5G Service: ಆಗಸ್ಟ್​ನಿಂದ ಭಾರತದಲ್ಲಿ ಏರ್​ಟೆಲ್ 5G ಸೇವೆ: ಮೊದಲ ಗುತ್ತಿಗೆ ಎರಿಕ್​ಸನ್ ಪಾಲು | 5G services in India Airtel and Reliance Jio to launch 5G Services from this Month itself


20 ವರ್ಷಗಳ ಅವಧಿಗೆ 5ಜಿ ತರಂಗಾತರ ಪಡೆದುಕೊಂಡಿರುವ ಏರ್​ಟೆಲ್ ಈ ಗುತ್ತಿಗೆಗಾಗಿ ₹ 43,084 ಕೋಟಿ ವ್ಯಯಿಸಿದೆ.

5G Service: ಆಗಸ್ಟ್​ನಿಂದ ಭಾರತದಲ್ಲಿ ಏರ್​ಟೆಲ್ 5G ಸೇವೆ: ಮೊದಲ ಗುತ್ತಿಗೆ ಎರಿಕ್​ಸನ್ ಪಾಲು

5ಜಿ ಸೇವೆ (ಪ್ರಾತಿನಿಧಿಕ ಚಿತ್ರ)

ಮುಂಬೈ: 5G ಸೇವೆಗಳನ್ನು ಪಡೆಯಬೇಕು ಎನ್ನುವ ಭಾರತೀಯರ ಸುದೀರ್ಘ ಕನಸು ಈಡೇರುವ ಕ್ಷಣಗಳು ಹತ್ತಿರವಾಗುತ್ತಿವೆ. ಈ ಸಂಬಂಧ ಭಾರ್ತಿ ಏರ್​ಟೆಲ್ (Bharti Airtel) ಮಹತ್ವದ ಮಾಹಿತಿಯೊಂದನ್ನು ಹಂಚಿಕೊಂಡಿದೆ. ತನ್ನ ಮೊದಲ 5G ಗುತ್ತಿಗೆಯನ್ನು ಎರಿಕ್​ಸನ್ (Ericsson) ಕಂಪನಿಗೆ ನೀಡಿದ್ದು, ಇದೇ ತಿಂಗಳಲ್ಲಿ (ಆಗಸ್ಟ್ 2022) ಸೇವೆಗಳನ್ನು ಒದಗಿಸಲಾಗುವುದು ಎಂದು ಹೇಳಿದೆ. ಏರ್​ಟೆಲ್​ನೊಂದಿಗೆ 25 ವರ್ಷಗಳಿಗೂ ಹೆಚ್ಚು ಕಾಲದ ವ್ಯಾಪಾರ ಸಂಬಂಧ ಹೊಂದಿರುವ ಎರಿಕ್​ಸನ್ ಭಾರತದಾದ್ಯಂತ ಕನೆಕ್ಟಿವಿಟಿ ಸೇವೆ ಒದಗಿಸುತ್ತಿದೆ. ಜುಲೈ 26ರಂದು ಅಂತ್ಯಗೊಂಡ 5ಜಿ ತರಂಗಾಂತರ ಹರಾಜಿನ ನಂತರ ಎರಿಕ್​ಸನ್​ಗೆ ಹೊಸ ಗುತ್ತಿಗೆಯನ್ನು ಏರ್​ಟೆಲ್ ನೀಡಿದೆ.

ಎರಿಕ್​ಸನ್ ರೇಡಿಯೊ ಸಿಸ್ಟಮ್ ಮತ್ತು ಎರಿಕ್​ಸನ್ ಮೈಕ್ರೊವೈವ್ ಮೊಬೈಲ್ ಟ್ರಾನ್ಸ್​ಪೋರ್ಟ್​ ಸಲ್ಯೂಷನ್​ನಿಂದ ಪಡೆದುಕೊಂಡ 5ಜಿ ರೇಡಿಯೊ ಅಕ್ಸೆಸ್ ನೆಟ್​ವರ್ಕ್​ (5G Radio Access Network – RAN) ಉತ್ಪನ್ನಗಳನ್ನು ಏರ್​ಟೆಲ್ ಅಳವಡಿಸಲಿದೆ. ಭಾರ್ತಿ ಏರ್​ಟೆಲ್​ನ 12 ಟೆಲಿಕಾಂ ವೃತ್ತಗಳಲ್ಲಿ ಎರಿಕ್​ಸನ್ 5ಜಿ ಸಂಪರ್ಕ ಒದಗಿಸಲಿದೆ. ಅತಿವೇಗದ ಇಂಟರ್ನೆಟ್​ ಕನೆಕ್ಟಿವಿಟಿ, ದೊಡ್ಡಮಟ್ಟದ ಡೇಟಾ ನಿರ್ವಹಣಾ ಸಾಮರ್ಥ್ಯ ಮತ್ತು ವೇಗದ ದತ್ತಾಂಶ ವರ್ಗಾವಣೆ ಸೌಲಭ್ಯವನ್ನು ಈ ಸೇವೆಗಳು ಒದಗಿಸುತ್ತವೆ ಎಂದು ಭಾರ್ತಿ ಏರ್​ಟೆಲ್ ಪ್ರಕಟಣೆಯಲ್ಲಿ ತಿಳಿಸಿದೆ.

TV9 Kannada


Leave a Reply

Your email address will not be published. Required fields are marked *