ಅಪ್ಪು ನಮ್ಮನ್ನೆಲ್ಲ ಅಗಲಿ ತಿಂಗಳಾಗುತ್ತಾ ಬಂದ್ರು, ಅವರ ನೆನಪೂ ಮಾತ್ರ ನಮ್ಮಿಂದ ದೂರಾಗ್ತಿಲ್ಲ. ಪುನೀತ್​ ಅವರ ಜೊತೆ 14 ಸಿನಿಮಾಗಳಲ್ಲಿ ಫೈಟ್​ ಮಾಸ್ಟರ್​ ಆಗಿ ಕೆಲಸ ಮಾಡಿದ ಸ್ಯಾಂಡಲ್​ವುಡ್​ ಸ್ಟಂಟ್​ ಮಾಸ್ಟರ್​ ರವಿವರ್ಮ ಅಪ್ಪು ನೆನಪಿನ ಬುತ್ತಿ ಬಿಚ್ಚಿಟ್ಟು ಭಾವುಕರಾಗಿದ್ದಾರೆ.

ಅಪ್ಪು ಇನ್ನಿಲ್ಲದ ಸುದ್ದಿ ಕೇಳಿದಾಗ ನನಗೆ ನಂಬಲು ಆಗಲಿಲ್ಲ. ನನ್ನ ಸ್ನೇಹಿತರೊಬ್ಬರು ವಿಕ್ರಂ ಆಸ್ಪತ್ರೆಯಲ್ಲಿ ವೈದ್ಯರಾಗಿದ್ದಾರೆ ಅವರಿಗೆ ದಿಢೀರ್​ನೆ ಕಾಲ್​ ಮಾಡಿ ಕೇಳಿದೆ ಏನಿದು ಅಪ್ಪು ಸರ್​ ಬಗ್ಗೆ ನ್ಯೂಸ್​ ಅಂತ. ಅವರು ಕೂಡ ಅದನ್ನೇ ಹೇಳಿದಾಗ ನನಗೆ ಅರಗಿಸಿಕೊಳ್ಳಲಾಗಿಲ್ಲ ಆಗ ಅವರಿಗೆ ಬಾಯಿಗೆ ಬಂದ ಹಾಗೇ ಬೈಯ್ದಿದ್ದಿನಿ. ಆದರೆ ಅವರು ನಮ್ಮ ಜೊತೆ ಇಲ್ದೇ ಇರಬಹುದು ನಮ್ಮ ಪ್ರತಿ ಕೆಲಸದಲ್ಲಿ ಅವರಿದ್ದಾರೆ ಎಂದು ರವಿವರ್ಮಾ ಹೇಳಿದರು.

ಅಪ್ಪು ಬಹುತೇಕ ಸಿನಿಮಾಗಳಿಗೆ ನಾನೇ ಸ್ಟಂಟ್​ ಕಂಪೋಸ್​ ಮಾಡಿದ್ದೀನಿ ‘ಲಕ್ಕಿ ಮ್ಯಾನ್’​ ಸಿನಿಮಾದಲ್ಲೂ ಅಪ್ಪು ಸ್ಟಂಟ್ಸ್​ ಜೋರಾಗಿಯೇ ಇದೆ. ಲಕ್ಕಿ ಮ್ಯಾನ್​ ಸಿನಿಮಾದಲ್ಲಿ ಅಪ್ಪು ದೇವರ ಪಾತ್ರ ಮಾಡಿದ್ದಾರೆ. ಆ ದೃಶ್ಯಗಳಲ್ಲಿ ದೇವರನ್ನು ಹೇಗೆ ತೋರಿಸಬಹುದು ಎಂಬ ಅವಕಾಶ ನನಗೊದಿಗಿತ್ತು. ಅವರು ಕೇವಲ ಸಿನಿಮಾ ವಿಚಾರವಾಗಿಯೇ ಯಾವತ್ತು ಮಾತನಾಡುತ್ತಿದ್ದರು. ನಾನು ಬಾಲಿವುಡ್​ ಸಿನಿಮಾಗಳಲ್ಲಿ ಕೆಲಸ ಮಾಡಿರೋದ್ರಿಂದ ಅಲ್ಲಿ ಹೇಗೆ ಕೆಲಸ ನಡೀತಿತ್ತು? ಯಾವ ಹೊಸ ತಂತ್ರಜ್ಞಾನವನ್ನು ಬಳಕೆ ಮಾಡಲಾಗುತ್ತಿತ್ತು? ಹೀಗೆ ಬರೀ ಸಿನಿಮಾ ವಿಚಾರವಾಗಿಯೇ ಮಾತನಾಡುತ್ತಿದ್ದ ಅವರು ಇಂದಿಗೆ ನಮ್ಮೊಂದಿಗಿಲ್ಲ ಎನ್ನುವುದನ್ನ ಅರಗಿಸಿಕೊಳ್ಳಲಾಗುತ್ತಿಲ್ಲ ಎಂದು ರವಿವರ್ಮಾ ಭಾವುಕರಾದರು..