ಬಾಲಿವುಡ್​ನ ಸಲ್ಮಾನ್​ ಖಾನ್ ಸಿನಿ ಜೀವನದಲ್ಲಿ ವಿಶೇಷ ಸಿನಿಮಾ ಅಂದ್ರೆ ಅದು ‘ಭಜರಂಗಿ ಭಾಯ್​ ಜಾನ್’​ ಸಿನಿಮಾ. ಈ ಸಿನಿಮಾ ಸಲ್ಲು ಸಿನಿ ಕರಿಯರ್​ನ ಹಿಟ್​ ಸಿನಿಮಾಗಳ ಪೈಕಿ ಪ್ರಮುಖ ಸಾಲಿನಲ್ಲಿ ನಿಲ್ಲುತ್ತದೆ.

‘ಭಜರಂಗಿ ಭಾಯ್​ ಜಾನ್’​ ಸಿನಿಮಾ 2015ರಲ್ಲಿ ರಿಲೀಸ್​ ಆಗಿ ಬ್ಲಾಕ್‌ಬಸ್ಟರ್​ ಹಿಟ್ ಆಗಿತ್ತು. ಇಂಡಿಯಾ-ಪಾಕಿಸ್ತಾನ ನಡುವಿನ ಕಥಾ ಹಂದರ ಹೊಂದಿದ್ದ ‘ಭಜರಂಗಿ ಭಾಯ್​ ಜಾನ್’​ ಸಿನಿಮಾ ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ಯಶಸ್ವಿ ಆಗಿತ್ತು. ಈ ವಿಚಾರವಾಗಿ  ಇತ್ತೀಚೆಗೆ ಸಲ್ಮಾನ್ ಖಾನ್ ಅವರು, ತಮ್ಮ 2015 ರ ಬ್ಲಾಕ್‌ಬಸ್ಟರ್ ಚಿತ್ರ ಭಜರಂಗಿ ಭಾಯ್​ಜಾನ್‌ನ ಸೀಕ್ವೆಲ್‌ಗಾಗಿ ಶೀಘ್ರದಲ್ಲೇ ಕೆಲಸ ಮಾಡುವುದಾಗಿ ಘೋಷಿಸಿದ್ದರು.

ಈ ಚಿತ್ರದ ಮತ್ತೊಂದು ವಿಶೇಷ ಏನಂದ್ರೆ, ‘ಭಜರಂಗಿ ಭಾಯ್​ ಜಾನ್’​ ಕಥೆ ಬರೆದಿದ್ದು, ರಾಜ ಮೌಳಿ ತಂದೆ ವಿಜಯೇಂದ್ರ ಪ್ರಸಾದ್ ​. ಈಗ  ‘ಭಜರಂಗಿ ಭಾಯ್​ ಜಾನ್’​ -2 ಗೂ ವಿಜಯೇಂದ್ರ ಪ್ರಸಾದ್​ ಅವರೇ ಕಥೆ ಬರೆದಿದ್ದಾರೆ. ಮೊದಲ ಭಾಗಕ್ಕೆ ಖ್ಯಾತ ನಿರ್ದೇಶಕ ಕಬೀರ್ ಖಾನ್ ಆ್ಯಕ್ಷನ್​ ಕಟ್​ ಹೇಳಿದ್ದರು. ಆದರೆ ಭಾಗ-2 ಗೆ ಕಬೀರ್​ ಖಾನ್​ ಆ್ಯಕ್ಷನ್​ ಕಟ್​ ಹೇಳುತ್ತಾರಾ ಅನ್ನೋದೇ ಡೌಟ್​ ಎನ್ನುತ್ತಿದೆ ಭಜರಂಗಿ ಟೀಂ. ನಿರ್ದೇಶನದ ಬಗ್ಗೆ ಮಾತನಾಡಿರುವ ವಿಜಯೇಂದ್ರ ಪ್ರಸಾದ್ ​, ಕಬೀರ್​ ಖಾನ್​  ‘ಭಜರಂಗಿ ಭಾಯ್​ ಜಾನ್’ ಭಾಗ-2 ಅನ್ನು ನಿರ್ದೇಶನ ಮಾಡುವುದು ಬಿಡುವುದು ಸಲ್ಮಾನ್​ ಖಾನ್​ ಗೆ ಬಿಟ್ಟ ವಿಚಾರ ಅಂತ ಹೇಳಿದ್ದಾರೆ.

 ‘ಭಜರಂಗಿ ಭಾಯ್​ ಜಾನ್’-1ರಲ್ಲಿ ಅದ್ಭುತವಾದ ಕೆಲಸ ಮಾಡಿದ್ದರಿಂದ ಸಿನಿಮಾ ಸೂಪರ್​ ಹಿಟ್ ಆಗಿತ್ತು. ಭಾಗ -2 ನಲ್ಲೂ  ಕಬೀರ್ ಖಾನ್ ಚಿತ್ರವನ್ನು ನಿರ್ದೆಶನ ಮಾಡಲಿ ಎಂದು ನಾನು ಬಯಸುತ್ತೇನೆ ಎಂದು ವಿಜಯೇಂದ್ರ ಪ್ರಸಾದ್ ಹೇಳಿದ್ದಾರೆ. ಆದರೆ ‘ಭಜರಂಗಿ ಭಾಯ್​ ಜಾನ್’ ಸೀಕ್ವೆಲ್ ಅನ್ನು ನಿರ್ದೇಶಿಸುವ ವದಂತಿಗಳ ಬಗ್ಗೆ ಸ್ವತಃ ಕಬೀರ್​ ಖಾನ್​ ಮಾಹಿತಿ ನೀಡಬೇಕಷ್ಟೆ. ಎಲ್ಲವೂ ಅಂದುಕೊಂಡಂತೆ ಆದರೆ 2022 ರಲ್ಲಿ ಸಿನಿಮಾ ತೆರೆಗೆ ಬರಲಿದೆ.