಷಗಳಲ್ಲಿ ಸಂಚಾರಿ ನಿಯಮಗಳ ಉಲ್ಲಂಘನೆಗೆ ಸಂಬಂಧಿಸಿದಂತೆ ನಿಗಮಗಳ ಮೇಲೆ 35,048 ಪ್ರಕರಣ ದಾಖಲಾಗಿವೆ. ಇವೆಲ್ಲ ಕೇಸ್​ಗಳಿಂದ ಬಿಎಂಟಿಸಿ ಬರೋಬ್ಬರಿ 1,94,83,200 ರೂಪಾಯಿ ದಂಡ ಬಾಕಿ ಉಳಿಸಿಕೊಂಡಿದೆ ಎಂಬ ಮಾಹಿತಿ ಲಭ್ಯವಾಗಿದೆ.

ನಿಗಮಗಳಿಗೆ ನೋಟಿಸ್​ ಕಳಿಸಿದ ಬಳಿಕ ಟ್ರಾಫಿಕ್​ ರೂಲ್ಸ್​ ಉಲ್ಲಂಘಿಸಿದ ಬಸ್​ ಚಾಲಕರಿಗೂ ಕೂಡ ಪ್ರತ್ಯೇಕ ನೋಟಿಸ್​ ಕಳುಹಿಸಲಾಗಿದೆ. ಮತ್ತು ಆ ದಂಡದ ಮೊತ್ತವನ್ನು ಚಾಲಕನೇ ಪಾವತಿಸಬೇಕೆಂದು ಡಿಪೋ ಮ್ಯಾನೇಜರ್​ಗಳು ಹೇಳುತ್ತಿದ್ದರಂತೆ. ಡ್ರೈವರ್​ ದಂಡ ಪಾವತಿಸಲು ನಿರಾಕರಿಸಿದ್ದಲ್ಲಿ ವೇತನದಲ್ಲಿ ಕಡಿತಗೊಳಿಸೋದಾಗಿ ವ್ಯವಸ್ಥಾಪಕರು ತಿಳಿಸಿದ್ದಾರಂತೆ. ಇದರಿಂದ ಸಂಬಳದಲ್ಲಿ ಜೀವನ ಮಾಡೋದೆ ಕಷ್ಟ ಎನ್ನುವ ಸಿಬ್ಬಂದಿ ಕಂಗಾಲಾಗಿದ್ದಾರೆ.

ಇದನ್ನೂ ಓದಿ:14,682 #Bitcoin ವರ್ಗಾವಣೆಗೆ ಸಾಕ್ಷಿ ಇಲ್ಲ -ಆರೋಪಗಳಿಗೆ ಪೊಲೀಸ್ ಇಲಾಖೆ ಕೊಟ್ಟ ಸ್ಪಷ್ಟನೆ ಏನು..?