ತಿರುವನಂತಪುರಂ: ಯುವತಿಯೊಬ್ಬರು, ಕೊರೊನಾ ಸೋಂಕಿತ ವರನನ್ನು ಕೋವಿಡ್​ ವಾರ್ಡ್​​​ನಲ್ಲೇ ಮದುವೆಯಾಗಿರುವ ಘಟನೆ ಕೇರಳದಲ್ಲಿ ನಡೆದಿದೆ.

ಕೇರಳದ ಆಲಪ್ಪುಳ ಜಿಲ್ಲೆಯ ವಂದನಂ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ವಿಶೇಷ ಮದುವೆ ನಡೆದಿದೆ. ಕೈನಕಾರಿ ನಿವಾಸಿ ಶರತ್​​​ ಹಾಗೂ ತೆಕ್ಕಾನಾರ್ಯಡ್ ನಿವಾಸಿಯಾಗಿರುವ ಅಭಿರಾಮಿ ಅವರು ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಅಂದಹಾಗೇ ಕಳೆದ ವರ್ಷ ಎರಡೂ ಕುಟುಂಬಗಳ ಹಿರಿಯರು ವಿವಾಹ ನಿಶ್ಚಯ ಮಾಡಿದ್ದರು. ಆದರೆ ಕೊರೊನಾ ಕಾರಣದಿಂದ ವಿವಾಹ ಕಾರ್ಯಕ್ರಮವನ್ನು ಮುಂದೂಡಲಾಗಿತ್ತು. ಈ ನಡುವೆ ಸೋಂಕಿನ ಪ್ರಮಾಣ ಇಳಿಕೆಯಾದ ಹಿನ್ನೆಲೆಯಲ್ಲಿ ಮತ್ತೆ ಮದುವೆ ದಿನಾಂಕ ನಿಶ್ಚಯ ಮಾಡಿದ್ದ ಕುಟುಂಬಸ್ಥರು ಅಗತ್ಯ ಸಿದ್ಧತೆಗಳನ್ನು ಮಾಡಿಕೊಂಡಿದ್ದರು.

ಆದರೆ ಏಪ್ರಿಲ್​ 25ರಂದು ಶರತ್​ ಹಾಗೂ ಅವರ ತಾಯಿಗೆ ಕೊರೊನಾ ಪಾಸಿಟಿವ್ ದೃಢವಾದ ಹಿನ್ನೆಲೆಯಲ್ಲಿ ಇಬ್ಬರೂ ಆಸ್ಪತ್ರೆಗೆ ದಾಖಲಾಗಿದ್ದರು. ಈ ನಡುವೆ ಚರ್ಚೆ ನಡೆಸಿದ ಎರಡು ಕುಟುಂಬಗಳು ನಿಶ್ಚಿಯ ಮಾಡಿದ ಸಮಯಕ್ಕೆ ಮದುವೆ ಕಾರ್ಯಕ್ರಮ ನಡೆಸುವ ನಿರ್ಧಾರ ಮಾಡಿದ್ದರು. ಅದರಂತೆ ಜಿಲ್ಲಾಧಿಕಾರಿಗಳಿಂದ ಆಸ್ಪತ್ರೆಯಲ್ಲಿ ಕಾರ್ಯಕ್ರಮ ನಡೆಸಲು ಅನುಮತಿ ಪಡೆದು ಮದುವೆ ಪೂರ್ಣಗೊಳಿಸಿದ್ದಾರೆ. ಪಿಪಿಇ ಕಿಟ್​ ಧರಿಸಿ ಆಗಮಿಸಿದ್ದ ವಧು ಕೊರೊನಾ ಸೋಂಕಿನಿಂದ ಚಿಕಿತ್ಸೆ ಪಡೆಯುತ್ತಿದ್ದ ಶರತ್​​ ಅವರೊಂದಿಗೆ ಹಸೆಮಣೆ ಏರಿದ್ದಾರೆ.

The post ವರನಿಗೆ ಕೊರೊನಾ: ಕೋವಿಡ್ ವಾರ್ಡ್​​ನಲ್ಲೇ ಮದುವೆಯಾದ ಜೋಡಿ appeared first on News First Kannada.

Source: News First Kannada
Read More