ಅಂತಿಮ ಮತ್ತು ಮೂರನೇ ಟೆಸ್ಟ್​ ಪಂದ್ಯದಲ್ಲಿ ಟೀಮ್​ ಇಂಡಿಯಾ ಸೋಲು ಕಂಡಿದೆ. ಆ ಮೂಲಕ ದಕ್ಷಿಣ ಆಫ್ರಿಕಾ 1-2 ಅಂತರದಲ್ಲಿ ಸರಣಿಯನ್ನು ಗೆದ್ದುಕೊಂಡಿದೆ. ಭಾರತ ನೀಡಿದ್ದ 212 ರನ್​​ಗಳ ಸಾಧಾರಣ ಗುರಿಯನ್ನು ನಿರಾಂತಕವಾಗಿ ಚೇಸ್​ ಮಾಡಿದ ದಕ್ಷಿಣ ಆಫ್ರಿಕಾ, 4ನೇ ದಿನದಾಟದ 2ನೇ ಸೆಷನ್​​​​ನಲ್ಲಿ ಗೆದ್ದು ಬೀಗಿತು.

ಸೌತ್​ ಆಫ್ರಿಕಾದಲ್ಲಿ ಐತಿಹಾಸಿಕ ಟೆಸ್ಟ್​ ಸರಣಿ ಗೆಲ್ಲೋ ಭಾರತದ ಕನಸು ಮತ್ತೆ ಭಗ್ನಗೊಂಡಿದೆ. ಸೆಂಚೂರಿಯನ್​ ಟೆಸ್ಟ್​​​​​ ಗೆದ್ದ ಭಾರತ, ಜೋಹಾನ್ಸ್​​​​ಬರ್ಗ್​​​ನಲ್ಲಿ ಹೀನಾಯ ಸೋಲು ಕಂಡಿತ್ತು. ಇದರಿಂದ ಸರಣಿ ನಿರ್ಣಾಯಕ ರೂಪ ಪಡೆದುಕೊಂಡಿದ್ದ 3ನೇ ಟೆಸ್ಟ್​ನಲ್ಲಿ ಭಾರತ ಮುಗ್ಗರಿಸಿತು. ಪರಿಣಾಮ 2-1ರ ಅಂತರದಲ್ಲಿ ಸೌತ್​ ಆಫ್ರಿಕಾ ಸರಣಿ ಗೆದ್ದು ಬೀಗಿದೆ.

ಟೀಮ್​ ಇಂಡಿಯಾಗೆ ವಿಲನ್ ಆದ​​​​ ಪೀಟರ್​​ಸನ್
2 ವಿಕೆಟ್​ ನಷ್ಟಕ್ಕೆ 101 ರನ್​​​​​ಗಳೊಂದಿಗೆ ದಿನದಾಟ ಆರಂಭಿಸಿದ ದಕ್ಷಿಣ ಆಫ್ರಿಕಾ ಉತ್ತಮ ಆರಂಭ ಪಡೆದುಕೊಂಡಿತು. 3ನೇ ದಿನದಾಟದಲ್ಲೇ ಕಾಡಿದ್ದ ಪೀಟರ್​ಸನ್​, ಭಾರತಕ್ಕೆ 4ನೇ ದಿನ ಕೂಡ ಅಕ್ಷರಶಃ ಕಂಟಕವಾಗಿ ಪರಿಣಮಿಸಿದ್ರು. 48 ರನ್​ ಗಳೊಂದಿಗೆ ದಿನದಾಟ ಆರಂಭಿಸಿದ ಪಿಟರ್​ಸನ್​ ಆರಂಭಿಕ 2 ರನ್​ ಗಳಿಸಿ 2ನೇ ಇನ್ನಿಂಗ್ಸ್​​​ನಲ್ಲಿ ಅರ್ಧಶತಕ ಸಿಡಿಸಿದ್ರು.

ಪಿಟರ್​ಸನ್​​​​-ಡುಸೆನ್​ ಅರ್ಧಶತಕದ ಜೊತೆಯಾಟ, ಕ್ಯಾಚ್​ ಬಿಟ್ಟ ಪೂಜಾರ..!
4ನೇ ದಿನದಾಟದಲ್ಲಿ ಕಣಕ್ಕಿಳಿದ ವಾನ್​​​ ಡರ್​​ ಡುಸೇನ್​ ಕೂಡ ಉತ್ತಮ ಆರಂಭ ಪಡೆದುಕೊಂಡ್ರು. ಕ್ರೀಸ್​ ಕಚ್ಚಿ ನಿಂತು ದಕ್ಷಿಣ ಆಫ್ರಿಕಾವನ್ನ ಗೆಲುವಿನತ್ತ ಕೊಂಡೊಯ್ಯುತ್ತಿದ್ದ ಪೀಟರ್​​​ಸನ್​​ಗೆ ಡುಸೆನ್ ಅದ್ಭುತವಾಗಿ​​ ಸಾತ್​​ ನೀಡಿದ್ರು. ಈ ಜೋಡಿ ಅರ್ಧಶತಕದ ಕಾಣಿಕೆ ನೀಡಿತು. ಪೀಟರ್​ಸನ್ ​59 ರನ್​ ಗಳಿಸಿದ್ದಾಗ ಸ್ಲಿಪ್​​​​ನಲ್ಲಿದ್ದ ಪೂಜಾರ, ಕೈಗೆ ಬಂದ ಕ್ಯಾಚ್​​​​​​​​​ ಕೈ ಚೆಲ್ಲಿದ್ರು. ಇದು ಭಾರತಕ್ಕೆ ಮತ್ತಷ್ಟು ದುಬಾರಿಯಾಯ್ತು.

ಗೆಲುವಿನ ದಡ ಸೇರಿಸಿದ ಟೆಂಬಾ ಬವುಮಾ-ಡುಸೆನ್​
ಜೀವದಾನ ಪಡೆದು ಮತ್ತಷ್ಟು ಕಂಟಕವಾಗಿದ್ದ ಪೀಟರ್​​ಸನ್​, ಕೊನೆಗೂ ಶಾರ್ದೂಲ್​​ಗೆ ವಿಕೆಟ್​ ಒಪ್ಪಿಸಿದ್ರು. ಆದ್ರೆ ಗೆಲುವೆಂಬ ಕನಸು ಭಾರತದ ಕೈಜಾರಿ ಹೋಗಿತ್ತು. ಮೊದಲ ಇನ್ನಿಂಗ್ಸ್​​ನಲ್ಲಿ 73 ರನ್​ ಗಳಿಸಿದ್ದ ಈ ಆಪತ್ಬಾಂಧವ, 2ನೇ ಇನ್ನಿಂಗ್ಸ್​​ನಲ್ಲೂ 82 ರನ್​ಗಳಿಸಿ ಜಯದ ರೂವಾರಿಯಾದ್ರು. ಆ ಬಳಿಕ ಒಂದಾದ ಟೆಂಬಾ ಬವುಮಾ ಮತ್ತು ಡುಸೆನ್​, ಭಾರತದ ಬೌಲರ್​​​​ಗಳನ್ನ ಸಮರ್ಥವಾಗಿ ಎದುರಿಸಿದ್ರು.

ಅಂತಿಮವಾಗಿ 63.3 ಓವರ್​​ಗಳಲ್ಲಿ ಗುರಿ ಬೆನ್ನತ್ತಿದ ಸೌತ್​ ಆಫ್ರಿಕಾ ಗೆಲುವಿನ ಕೇಕೆ ಹಾಕಿತು. 7 ವಿಕೆಟ್​​ಗಳ ಗೆಲುವು ದಾಖಲಿಸಿದ ಸೌತ್​ ಆಫ್ರಿಕಾ 2-1 ಅಂತರದಲ್ಲಿ ಸರಣಿಯನ್ನೋ ಜಯಿಸಿತು. ಭಾರತದ ಐತಿಹಾಸಿಕ ಸರಣಿ ಗೆಲುವು ಮತ್ತೆ ಕನಸಾಗೇ ಉಳಿದುಕೊಳ್ತು.