ಎಬಿ ಡಿವಿಲಿಯರ್ಸ್, ವಿಶ್ವ ಕ್ರಿಕೆಟ್​ನ ಮಿಸ್ಟರ್ 360. ನಿನ್ನೆ ಎಲ್ಲಾ ಕ್ರಿಕೆಟ್​​ಗೆ ಗುಡ್​​ಬೈ ಹೇಳುವುದರೊಂದಿಗೆ ಶಸ್ತ್ರತ್ಯಾಗ ಮಾಡಿದ್ದಾರೆ. ಇದರೊಂದಿಗೆ ಅಸಂಖ್ಯಾತ ಅಭಿಮಾನಿಗಳಿಗೆ ಅಚ್ಚರಿ ಮೂಡಿಸಿದ್ದಾರೆ. ಆರ್​ಸಿಬಿಯ ಮ್ಯಾಚ್ ವಿನ್ನರ್ ಎಬಿಡಿ, ದಿಢೀರ್​ಇಂಥದ್ದೊಂದು ನಿರ್ಧಾರ ಕೈಗೊಂಡಿದ್ದೇಕೆ..? ಇಲ್ಲಿದೆ ನೋಡಿ ಡಿಟೈಲ್ಸ್.

ಮಿಸ್ಟರ್ 360 ಎಂದ್ರೆ ನೆನೆಪಾಗೋದು, ಸೌತ್ ಆಫ್ರಿಕಾದ ಸೂಪರ್ ಸ್ಟಾರ್​ ಬ್ಯಾಟ್ಸ್​ಮನ್​​, ಎಬಿ ಡಿವಿಲಿಯರ್ಸ್​. ತನ್ನ ವಿಶಿಷ್ಟ ಬ್ಯಾಟಿಂಗ್​ ಶೈಲಿಯಿಂದ ಎಬಿಡಿ, ಅಷ್ಟದಿಕ್ಕುಗಳಿಗೂ ಚೆಂಡನ್ನ ಬಡಿದಟ್ಟುವ ಏಕಮಾತ್ರ ಪರಾಕ್ರಮಿ. ವಿಶ್ವ ಕ್ರಿಕೆಟ್​ನ ಅಜಾತುಶತ್ರವಾಗಿರುವ ಎಬಿಡಿ, ಅಪಾರ ಸಂಖ್ಯೆಯ ಅಭಿಮಾನಿ ಬಳಗವನ್ನೇ ಹೊಂದಿದ್ದಾರೆ. ಆದ್ರೀಗ ಈ ಅಭಿಮಾನಿ ಬಳಗಕ್ಕೆ ಮಿಸ್ಟರ್ 360, ಶಾಕ್ ನೀಡಿದ್ದಾರೆ. ಎಲ್ಲಾ ಮಾದರಿಯ ಕ್ರಿಕೆಟ್​ಗೆ ಗುಡ್​ಬೈ ಹೇಳುವುದರೊಂದಿಗೆ, ಅಚ್ಚರಿ ಮೂಡಿಸಿದ್ದಾರೆ.

‘ಇದೊಂದು ಅದ್ಭುತ ಪ್ರಯಾಣ. ಆದ್ರೆ ನಾನು ಎಲ್ಲಾ ಕ್ರಿಕೆಟ್‌ನಿಂದ ನಿವೃತ್ತಿಯಾಗಲು ನಿರ್ಧರಿಸಿದ್ದೇನೆ. ಇದುವರೆಗೆ ನಾನು ಉತ್ಸಾಹದಿಂದ ಆಟವನ್ನ ಆಡಿದ್ದೇನೆ. 37ನೇ ವಯಸ್ಸಿನಲ್ಲಿ ಜ್ವಾಲೆಯು, ಪ್ರಕಾಶಮಾನವಾಗಿ ಉರಿಯುವುದಿಲ್ಲ. ಇದನ್ನ ಒಪ್ಪಿಕೊಳ್ಳಲೇಬೇಕಾದ ವಾಸ್ತವ. ಹೀಗಾಗಿ ನಾನು ಈ ಘೋಷಣೆ ಮಾಡುತ್ತಿದ್ದೇನೆ. ಕ್ರಿಕೆಟ್ ನನ್ನ ಮೇಲೆ ಅಸಾಧಾರಣ ಪ್ರೀತಿ ತೋರಿದೆ. ಟೈಟನ್ಸ್, ಪ್ರೋಟೀಸ್, ಆರ್​​ಸಿಬಿ ಅಥವಾ ಪ್ರಪಂಚದಾದ್ಯಂತ ಆಡುತ್ತಿರಲಿ, ಆಟವು ನನಗೆ ಊಹಿಸಲಾಗದ ಅನುಭವ, ಅವಕಾಶ ನೀಡಿದೆ. ಇದಕ್ಕೆ ನಾನು ಯಾವಾಗಲೂ ಕೃತಜ್ಞನಾಗಿರುತ್ತೇನೆ.’
ಎಬಿ ಡಿವಿಲಿಯರ್ಸ್​, ಮಾಜಿ ಕ್ರಿಕೆಟಿಗ

ನಿವೃತ್ತಿ ಘೋಷಿಸಿ RCB & ಫಾನ್ಸ್​ಗೆ ಶಾಕ್ ಕೊಟ್ಟ ಎಬಿಡಿ..!
2008ರಿಂದ ಮೊದಲ 3 ಆವೃತ್ತಿಗಳಲ್ಲಿ ಡೆಲ್ಲಿ ಡೇರ್​ಡೆವಿಲ್ಸ್​ ಪರ ಆಡಿದ್ದ ಎಬಿಡಿ, 2011ರಿಂದ ಆರ್​​ಸಿಬಿಯ ಅವಿಭಾಜ್ಯ ಅಂಗವಾಗಿದ್ದರು. ಸಾಕಷ್ಟು ಫ್ಯಾನ್ ಫಾಲೋಯಿಂಗ್​ ಹೊಂದಿದ್ದ ಎಬಿ, ಮುಂದಿನ ಸೀಸನ್​ನಲ್ಲಿ ಆರ್​ಸಿಬಿ ನಾಯಕತ್ವ ವಹಿಸಿಕೊಳ್ಳುತ್ತಾರೆ ಅಂತಾನೇ ಊಹಿಸಲಾಗಿತ್ತು. ಇದಕ್ಕಾಗಿ ಎಬಿಡಿ ರಿಟೈನ್​ಗೂ ಆರ್​ಸಿಬಿ ಫ್ರಾಂಚೈಸಿ ಮುಂದಾಗಿತ್ತು. ಆದ್ರೀಗ ಗ್ಲೋಬಲ್ ಟಿ20 ಕ್ರಿಕೆಟ್​​​ಗೆ ನಿವೃತ್ತಿ ಘೋಷಿಸಿ ನಿರಾಸೆ ಮೂಡಿಸಿದ್ದಾರೆ. ಇದಕ್ಕೆ ಕಾರಣವನ್ನ ಎಬಿಡಿ ತಮ್ಮ ಟ್ವೀಟ್​ನಲ್ಲೇ ಬಹಿರಂಗ ಪಡಿಸಿದ್ದಾರೆ.

ವಯಸ್ಸಿನ ಕಾರಣ ನೀಡಿ ಕ್ರಿಕೆಟ್​ಗೆ ಗುಡ್​​ಬೈ..!
37 ವರ್ಷದ ಎಬಿ ಡಿವಿಲಿಯರ್ಸ್, ಮೊದಲಿನ ಬ್ಯಾಟಿಂಗ್ ಖದರ್ ಸಂಪೂರ್ಣ ಕಳೆದುಕೊಂಡಿದ್ದಾರೆ. ಟೂರ್ನಿಗಳಲ್ಲಿ ಸತತ ವೈಫಲ್ಯ ಅನುಭವಿಸುತ್ತಿರುವ ಕಾರಣ, ಗ್ಲೋಬಲ್ ಟಿ20 ಲೀಗ್​ಗಳಿಂದ ಹಿಂದೆ ಸರಿದ್ದಾರೆ. ಇದಕ್ಕೆ ಬೆಸ್ಟ್​ ಎಕ್ಸಾಂಪಲ್, ಐಪಿಎಲ್ ಸೀಸನ್-14.

ಪಂದ್ಯಕ್ಕೆ ಬೇಕಾದ ಫಿಟ್ನೆಸ್ ಹೊಂದಿಲ್ಲ ಎಬಿ ಡಿವಿಲಿಯರ್ಸ್
ಮೈದಾನದಲ್ಲಿ ಬ್ಯಾಟಿಂಗ್, ವಿಕೆಟ್ ಕೀಪಿಂಗ್, ಫೀಲ್ಡಿಂಗ್​ ಮಾಡುತ್ತಿದ್ದಾಗ ಎಬಿಡಿ, ಸದಾ ಌಕ್ಟೀವ್ ಆಗಿ ಇರುತ್ತಿದ್ದರು. ಆದ್ರೆ ಕಳೆದ ಆವೃತ್ತಿಯಲ್ಲಿ ಇದು ಮಾಯವಾಗಿತ್ತು. ಅಷ್ಟೇ ಅಲ್ಲ, ಆರ್​ಸಿಬಿ ಪಾಲಿಗೆ ಮ್ಯಾಚ್ ಫಿನಿಷರ್ ಆಗಿದ್ದ ಎಬಿಡಿ, ಫಿಟ್ನೆಸ್ ಕಾರಣದಿಂದಲೇ ವಿಕೆಟ್ ಕೀಪಿಂಗ್ ಜವಾಬ್ದಾರಿಯನ್ನ ಕೆ.ಎಸ್.ಭರತ್​ಗೆ ಬಿಟ್ಟುಕೊಟ್ರು ಎನ್ನಲಾಗ್ತಿದೆ.

ಫ್ಯಾಮಿಲಿ ಜೊತೆ ಸಮಯ ಕಳೆಯಲು ಈ ನಿರ್ಧಾರ..!
ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ 2018ರಲ್ಲೇ ಗುಡ್​​ಬೈ ಹೇಳಿದ್ದರು, ಎಬಿ ಡಿವಿಲಿಯರ್ಸ್ ಮೋಸ್ಟ್​ ಬ್ಯುಸಿಯೆಸ್ಟ್​ ಕ್ರಿಕೆಟರ್ ಆಗಿದ್ದರು. ವಿಶ್ವದಾದ್ಯಂತ ವಿವಿಧ ಲೀಗ್​ಗಳನ್ನ ಆಡುತ್ತಾ ವರ್ಷ ಪೂರ್ತಿ ಬ್ಯುಸಿಯಾಗಿರುತ್ತಿದ್ದರು. ಆದ್ರೀಗ ಫ್ಯಾಮಿಲಿಗಾಗಿ ಸಮಯ ಮೀಸಲಿಡಲು ನಿರ್ಧರಿಸಿರುವ ಎಬಿ ಡಿವಿಲಿಯರ್ಸ್, ಗ್ಲೋಬಲ್ ಟಿ20 ಟೂರ್ನಿಗಳಿಂದಲೂ ಹೊರಬರಲು ತೀರ್ಮಾನಿಸಿದ್ದಾರೆ.