ಶೆಲ್ಫಿಗೇರುವ ಮುನ್ನ: ‘ಬಿದಿರು ನೀನ್ಯಾರಿಗಲ್ಲದವಳು’ ಮೋಟಮ್ಮನವರ ಆತ್ಮಕಥನ ಜೂನ್ 11ರಂದು ಬಿಡುಗಡೆ | Shelfigeruva Munna excerpt of Motamma Bidiru Ninyarigalladavalu Narrated by Veeranna Kammar


Motamma : ‘ನಾನ್ಯಾರು ಗೊತ್ತಾಯ್ತಾ?’ ಅಂತ ಕೇಳಿದೆ. ಆಕೆ ಗೊತ್ತಿಲ್ಲ ಅಂತಂದಳು. ನನ್ನ ಹೆಸರು ಮೋಟಮ್ಮ, ನಾನು ಎಂಎಲ್‌ಎ. ‘ಹೌದಾ?!’ ಅಂತ ಉದ್ಗಾರ ತೆಗೆದಳು. ಮುಂದೆ ‘ಮದುವೆಗೂ ಮೊದಲೇ ಮನೆಗೆ ಬಂದು ನಮ್ಮ ಮನೆಯನ್ನು ನೋಡಿಕೊಂಡು ಹೋಗಿದ್ದಳು ನಮ್ಮ ಸೊಸೆ’ ಅಂತ ನಮ್ಮ ಅತ್ತೆಯವರು ಹೇಳಿ ತಮಾಷೆ ಮಾಡುತ್ತಿದ್ದರು.

ಶೆಲ್ಫಿಗೇರುವ ಮುನ್ನ | Shelfigeruva Munna : ಮಾಹಿತಿಯ ಪ್ರವಾಹದ ನಡುವೆ ನಮ್ಮನ್ನು ನಾವು ದೃಢವಾಗಿ ನಿಲ್ಲಿಸಿಕೊಂಡು ನಮ್ಮ ಆಸಕ್ತಿಗಳ ಆಳ ತಲುಪಲು, ವಿಚಾರಗಳನ್ನು ಪರಾಮರ್ಶಿಸಿಕೊಳ್ಳಲು ವಿಷಯಾಧಾರಿತ ಅಧ್ಯಯನ ಬೇಕೇಬೇಕು. ಕಾಲಮಾನಕ್ಕೆ ತಕ್ಕಂತೆ ಜ್ಞಾನಸಂಪಾದನೆಗೆ ಈವತ್ತು ಸಾಕಷ್ಟು ಪರ್ಯಾಯ ಮತ್ತು ಕ್ಷಿಪ್ರ ಮಾರ್ಗಗಳಿದ್ದರೂ, ಸವಿಸ್ತಾರದ ಓದಿಗಾಗಿ ಪುಸ್ತಕ ಎಂಬ ಗಂಭೀರ ಮಾಧ್ಯಮವೇ ಅದಕ್ಕೆ ಒತ್ತಾಸೆ. ಈ ಹಿನ್ನೆಲೆಯಲ್ಲಿ ಸಾಕಷ್ಟು ಪುಸ್ತಕಗಳು ಹೊರಬರುತ್ತ ಜ್ಞಾನಾಕಾಂಕ್ಷಿಗಳಿಗೆ ದಾರಿ ತೋರುತ್ತಲೇ ಇರುತ್ತವೆ. ಈಗಿಲ್ಲಿ ಪುಸ್ತಕದಂಗಡಿಗಳಿಗೆ ಹೊರಟುನಿಂತ ಬಂಡಲ್​ನಿಂದ ಒಂದು ಪ್ರತಿಯನ್ನು ಇಲ್ಲಿ ಇಳಿಸಿಕೊಂಡು, ಆಯ್ದ ಭಾಗವನ್ನು ನಿಮ್ಮ ಓದಿಗಾಗಿ ತೆರೆದಿಡಲಾಗಿದೆ. ಗಮನಿಸಿ, ಪ್ರಕಾಶಕರು ಮತ್ತು ಬರಹಗಾರರು ಬಿಡುಗಡೆಗೂ ಮುನ್ನ ಹೊಸ ಪುಸ್ತಕದ ಪ್ರಕಾರ, ಸಾರಾಂಶ, ಮುಖಪುಟ ಮತ್ತು ಮೊಬೈಲ್​ ನಂಬರ್ ಕಳುಹಿಸಬಹುದು. ಇ ಮೇಲ್ : [email protected] 

ಕೃತಿ : ಬಿದಿರು ನೀನ್ಯಾರಿಗಲ್ಲದವಳು (ಪ್ರಸಿದ್ಧ ರಾಜಕಾರಣಿ ಶ್ರೀಮತಿ ಮೋಟಮ್ಮ ಅವರ ಆತ್ಮಕಥನ)
ನಿರೂಪಣೆ : ವೀರಣ್ಣ ಕಮ್ಮಾರ
ಪುಟ : 400
ಬೆಲೆ : ರೂ. 450
ಮುಖಪುಟ ವಿನ್ಯಾಸ: ವೀರನಾರಾಯಣ
ಪ್ರಕಾಶನ : ವಿಕಾಸ ಪ್ರಕಾಶನ, ಬೆಂಗಳೂರು 

*

ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಜೂನ್ 11ರಂದು ಬೆಳಗ್ಗೆ 10ಗಂಟೆಗೆ ಈ ಪುಸ್ತಕವನ್ನು ಎಸ್. ಎಂ. ಕೃಷ್ಣ ಅವರು ಲೋಕಾರ್ಪಣೆ ಮಾಡಲಿದ್ದಾರೆ. 

*

ಆತ್ಮಕಥನವನ್ನು ಎಂದೂ ವಿಮರ್ಶೆಯ ಒರೆಗೆ ಹಚ್ಚಬಾರದು, ಬದುಕಿನಲ್ಲಿ ಘಟಿಸಿದ ಘಟನೆಗಳನ್ನು ಪೋಣಿಸಿದ ಹಾರವಿದು. ಆಯಾ ಸಮಯ ಸಂದರ್ಭಕ್ಕೆ ಅನುಸಾರವಾಗಿ ನೀರಲ್ಲಿ ಸಾಗುವ ನೌಕೆಯಂತೆ ಎಡಬಲಗಳಿಗೆ ವಾಲುತ್ತಾ ಸಾಗುವ ಸಾಧನೆಯ ಪಯಣ. ನೋವು- ನಲಿವು. ಕಷ್ಟ-ಸುಖ, ಹತಾಶೆ- ಆಶಾವಾದಗಳ ಸಂಗಮ ಈ ಬದುಕು. ಕಾಂಗ್ರೆಸ್ ಎಂಬ ಮಹಾಸಮುದ್ರದಲ್ಲಿ ರಾಜಕಾರಣಿಯಾಗಿ ಯಶಸ್ಸು ಗಳಿಸುತ್ತಾರೆ ಎಂದರೆ, ಅವರು ನಿಜಕ್ಕೂ ಅಭಿನಂದನಾರ್ಹರು. ಪಕ್ಷದ ತಳಮಟ್ಟದಿಂದ ಬಂದು ಮಂತ್ರಿಯಾಗಿ, ವಿರೋಧ ಪಕ್ಷದ ನಾಯಕಿಯಾಗಿ ಕಾಂಗ್ರೆಸ್ ಪಕ್ಷದ ಕಾರ್ಯಕಾರಣಿ ಸಮಿತಿಯ ಸದಸ್ಯರಾಗಿ ಪಕ್ಷದ ಎಲ್ಲಾ ಹಿರಿಯರ ಮನಸ್ಸು ಗೆದ್ದ ಗಟ್ಟಿಗಿತ್ತಿ. ನೇರ ನಡೆ ನುಡಿ, ಕೊಟ್ಟ ಕೆಲಸವನ್ನು ಪ್ರಾಮಾಣಿಕವಾಗಿ ನಿರ್ವಹಿಸುವ ಗುಣ, ಸ್ವಾಭಿಮಾನ ಮೋಟಮ್ಮನವರ ಸಂಪತ್ತು. ರಾಜಕೀಯ ಸ್ಥಾನಮಾನಗಳ ಏರಿಳಿತವಾದರೂ ನಂಬಿದ ತತ್ವ-ಸಿದ್ಧಾಂತವನ್ನು ಮರೆಯದ ಪ್ರಬುದ್ಧ ರಾಜಕಾರಣಿ.

ಬಿದಿರು ಒಂದು ದಿನ ಬ್ರಹ್ಮನಿಗೆ ಬೇಸರದಿಂದ ಕೇಳಿತಂತೆ, ಬೇಕಿತ್ತೇ ಈ ನಿನ್ನ ಸೃಷ್ಟಿಯೊಳಗೆ ನನ್ನದೊಂದು ಪಾತ್ರ? ಹೂವಿಲ್ಲ, ಹಣ್ಣಿಲ್ಲ, ದಣಿದು ಬಂದವರಿಗೆ ನೆರಳು ನೀಡಲೂ ಆಗುವುದಿಲ್ಲ. ಬ್ರಹ್ಮ ನುಡಿದನಂತೆ- ‘ಯಾಕೆ ಸಾಧ್ಯವಿಲ್ಲ? ಮನಸ್ಸು ಮಾಡಿ ನೋಡು’, ಬಿದಿರು ಹಠ ಹಿಡಿದು ಬೆಳೆಯಿತಂತೆ. ಕೃಷ್ಣನ ಕೈಯಲ್ಲಿ ಕೊಳಲಾಯಿತು, ಮಕ್ಕಳ ತೂಗುವ ತೊಟ್ಟಿಲಾಯಿತು, ಸುಮಂಗಲಿಯರ ಬಾಗಿನಕ್ಕೆ ಮೊರವಾಯಿತು, ಬಡವರ ಗುಡಿಸಲಿಗೆ ನೆರಳು ನೀಡಲು ಗಳವಾಯಿತು, ಬಿದಿರಿನ ಬುಟ್ಟಿಯಾಯಿತು, ಆರೋಗ್ಯಕ್ಕೆ ಔಷಧಿಯಾಯಿತು, ಮೋಕ್ಷದ ದಾರಿಯಲ್ಲಿಅಂತಿಮ ಯಾತ್ರೆಯಲ್ಲಿ ನೆರವಾಯಿತು. ಬಿದಿರು ಎಲ್ಲರಿಗೂ ಬೇಕಾಯಿತು. ನನ್ನಿಂದ ಆಗದು ಎಂದು ಕೈಚೆಲ್ಲದಿರು. ಮನಸ್ಸು ಮಾಡಿದರೆ ಯಾವ ಸಾಧನೆಯನ್ನೂ ಸಹ ಮಾಡಬಹುದು ಎಂದು ಲೋಕಕ್ಕೆ ಸಾರಿತು. ಹಾಗೆಯೇ ಮೋಟಮ್ಮನವರು ಮಹಿಳೆಯರಿಗೆ ಸ್ಫೂರ್ತಿಯ ಚಿಲುಮೆ, ಭರವಸೆಯ ಬೆಳಕು, ಮಾರ್ಗದರ್ಶಿ.

ಎಸ್. ಎಂ. ಕೃಷ್ಣ ಮಾಜಿ ಮುಖ್ಯಮಂತ್ರಿಗಳು

ನಾನು ರಾಜಕೀಯಕ್ಕೆ ಬಂದಾಗ ಜನರ ಕಷ್ಟಗಳಿಗೆ ಸ್ಪಂದಿಸಬೇಕು, ಅವರ ನ್ಯಾಯವಾದ ಬೇಡಿಕೆಗಳನ್ನು ಪೂರೈಸಬೇಕು ಎಂಬ ಉಮೇದು ಇಟ್ಟುಕೊಂಡಿದ್ದೆ. ಹೀಗಾಗಿ ನಾನು ಭ್ರಷ್ಟಳಾಗಲು ಸಾಧ್ಯವಾಗಲಿಲ್ಲ. ಜನರೊಂದಿಗೆ ಬೆರೆತು, ಅವರ ಸಂಕಷ್ಟಗಳಿಗೆ ಸ್ಪಂದಿಸುತ್ತಾ ಇದ್ದ ಕಾರಣ, ನನಗೆ ಚುನಾವಣೆಯಲ್ಲಿ ಹೆಚ್ಚು ಹಣ ವ್ಯಯ ಮಾಡುವ ಪ್ರಮೇಯವೇ ಬರಲಿಲ್ಲ. ಜನರ ಜೊತೆ ನನಗಿದ್ದ ಒಡನಾಟ, ನಡವಳಿಕೆ, ಅವರ ಬಗ್ಗೆ ಇದ್ದ ಕಳಕಳಿ ಮತ್ತು ಜನರ ಸಾಮಾನ್ಯ ಬೇಡಿಕೆಗಳಾದ ಕುಡಿಯುವ ನೀರು, ರಸ್ತೆ, ಶಾಲೆ, ಅಂಗನವಾಡಿ, ಪ್ರಾಥಮಿಕ ಆರೋಗ್ಯ ಕೇಂದ್ರ, ಹಾಸ್ಟೆಲ್ ಇತ್ಯಾದಿಗಳ ಬಗ್ಗೆ ಹೆಚ್ಚಿನ ಆದ್ಯತೆ ನೀಡಿದ್ದಕ್ಕೆ ಜನರು ಮೂರು ಸಲ ನನ್ನನ್ನು ಆಯ್ಕೆ ಮಾಡಿದರು. ನಾಲ್ಕು ಬಾರಿ ಸೋತುಹೋದದ್ದು ಕೂಡ ಗೆದ್ದಂತೆ ಆಗಿತ್ತು. ನನ್ನನ್ನು ಜನರು ಕೈಬಿಟ್ಟರು ಎಂಬ ಕಾರಣ ಅಲ್ಲ. ಸೋತದ್ದು ಕೂಡ ಬಲು ಕಡಿಮೆ ಅಂತರದಿಂದ.

ಈ ಸೋಲುಗಳಿಗೆ ನಮ್ಮ ಪಕ್ಷದೊಳಗಿದ್ದವರ ಕುತಂತ್ರ, ಕ್ಷೇತ್ರದಲ್ಲಿನ ಒಳಜಗಳ, ಅಸೂಯೆ, ಹಿತಶತ್ರುಗಳ ಕಾಟ, ಚುನಾವಣೆಗಳು ನಡೆದ ಸಂದರ್ಭಗಳು, ಬಿಜೆಪಿ ಪರವಾದ ದತ್ತಪೀಠದ ಅಲೆ- ಹೀಗೆ ಇನ್ನು ಏನೇನೋ ಕಾರಣಗಳನ್ನು ಹೇಳಬಹುದು. ಒಟ್ಟಾರೆಯಾಗಿ ಹೇಳಬೇಕು ಅಂದರೆ, ಜನರ ಆಶೀರ್ವಾದ ಯಾವಾಗಲೂ ನನ್ನ ಮೇಲಿತ್ತು. ಈಗಲೂ ಇದೆ. ಈಗಲೂ ಕ್ಷೇತ್ರದ ಜನರೊಂದಿಗೆ ನಾನು ಒಡನಾಟ ಇಟ್ಟುಕೊಂಡಿದ್ದೇನೆ. ಅವರು ನನ್ನ ಮೇಲೆ ಈಗಲೂ ಅಷ್ಟೇ ಪ್ರೀತಿ, ಅಭಿಮಾನ ಇಟ್ಟುಕೊಂಡಿದ್ದಾರೆ. ಇಂದಿಗೂ ನನ್ನ ಕ್ಷೇತ್ರದ ಜನರು ನನ್ನ ಸೋಲಿಗೆ ನೊಂದುಕೊಳ್ಳುತ್ತಾರೆ.

ಮೋಟಮ್ಮ, ರಾಜಕಾರಣಿ

*

ವಿವಾಹದ ಅನುಬಂಧ 

1 979ರ ಸಮಯ ಇರಬೇಕು. ಆಗ ಒಂದು ದಿನ ವೆಂಕಟರಾಮು ಅವರು ನಮ್ಮ ಶಾಸಕರ ಭವನದ ನನ್ನ ಕೊಠಡಿಗೆ ಬಂದರು. ಕುಳಿತರು. ನನ್ನನ್ನು ಮಾತನಾಡಿಸಿದರು. ನಾನೂ ಕೂಡ ಅವರನ್ನು ಗೌರವದಿಂದ ಮಾತನಾಡಿಸಿದೆ. ಮತ್ತೊಂದು ಸಲ ಬಂದರು. ಆವಾಗಲೂ ಅದೇ ರೀತಿ ‘ಚೆನ್ನಾಗಿದ್ದೀರಾ?’ ಇತ್ಯಾದಿಯಾಗಿ ಮಾತನಾಡಿಸಿದರು. ಮಗದೊಂದು ಸಲ ಬಂದಾಗ ಅವರು, ‘ನಿಮ್ಮನ್ನು ಒಂದು ಮಾತು ಕೇಳಬೇಕು ಅಂತ ಅಂದರು. ಅದಕ್ಕೆ ನಾನು, ‘ಏನು ವಿಚಾರ ಹೇಳಿ ಅಂದೆ. ಅದಕ್ಕವರು, ‘ನಿಮ್ಮ ಫೀಲಿಂಗ್ ಏನು ಅಂತ ಕೇಳೋಣ ಅಂದ್ಕೊಂಡೆ. ನಾವಿಬ್ಬರೂ ಮದುವೆ ಮಾಡಿಕೊಂಡರೆ ಹೆಂಗೆ? ಅಂತ ಕೇಳಬೇಕು ಅಂದ್ಕೊಂಡೆ’ ಅಂತ ಅಂದರು. ನನಗೆ ಒಂಥರಾ ಸರ್‌ಪ್ರೈಸ್ ಅನ್ನಿಸ್ತು. ಇದೇನಪ್ಪಾ ಇದ್ದಕ್ಕಿದ್ದಂಗೇ ಈಗ ಇವರು ಹೀಗೆ ಕೇಳಿದ್ದಾರಲ್ಲ? ಅನ್ನಿಸ್ತು.

ಅದಕ್ಕೆ ನಾನು ಅವರಿಗೆ, ‘ನೋಡಿ, ನನಗೆ ಈಗ ತಕ್ಷಣಕ್ಕೆ ಮದುವೆಯಾಗಲಿಕ್ಕೆ ಇಷ್ಟವಿಲ್ಲ.’ ಅಂದೆ. ‘ಫಸ್ಟ್ ಆಫ್ ಆಲ್, ನನಗೆ ಅಧಿಕಾರ ಇದೆ ಅಂತ ನೀವು ನನ್ನನ್ನು ಮದುವೆಯಾಗಬೇಕು ಅಂತ ಮುಂದೆ ಬಂದಿದ್ದೀರಾ? ಅಥವಾ ನಿಜವಾಗಲೂ ನನ್ನನ್ನು ಇಷ್ಟಪಟ್ಟು, ನನ್ನ ನಡವಳಿಕೆಯನ್ನು ಇಷ್ಟಪಟ್ಟು ನೀವು ಈ ಮಾತು ಹೇಳಿದ್ದೀರಾ ಅಂತ ಗೊತ್ತಿಲ್ಲ. ಈ ಮೊದಲು ನಾನು ಚಿಕ್ಕಮಗಳೂರಿನಲ್ಲಿ ಕೆಲಸದಲ್ಲಿದ್ದಾಗ, ಶಾರದಕ್ಕ ಅವರು ಕೇಳಿದ್ದಾಗ ನೀವು ನನ್ನ ತಾಯಿ, ನನ್ನ ಅಕ್ಕ ಎಲ್ಲರೂ ಒಪ್ಪಿಕೊಬೇಕು’ ಅಂತ ಹೇಳಿದ್ದಿರಿ. ಈಗ ದಿಢೀರ್ ಅಂತ ಹೀಗೆ ಹೇಳುತ್ತಿದ್ದೀರಲ್ಲ? ನಿಮ್ಮ ತಾಯಿ, ನಿಮ್ಮ ಅಕ್ಕ ಎಲ್ಲರೂ ಒಪ್ಪಿಕೊಳ್ಳುತ್ತಾರಾ?’ ಅಂತ ಕೇಳಿದೆ.

‘ಅವರನ್ನೆಲ್ಲ ನಾನು ಒಪ್ಪಿಸುತ್ತೇನೆ. ಅಲ್ಲದೇ, ನಮ್ಮ ತಾಯಿಗೆ ಮಾಡರ್ನ್ ಹುಡುಗಿಯರು ಬೇಕಾಗಿಲ್ಲ. ಗ್ರಾಮೀಣ ಹೆಣ್ಣುಮಕ್ಕಳನ್ನೇ ಅವರು ಇಷ್ಟಪಡುತ್ತಾರೆ. ಹೊಂದಿಕೊಂಡು ಹೋಗುವವರು ಬೇಕು ಅಂತ ಅವರ ಭಾವನೆ ಇದೆ. ಹೀಗಾಗಿ ಅವರು ಒಪ್ಪಿಕೊಳ್ಳಬಹುದು. ನಾನು ಒಪ್ಪಿಸುತ್ತೇನೆ’ ಅಂತ ಹೇಳಿದರು. ಅದಕ್ಕೆ ನಾನು ‘ನೋಡೋಣ’ ಅಂತ ಹೇಳಿದೆ. ಇನ್ನೊಬ್ಬರು ಪುಟ್ಟಸ್ವಾಮಿ ಅವರು ಬಂದರು. ಅವರು ‘ನಾನು ವೆಂಕಟರಾಮು ಅವರ ತಾಯಿಯ ಸ್ವಂತ ತಂಗಿ ಮಗ, ನನಗೆ ಎಲ್ಲಾದರೂ ಕೆಲಸ ಕೊಡಿಸಿ’ ಅಂತ ಹೇಳಿದರು. ಸ್ವಲ್ಪ ದಿನಗಳಲ್ಲೇ ಬಿಡಬ್ಲ್ಯೂಎಸ್‌ಎಸ್‌ಬಿಯಲ್ಲಿ ಜೆಇ (ಜ್ಯೂನಿಯರ್ ಎಂಜಿನಿಯರ್) ಹುದ್ದೆಗಳನ್ನು ತುಂಬಲು ಜಾಹೀರಾತು ಪ್ರಕಟವಾಯಿತು. ಅಲ್ಲಿ ಅವರು ಅರ್ಜಿ ಹಾಕಿದರು. ಅದಕ್ಕೆ ಸಂಬಂಧಪಟ್ಟವರಿಗೆ ಯಾರಿಗೋ ನಾನು ಹೇಳಿದೆ. ಹೀಗಾಗಿ ಆತನಿಗೆ ಟೆಂಪರರಿ ನೌಕರಿಗೆ ಆಯ್ಕೆ ಮಾಡಿದರು. ಆಮೇಲೆ ಖಾಯಂಗೊಳಿಸಿದರು.

ಬಿಡಬ್ಲ್ಯೂಎಸ್ಎಸ್‌ಬಿಯಲ್ಲಿ ಕೆಲಸ ಸಿಕ್ಕಮೇಲೆ ಪುಟ್ಟಸ್ವಾಮಿ ಅವರು ಒಂದು ದಿನ ನನ್ನನ್ನು ಭೇಟಿ ಮಾಡಿ, ‘ನಾನು ಬೇರೆ ಕಡೆ ಮನೆ ಮಾಡಿಕೊಂಡು ಇರುವ ಬದಲಾಗಿ, ಶಾಸಕರ ಭವನದಲ್ಲಿನ ನಿಮ್ಮ ನಿವಾಸದಲ್ಲಿಯೇ ಇರುತ್ತೇನೆ’ ಅಂತ ಹೇಳಿದರು. ಅದಕ್ಕೆ ನಾನು ಆಗಲಿ ಎಂದೆ. ಆತ ಊರಿಗೆ ಹೋಗಿದ್ದಾಗ, ವೆಂಕಟರಾಮು ಅವರ ತಾಯಿಯ ಹತ್ತಿರ ನನ್ನ ಬಗ್ಗೆ ಮಾತನಾಡಿದನಂತೆ. ಜೊತೆಗೆ ಅವರು ಒಳ್ಳೆಯ ಹೆಣ್ಣುಮಗಳು, ಅಣ್ಣಂಗೂ ಇಷ್ಟ ಇದ್ದಂಗಿದೆ. ಇಬ್ಬರದೂ ಒಳ್ಳೆಯ ಜೋಡಿ ಆಗುತ್ತಾರೆ. ನೀವು ಕಣ್ಣುಮುಚ್ಚಿಕೊಂಡು ಅವರಿಬ್ಬರ ಮದುವೆ ಮಾಡಿಬಿಡಿ’ ಅಂತ ಹೇಳಿದನಂತೆ.

Shelfigeruva Munna excerpt of Motamma Bidiru Ninyarigalladavalu Narrated by Veeranna Kammar

ಕೃತಿಯನ್ನು ನಿರೂಪಿಸಿದ ಲೇಖಕ ವೀರಣ್ಣ ಕಮ್ಮಾರ ಮೋಟಮ್ಮನವರೊಂದಿಗೆ

TV9 Kannada


Leave a Reply

Your email address will not be published.