ಕೊರೊನಾ ಮಾರಿ ದೇಶದಲ್ಲಿ ಸದ್ದಿಲ್ಲದೆ ತನ್ನ ಆರ್ಭಟವನ್ನ ಶುರು ಮಾಡಿಕೊಂಡಿದ್ದು ಸಾಕಷ್ಟು ಆತಂಕ ಸೃಷ್ಟಿಸಿದೆ. ಈ ನಡುವೆ ಈ ಸೋಂಕನ್ನು ಆದಷ್ಟು ಬೇಗ ನಿಯಂತ್ರಣ ಮಾಡಬೇಕೆಂದು ಪಣ ತೊಟ್ಟಿರುವ ಸರ್ಕಾರ ಈಗಾಗಲೇ ಡಬಲ್​ ಡೋಸ್​ ಲಸಿಕೆ ಪಡೆದವರಿಗೆ ಬೂಸ್ಟ್​ರ್​ ಡೋಸ್​ ನೀಡಲು ಆರಂಭಿಸಿದೆ.

ಇಷ್ಟೆಲ್ಲಾ ಸರ್ಕಸ್​ಗಳು ನಡೆಯುತ್ತಿದ್ದರು ಕೆಲವೊಂದು ಭಾಗಗಳಲ್ಲಿ ಕೋವಿಡ್​ ಲಸಿಕೆ ಕುರಿತು ಸಾಕಷ್ಟು ಹಿಂಜರಿಕೆಗಳಿವೆ. ಲಸಿಕೆ ಅಂದ್ರೆ ಸಾಕು ಮಾರುದ್ಧ ದೂರ ಓಡಿಹೋಗುತ್ತಿದ್ದಾರೆ. ಇಂತಹ ಸಂದರ್ಭದಲ್ಲಿ ಪುತ್ರನೊಬ್ಬ ತಂದೆಗೆ ಲಸಿಕೆ ಕೊಡಿಸಲು ತನ್ನ ಬೆನ್ನ ಮೇಲೆ ಹೊತ್ತು ಬರೋಬ್ಬರಿ ಆರು ಗಂಟೆ ನಡೆದಿದ್ದಾನೆ.

ಹೌದು..ವ್ಯಾಕ್ಸಿನ್​ ಕೊಡಿಸಲು ತಂದೆಯನ್ನು 6 ಗಂಟೆಗಳ ಕಾಲ ಬೆನ್ನಿನ ಮೇಲೆ ಮಗನೊಬ್ಬ ಹೊತ್ತೊಯ್ದ ಘಟನೆ ಬ್ರೆಜಿಲ್​ನ ಅಮೆಜಾನ್​ ಪ್ರದೇಶದಲ್ಲಿ ನಡೆದಿದೆ. 60 ವಯಸ್ಸಿನ ತಂದ ಮೂತ್ರಕೋಶ ಸಮಸ್ಯೆಯಿಂದ ಬಳಲುತ್ತಿದ್ದು ನಡೆದಾಡಲಿ ಅಶಕ್ತರಾಗಿದ್ದಾರೆ. ಇನ್ನು ಅವರು ವಾಸಿಸುವ ಪ್ರದೇಶದಲ್ಲಿ ವಾಹನ ಸೌಕರ್ಯಗಳಿಲ್ಲ ಹೀಗಾಗಿ ವ್ಯಾಕ್ಸಿನ್​ ಕೇಂದ್ರಕ್ಕೆ ತಮ್ಮ ತಂದೆಯಯನ್ನು ಹೊತ್ತು ತಂದಿದ್ದಾರೆ. ವ್ಯಾಕ್ಸಿನ್​ ಹಾಕಿಸಿದ ಬಳಿಕ ಮತ್ತೇ ಅವರನ್ನು ಹೊತ್ತು ವಾಪಸ್ಸಾಗಿ ಆಧುನಿಕ ಶ್ರವಣಕುಮಾರನ್ನು ನೆನಪಿಸಿದ್ದಾರೆ.

ಈ ಅಪರೂಪದ ಫೋಟೋವನ್ನು ಎರಿಕ್​ ಜಿನ್ನಿಂಗ್​ ಎಂಬುವವರು ತಮ್ಮ ಇನ್ಸ್​ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಡಿದ್ದು ಇದನ್ನ ಕಂಡ ನೆಟ್ಟಿಗರು ಮಗನ ಕಾರ್ಯಕ್ಕೆ ಭೇಷ್​ ಎಂದಿದ್ದಾರೆ. ಇನ್ನು ಕೆಲವರು ನೀವು ಆಧುನಿಕ ಶ್ರವಣಕುಮಾರನೇ ಬಿಡಿ ಎಂದಿದ್ದಾರೆ.