ಮತ್ತೆ ಕೈಕೊಟ್ಟ ಟೀಂ ಇಂಡಿಯಾ ಓಪನರ್ಸ್; 2ನೇ ದಿನದ ಆಟದ ರೋಚಕ ಕ್ಷಣ ಹೇಗಿತ್ತು..?


ಎರಡನೇ ದಿನದಾಟದಲ್ಲಿ ಟೀಮ್​ ಇಂಡಿಯಾ ಬೌಲರ್​​ಗಳು, ದಕ್ಷಿಣ ಆಫ್ರಿಕಾ ಬ್ಯಾಟರ್​​ಗಳು ದರ್ಬಾರ್​ ನಡೆಸಿದ್ರು. ಆದರೆ 2ನೇ ಇನ್ನಿಂಗ್ಸ್​​​​ನಲ್ಲಿ ತಿರುಗೇಟು ನೀಡಿದ ಸೌತ್​ ಆಫ್ರಿಕಾ ಬೌಲರ್​​​​ಗಳು, ಆರಂಭಿಕರನ್ನ ಬೇಗನೆ ಔಟ್​​ ಮಾಡುವ ಮೂಲಕ ಭಾರತವನ್ನು ಇಕ್ಕಟ್ಟಿಗೆ ಸಿಲುಕಿಸಿದ್ದಾರೆ. ಆದರೆ ಸಂಕಷ್ಟಕ್ಕೆ ಸಿಲುಕಿದ ಪೂಜಾರ-ಕೊಹ್ಲಿ ಆಸರೆಯಾಗಿದ್ದಾರೆ.

ಭಾರತ-ದಕ್ಷಿಣ ಆಫ್ರಿಕಾ ನಡುವಿನ ನಿರ್ಣಾಯಕ ಹಾಗೂ ಅಂತಿಮ ಟೆಸ್ಟ್​​​​ ಪಂದ್ಯ ತೀವ್ರ ಕುತೂಹಲದತ್ತ ಸಾಗಿದೆ. ಸರಣಿ ಗೆಲುವಿಗಾಗಿ ಎರಡು ತಂಡಗಳ ಹೋರಾಟ ರೋಚಕತೆಯತ್ತ ತಿರುಗಿದೆ. ಸದ್ಯ 2ನೇ ದಿನದಾಟದ ಅಂತ್ಯಕ್ಕೆ ಭಾರತ 2 ವಿಕೆಟ್​ ನಷ್ಟಕ್ಕೆ 57 ರನ್​​​ ಗಳಿಸಿದೆ. 70 ರನ್​​​ಗಳ ಮುನ್ನಡೆ ಪಡೆದಿರುವ ಭಾರತ, ದಕ್ಷಿಣ ಆಫ್ರಿಕಾಗೆ ಬೃಹತ್​ ಗುರಿ​​ ನೀಡುವ ಯೋಜನೆ ಹಾಕಿಕೊಂಡಿದೆ.

ಬೂಮ್ರಾಗೆ ಮಾರ್ಕರಮ್​, ಉಮೇಶ್​​​ಗೆ ಕೇಶವ್​​​​​​​ ಕ್ಲೀನ್​​ಬೌಲ್ಡ್​
1 ವಿಕೆಟ್​ ನಷ್ಟಕ್ಕೆ 17 ರನ್​​​ಗಳೊಂದಿಗೆ 2ನೇ ದಿನದಾಟ ಆರಂಭಿಸಿದ ದಕ್ಷಿಣ ಆಫ್ರಿಕಾ ಆರಂಭದಲ್ಲೇ ಎಡವಿತು. ಮೊದಲ ದಿನದಾಟದಲ್ಲೇ ಆರಂಭಿಕ ಆಘಾತ ನೀಡಿದ್ದ ಜಸ್ಪ್ರಿತ್​​ ಬೂಮ್ರಾ, 2ನೇ ದಿನದಾಟದ ಆರಂಭದಲ್ಲಿ ಮತ್ತೆ ಕಾಡಿದರು. ದಿನದಾಟದ 2ನೇ ಎಸೆತದಲ್ಲೇ ಬೂಮ್ರಾ ಬ್ಯೂಟಿಗೆ ಆ್ಯಡಂ ಮಾರ್ಕರಮ್​, ಬೌಲ್ಡ್​ ಆದರು. 25 ರನ್​​ ಗಳಿಸಿ ಭರವಸೆಯ ಇನ್ನಿಂಗ್ಸ್​​ ಕಟ್ಟುತ್ತಿದ್ದ ಕೇಶವ್​​​ ಮಹಾರಾಜ್​​​​ಗೆ ಉಮೇಶ್​​​​ ಯಾದವ್​​, ಕ್ಲೀನ್​ ​ಬೌಲ್ಡ್​ ಮಾಡಿ ಗೇಟ್​​​ಪಾಸ್​​​​ ನೀಡಿದರು.

ವಾನ್​ ಡರ್​ ಡುಸೆನ್​​ಗೆ ಶಾಕ್​ ಕೊಟ್ಟ ಉಮೇಶ್​​ ಯಾದವ್
ಮಹಾರಾಜ್​ ಬಳಿಕ ವಾನ್​​ ಡರ್​ ಡುಸೆನ್​​​ ಮತ್ತು ಕೀಗನ್​ ಪೀಟರ್​​ಸನ್​​, ಮೊದಲ ಸೆಷನ್​ ಅಂತ್ಯಕ್ಕೂ ಮುನ್ನ 4ನೇ ವಿಕೆಟ್​​​​​​ಗೆ 50 ರನ್​​ಗಳ ಜೊತೆಯಾಟವಾಡಿದರು. ಆದ್ರೆ ಭೋಜನ ವಿರಾಮದ ಬಳಿಕ ದಾಳಿ ನಡೆಸಿದ ಉಮೇಶ್​​​, ಅಪಾಯಕಾರಿ ಜೊತೆಯಾಟವನ್ನು ಮುರಿದರು. ಇದರ ಬೆನ್ನಲ್ಲೇ ತಾಳ್ಮೆಯುತ ಬ್ಯಾಟಿಂಗ್​ ನಡೆಸಿದ ಪೀಟರ್ಸನ್​​​, ಸತತ 2ನೇ ಅರ್ಧಶತಕ ಸಿಡಿಸಿ ತಂಡಕ್ಕೆ ಆಧಾರವಾದರು.

ಡಬಲ್​ ಶಾಕ್​ ಕೊಟ್ಟ ಶಮಿ, ಜಾನ್ಸನ್​​​ ಬೂಮ್ರಾ ವಿಲನ್
ಒಂದೆಡೆ ವಿಕೆಟ್​ ಉರುಳುತ್ತಿದ್ದರೂ, ಪೀಟರ್​​ಸನ್​ ಮಾತ್ರ ಭಾರತದ ಬೌಲರ್​​​​​ಗಳಿಗೆ ಬಿಟ್ಟೂ ಬಿಡದೆ ಕಾಡ್ತಿದ್ರೆ, 2ನೇ ಸೆಷನ್​ ಅಂತ್ಯಕ್ಕೂ ಮುನ್ನ ಹರಿಣಗಳ ಪಾಲಿಗೆ ಡಬಲ್​ ಶಾಕ್​ ನೀಡಿದ ಮೊಹಮ್ಮದ್​ ಶಮಿ ವಿಲನ್​​ ಆದ್ರು. ಒಂದೇ ಓವರ್​​​​ನಲ್ಲಿ ಟೆಂಬಾ ಬವುಮಾ, ಕೈಲ್ ವೆರಿನ್​ರನ್ನ ಶಮಿ ಔಟ್​ ಮಾಡಿದ್ರೆ, ಮಾರ್ಕೋ ಜಾನ್ಸನ್​​​​​​​​​​ಗೆ ಬೂಮ್ರಾ ಶಾಕ್​ ನೀಡಿದ್ರು.

ಸೌತ್​ ಆಫ್ರಿಕಾ 209ಕ್ಕೆ ಪತನ, ಭಾರತಕ್ಕೆ ಅಲ್ಪ ಮುನ್ನಡೆ
ಇನ್ನು ಭಾರತದ ಬೌಲರ್​​ಗಳು ಕೊನೆ ಸೆಷನ್​​​​ನಲ್ಲಿ ದರ್ಬಾರ್​​​ ನಡೆಸಿದ್ರು. ಕ್ರೀಸ್​​​ಗೆ​​​ ಬಂದಾಗಿನಿಂದ ಭಾರತಕ್ಕೆ ತಲೆನೋವಾಗಿದ್ದ ಪೀಟರ್ಸನ್ ಅವರ​ ಸುದೀರ್ಘ ಹೋರಾಟ, 3ನೇ ಸೆಷನ್​ ಆರಂಭದಲ್ಲೇ ಕೊನೆಗೊಂಡಿತು. ಇದರ ಬೆನ್ನಲ್ಲೇ ರಬಾಡ, ಲುಂಗಿ ಎನ್​ಗಿಡಿ ಕೂಡ ಔಟಾದ್ರು. ಪರಿಣಾಮ 209ಕ್ಕೆ ಸರ್ವಪತನ ಕಂಡಿತು. ಆದ್ರೆ ಭಾರತ 13 ರನ್​​ಗಳ ಅಲ್ಪ ಮುನ್ನಡೆ ಪಡೆದುಕೊಳ್ತು. ಬೂಮ್ರಾ 5, ಶಮಿ, ಉಮೇಶ್​​​ ತಲಾ 2 ವಿಕೆಟ್​​ ಪಡೆದ್ರು.

ಮತ್ತೆ ಕೈಕೊಟ್ಟ ಆರಂಭಿಕರು, ಸಂಕಷ್ಟದಲ್ಲಿ ಭಾರತ..!
13 ರನ್​​​ಗಳ ಅಲ್ಪ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್​ ಶುರು ಮಾಡಿದ ಭಾರತದ ಆರಂಭಿಕರು ಎರಡನೇ ಇನ್ನಿಂಗ್ಸ್​​​ನಲ್ಲೂ ಕೈಕೊಟ್ಟರು. ಮಯಾಂಕ್​ ಅಗರ್ವಾಲ್​​ 7 ರನ್​​​​​​ KL ರಾಹುಲ್​ 10 ರನ್​ ಗಳಿಸಿ ವಿಕೆಟ್​​ ಒಪ್ಪಿಸಿ ತಂಡವನ್ನು ಸಂಕಷ್ಟಕ್ಕೆ ಸಿಲುಕಿಸಿದ್ರು. ಆದರೆ ಇಕ್ಕಟ್ಟಿಗೆ ಸಿಲುಕಿದ ತಂಡಕ್ಕೆ ಕೊಹ್ಲಿ ಮತ್ತು ಪೂಜಾರ ನೆರವಾಗಿದ್ದು, ಉತ್ತಮ ಮೊತ್ತದತ್ತ ಸಾಗುವ ನಿರೀಕ್ಷೆ ಮೂಡಿಸಿದ್ದಾರೆ. ಆದರಿಂದು ಆಫ್ರಿಕಾ ಬೌಲರ್​ಗಳ ದಾಳಿಯನ್ನು ಈ ಇಬ್ಬರು ಮೆಟ್ಟಿನಿಲ್ತಾರಾ ಅನ್ನೋದನ್ನ ಕಾದುನೋಡಬೇಕು.

News First Live Kannada


Leave a Reply

Your email address will not be published. Required fields are marked *