ಅದೃಷ್ಟದ ಜೊತೆಗೆ ದುರಾದೃಷ್ಟವು ಇರುತ್ತೆ ಅನ್ನೋ ಮಾತಿದೆ. ಅದು ಸದ್ಯ ದೀಪಕ್ ಚಹರ್ಗೆ ಸರಿಯಾಗಿ ಹೋಲಿಕೆಯಾಗ್ತಿದೆ. ಹರಾಜಿನಲ್ಲಿ ಬರೋಬ್ಬರಿ 14 ಕೋಟಿಯನ್ನ ಚಹರ್ ಬಾಚಿಕೊಂಡ್ರು ನಿಜ. ಆದ್ರೆ, ಈಗಿನ ಪರಿಸ್ಥಿತಿ ಕೈಗೆ ಬಂದ ತುತ್ತು ಬಾಯಿಗೆ ಬರದಂತೆ ಮಾಡಿದೆ.
ಐಪಿಎಲ್ ಮೆಗಾ ಹರಾಜು ಕೆಲ ಆಟಗಾರರ ಅದೃಷ್ಟವನ್ನೇ ಬದಲಾಯಿಸಿದೆ. ಕೆಲ ಯುವ ಆಟಗಾರರಂತೂ ನಿರೀಕ್ಷೆಗೂ ಮೀರಿದ ಮೊತ್ತಕ್ಕೆ ಸೇಲಾಗಿದ್ದಾರೆ. ಅದ್ರಲ್ಲೂ ಇಂಡಿಯನ್ ಸ್ಟಾರ್ ವೇಗಿ ದೀಪಕ್ ಚಹರ್ ಮಿಲಿಯನ್ ಡಾಲರ್ ಟೂರ್ನಿಯಲ್ಲಿ ದಾಖಲೆಯ ಮೊತ್ತಕ್ಕೆ ಸಿಎಸ್ಕೆ ಫ್ರಾಂಚೈಸಿ ಪಾಲಾಗಿದ್ದಾರೆ. ಅಂದು ಕೋಟಿ ಕೋಟಿ ಮೊತ್ತಕ್ಕೆ ಚಹರ್ ಸೇಲಾದ ಬೆನ್ನಲ್ಲೇ, ಅದೃಷ್ಟವಂತರಂದ್ರೆ ಇವರೇ ನೋಡಿ ಅಂತ ಎಲ್ಲಾ ಮಾತನಾಡಿಕೊಳ್ತಿದ್ರು. ಆದ್ರೀಗ, ಅದೃಷ್ಟದ ಜೊತೆಗೆ ದುರಾದೃಷ್ಟವು ಇರುತ್ತದೆ ಅನ್ನೋದಕ್ಕೆ ಈಗ ಈ ಕೋಟಿ ವೀರ ಸಾಕ್ಷಿಯಾಗಿ ನಿಂತಿದ್ದಾನೆ.
ಐಪಿಎಲ್ ಆಕ್ಷನ್ನಲ್ಲಿ ದೀಪಕ್ ಚಹರ್ ಖರೀದಿಸೋಕೆ, ರಾಜಸ್ಥಾನ್, ಹೈದ್ರಾಬಾದ್ ಮತ್ತು ಡೆಲ್ಲಿ ಫ್ರಾಂಚೈಸಿಗಳು ಬಿಡ್ಡಿಂಗ್ ವಾರೇ ನಡೆಸಿದ್ವು. ಅಂತಿಮವಾಗಿ 14 ಕೋಟಿ ರೂಪಾಯಿಗೆ ಚೆನ್ನೈ ಸೂಪರ್ಕಿಂಗ್ಸ್ ತಂಡ, ದೀಪಕ್ ಚಹರ್ರನ್ನ ಖರೀದಿಸುವಲ್ಲಿ ಯಶಸ್ವಿಯಾಯ್ತು. ಇದರೊಂದಿಗೆ 2022ರ ಐಪಿಎಲ್ ಮೆಗಾ ಹರಾಜಿನಲ್ಲಿ ಕಿಶನ್ ಬಳಿಕ, ಅತಿ ಹೆಚ್ಚು ಮೊತ್ತಕ್ಕೆ ಸೇಲಾದ ಆಟಗಾರ ಅಂತಾ ದೀಪಕ್ ಚಹರ್ ಎನಿಸಿಕೊಂಡ್ರು.
ವಿಂಡೀಸ್ ಸರಣಿಯಲ್ಲಿ ದೀಪಕ್ ಚಹರ್ಗೆ ಇಂಜುರಿ
14 ಕೋಟಿ ವೀರನ ಸಂಭ್ರಮ, ಇದೀಗ ಮಾಯವಾಗಿದೆ. ವೆಸ್ಟ್ ಇಂಡೀಸ್ ವಿರುದ್ಧದ 3ನೇ ಟಿ-ಟ್ವೆಂಟಿ ಪಂದ್ಯದಲ್ಲಿ ಹ್ಯಾಮ್ಸ್ಟ್ರಿಂಗ್ ಇಂಜುರಿಗೆ ತುತ್ತಾದ ಚಹರ್, ಅರ್ಧಕ್ಕೆ ಬೌಲಿಂಗ್ ನಿಲ್ಲಿಸಿ ಪೆವಿಲಿಯನ್ ಸೇರಿಕೊಂಡ್ರು. ಪರಿಣಾಮ ಶ್ರೀಲಂಕಾ ಟಿ-ಟ್ವೆಂಟಿ ಸರಣಿಗೂ ದೀಪಕ್ ಚಹರ್ ಅಲಭ್ಯರಾಗಿದ್ದಾರೆ. ಇದೀಗ ಗುಣಮುಖವಾಗಲು ಇನ್ನೂ ಹೆಚ್ಚು ಸಮಯ ಬೇಕಾಗಿರುವ ಕಾರಣದಿಂದ ಐಪಿಎಲ್ ಸೀಸನ್-15ರಿಂದ ಚಹರ್, ಹೊರಗುಳಿಯುವ ಸಾಧ್ಯತೆ ಇದೆ ಅಂತ ಹೇಳಲಾಗ್ತಿದೆ.
ಚಹರ್ಗೆ ಬೇಕಿದೆ 3 ರಿಂದ 4 ವಾರಗಳ ವಿಶ್ರಾಂತಿ
ಬಿಸಿಸಿಐ ಅಧಿಕಾರಿಯೊಬ್ಬರು ನೀಡಿರುವ ಮಾಹಿತಿ ಪ್ರಕಾರ, ದೀಪಕ್ ಚಹರ್ಗೆ ಗಂಭೀರ ಗಾಯವಾಗಿದೆಯಂತೆ. ಹೀಗಾಗಿ ವೈದ್ಯರು ಚಹರ್ಗೆ 3 ರಿಂದ 4 ವಾರಗಳ ಕಾಲ ವಿಶ್ರಾಂತಿ ಸೂಚಿಸಿದ್ದಾರೆ. ಹಾಗಿದ್ರೂ ಚಹರ್ ನಿಗಧಿತ ಸಮಯದಲ್ಲಿ ಗುಣಮುಖರಾಗೋದು ಅನುಮಾನ ಎನ್ನಲಾಗ್ತಿದೆ. ಒಂದು ವೇಳೆ ಚಹರ್ ಹ್ಯಾಮ್ಸ್ಟ್ರಿಂಗ್ ಇಂಜುರಿಯಿಂದ ಸಂಪೂರ್ಣ ಗುಣಮುಖರಾಗಿ ಐಪಿಎಲ್ಗೆ ಕಮ್ಬ್ಯಾಕ್ ಮಾಡಿದ್ರೂ, ಆಡೋದು ಕೇವಲ ಕೆಲವೇ ಕೆಲವು ಪಂದ್ಯಗಳನ್ನ ಮಾತ್ರವಂತೆ.
ಒಂದು ವೇಳೆ ದೀಪಕ್ ಚಹರ್ ಐಪಿಎಲ್ ಟೂರ್ನಿಯಿಂದ ಹೊರ ನಡೆದ್ರೆ, ಚೆನ್ನೈ ಸೂಪರ್ಕಿಂಗ್ಸ್ ತಂಡಕ್ಕೆ ಭಾರಿ ಹಿನ್ನಡೆ ಉಂಟಾಗಲಿದೆ. ಟಿ-ಟ್ವೆಂಟಿ ಕ್ರಿಕೆಟ್ಗೆ ಹೇಳಿ ಮಾಡಿಸಿದಂತಿದ್ದ ಚಹರ್, ಮ್ಯಾಚ್ ವಿನ್ನರ್ ಅನ್ನೋದ್ರಲ್ಲಿ ಅನುಮಾನವೇ ಇಲ್ಲ. ಹಾಗಾಗೇ ಚೆನ್ನೈ ಫ್ರಾಂಚೈಸಿ, ಚಹರ್ರನ್ನ ಎಷ್ಟೇ ಕೋಟಿ ಖರ್ಚಾದ್ರು, ಖರೀದಿಸಲೇಬೇಕು ಅಂತ ಪಣತೊಟ್ಟಿದ್ದು.
ಒಟ್ನಲ್ಲಿ.. ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಅಂತಾರಲ್ಲ ಆ ಪರಿಸ್ಥಿತಿ ಇದೀಗ ದೀಪಕ್ ಚಹರ್ಗೆ ಬಂದಿದೆ. ಸಿಎಸ್ಕೆ ಸ್ಟಾರ್ ಆಟಗಾರ ಐಪಿಎಲ್ ಆಡ್ತಾರಾ ಇಲ್ವಾ ಅನ್ನೋ ಪ್ರಶ್ನೆಗೆ, ಕೆಲವೇ ದಿನಗಳಲ್ಲಿ ಉತ್ತರ ಸಿಗಲಿದೆ.