ಸಿಕ್ಕ ಚೊಚ್ಚಲ ಅವಕಾಶದಲ್ಲೇ ಶ್ರೇಯಸ್​ ಅಯ್ಯರ್​ ಭರ್ಜರಿ ಶತಕ ಸಿಡಿಸಿದ್ದು, ಟೀಮ್​ ಇಂಡಿಯಾ ಪಾಳಯದಲ್ಲಿ ಹೊಸ ಭರವಸೆ ಮೂಡಿಸಿದೆ. ಅದರ ಜೊತೆಗೆ ಇದೇ ಸೆಂಚುರಿ ಇನ್ನಿಂಗ್ಸ್​​ ಮುಂದಿನ ಪಂದ್ಯ ಪ್ಲೇಯಿಂಗ್​ ಇಲೆವೆನ್​ ಸ್ಥಾನದ ಬಗ್ಗೆಯೂ ಹೊಸ ಚರ್ಚೆ ಹುಟ್ಟು ಹಾಕಿದೆ.

ನ್ಯೂಜಿಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯ ಮೊದಲ ಪಂದ್ಯ ಆರಂಭಕ್ಕೂ ಮುನ್ನ ಅನಾನುಭವಿಗಳ ತಂಡ ಎಂಬ ಹಣೆಪಟ್ಟಿ ಟೀಮ್​ ಇಂಡಿಯಾಗೆ ಅಂಟಿತ್ತು. ಆದ್ರೆ, ಪಂದ್ಯದಲ್ಲಿ ಅನುಭವಿಗಳು ಜವಾಬ್ದಾರಿ ಮರೆತರೂ ಅನಾನುಭವಿ ಆಟಗಾರರು ಪ್ರಾಮಿಸಿಂಗ್​ ಆಟವಾಡಿದ್ದಾರೆ. ಅದರಲ್ಲೂ ಮುಖ್ಯವಾಗಿ ತಂಡ ಅಲ್ಪ ಮೊತ್ತಕ್ಕೆ ಕುಸಿಯೋ ಬೀತಿಯಲ್ಲಿದ್ದಾಗ, ಆಸರೆಯಾಗಿದ್ದು ಚೊಚ್ಚಲ ಪಂದ್ಯವನ್ನಾಡಿದ ಶ್ರೇಯಸ್​ ಅಯ್ಯರ್​.

ಅನುಭವಿಗಳೇ ಕಿವೀಸ್​​ ಬೌಲರ್​ಗಳಿಗೆ ಸುಲಭದ ತುತ್ತಾದಾಗ, ಡೆಬ್ಯೂ ಮ್ಯಾಚ್​​ನಲ್ಲೇ ಶ್ರೇಯಸ್​​ ಅಯ್ಯರ್​ ದಿಟ್ಟ ಹೋರಾಟ ನಡೆಸಿದ್ರು. ಇಷ್ಟೇ ಅಲ್ಲ.. ಶತಕ ಇನ್ನಿಂಗ್ಸ್​ ಕಟ್ಟಿ ತಂಡ ಗೌರವಯುತ ಮೊತ್ತ ಕಲೆ ಹಾಕುವಲ್ಲಿಯೂ ನೆರವಾಗಿದ್ದಾರೆ. ಹಾಗಿದ್ರೂ ಮುಂದಿನ 2ನೇ ಟೆಸ್ಟ್​ನಲ್ಲಿ ಶ್ರೇಯಸ್​ಗೆ ಪ್ಲೇಯಿಂಗ್​ ಇಲೆವೆನ್​ ಸ್ಥಾನ ಅನುಮಾನವಾಗಿದೆ. ಅದಕ್ಕೆ ಕಾರಣ ಖಾಯಂ ನಾಯಕ ವಿರಾಟ್​ ಕೊಹ್ಲಿಯ ಕಮ್​ಬ್ಯಾಕ್​.

ಶತಕ ಸಿಡಿಸಿದ ಅಯ್ಯರ್​​ ಸ್ಥಾನ ಅಭದ್ರ..!
ವಿರಾಟ್​​ ಕೊಹ್ಲಿ ಅಲಭ್ಯರಾದ ಕಾರಣಕ್ಕೆ ಶ್ರೇಯಸ್​​ ಅಯ್ಯರ್​ಗೆ ತಂಡದಲ್ಲಿ ಸ್ಥಾನ ಕಲ್ಪಿಸಲಾಗಿತ್ತು. ಆ ಅವಕಾಶವನ್ನ ಎರಡೂ ಕೈಗಳಲ್ಲಿ ಬಾಚಿಕೊಂಡಿರುವ ಅಯ್ಯರ್​ ಶತಕ ಸಿಡಿಸಿ ಹೊಸ ಭರವಸೆಯನ್ನೂ ಮೂಡಿಸಿದ್ದಾರೆ. ಹಾಗಿದ್ರೂ, ಮುಂದಿನ ಪಂದ್ಯದಲ್ಲಿ ಮುಂಬೈಕರ್​, ಕೊಹ್ಲಿ ಸ್ಥಾನ ಬಿಟ್ಟು ಕೊಡಬೇಕಾದ ಅನಿವಾರ್ಯತೆಯಲ್ಲಿದ್ದಾರೆ. ಅಮೋಘ ಫಾರ್ಮ್​ನಲ್ಲಿದ್ರೂ ಸ್ಥಾನ ಕೈ ತಪ್ಪುತ್ತಾ ಅನ್ನೋದು ನಿಮ್ಮ ಪ್ರಶ್ನೆ ಆಗಿರಬಹುದು. ಇದಕ್ಕೆ ಸ್ವತಃ ಮಾಜಿ ಕ್ರಿಕೆಟಿಗ ವಿವಿಎಸ್​​ ಲಕ್ಷ್ಮಣ್ ತಮ್ಮ ಅಭಿಪ್ರಾಯ ತಿಳಿಸಿದ್ದಾರೆ ನೀವೇ ಕೇಳಿ.

‘ಭಾರತೀಯ ಕ್ರಿಕೆಟ್​ನ ಅಲಿಖಿತ ನಿಯಮ’
‘ಭಾರತೀಯ ಕ್ರಿಕೆಟ್​​ನಲ್ಲಿ ಒಂದು ಅಲಿಖಿತ ನಿಯಮವಿದೆ. ನಾವು ಈ ಹಿಂದೆ ಕರುಣ್​ ನಾಯರ್​ ತ್ರಿಶತಕ ಹೊಡೆದ ಸಂದರ್ಭದಲ್ಲಿ ನೋಡಿದ್ದೇವೆ. ಯಾವಾಗ ಅಜಿಂಕ್ಯಾ ರಹಾನೆ ತಂಡಕ್ಕೆ ವಾಪಾಸ್ಸಾದ್ರೋ ಕರುಣ್​ ನಾಯರ್​ ಸ್ಥಾನದಿಂದ ವಂಚಿತರಾದರು. ಇದೀಗ ಮತ್ತದೆ ಮರುಕಳಿಸುವ ಸಾಧ್ಯತೆಯಿದೆ. ಅಯ್ಯರ್​​ ಆಡಿದ್ದು, ಕೊಹ್ಲಿ ಅಲಭ್ಯರಾಗಿದ್ದರು ಅನ್ನೋ ಕಾರಣಕ್ಕೆ’
ವಿವಿಎಸ್​​ ಲಕ್ಷ್ಮಣ್​, ಮಾಜಿ ಕ್ರಿಕೆಟಿಗ

2016ರ ಇಂಡೋ-ಇಂಗ್ಲೆಂಡ್​​ ನಡುವಿನ ಟೆಸ್ಟ್​ ಸರಣಿಯ 5ನೇ ಪಂದ್ಯದಲ್ಲಿ ಕನ್ನಡಿಗ ಕರುಣ್​ ನಾಯರ್​​ ದಾಖಲೆ ಬರೆದಿದ್ರು. ಚೆನ್ನೈ ಅಂಗಳದಲ್ಲಿ ಅಮೋಘ ಇನ್ನಿಂಗ್ಸ್​ ಕಟ್ಟಿದ್ದ ಕನ್ನಡಿಗ ತ್ರಿಶತಕ ಸಿಡಿಸಿದ್ರು. ಆ ಇನ್ನಿಂಗ್ಸ್​ನ ಬಳಿಕ ರಹಾನೆ ಅಲಭ್ಯತೆಯಿಂದಾಗಿ ಆಸ್ಟ್ರೇಲಿಯಾ ವಿರುದ್ಧದ 3 ಪಂದ್ಯಗಳ ಸರಣಿಯಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ರು. ಆದ್ರೆ, ಯಾವಾಗ ರಹಾನೆ ವಾಪಾಸ್ಸಾದ್ರೋ, ಕರುಣ್​ ಸ್ಥಾನ ವಂಚಿತರಾದ್ರು. ಇನ್​ಫ್ಯಾಕ್ಟ್​ ಈವರೆಗೂ ತಂಡಕ್ಕೆ ಕಮ್​ಬ್ಯಾಕ್​ ಮಾಡೋ ಅವಕಾಶವೇ ಸಿಕ್ಕಿಲ್ಲ. ಇದೇ ಅಯ್ಯರ್​ ವಿಚಾರದಲ್ಲಿ ಮತ್ತೆ ಮರುಕಳಿಸಲಿದೆ ಅನ್ನೋದು ಸದ್ಯ ಕ್ರಿಕೆಟ್​ ಲೋಕದಲ್ಲಿರೋ ಟಾಕ್​ ಆಗಿದೆ.