ಬಾಲಿವುಡ್​ನಲ್ಲಿ ಈಶಾನ್ಯ ರಾಜ್ಯಗಳ ಕಥಾ ವಸ್ತು ಹೊಂದಿರುವ ಚಿತ್ರಗಳು, ಪಾತ್ರಗಳು ಕಡಿಮೆಯೆಂದೇ ಹೇಳಬೇಕು. ಪ್ರಸ್ತುತ ಈ ಆರೋಪದಿಂದ ಮುಕ್ತವಾಗಲು ಬಾಲಿವುಡ್ ಪ್ರಯತ್ನಿಸುತ್ತಿದೆ. ಹೊಸ ಹೊಸ ಪ್ರಯತ್ನಗಳು ನಡೆಯುತ್ತಿವೆ. ಈ ಪೈಕಿ ‘ಅನೇಕ್’ (Anek Movie) ಕೂಡ ಒಂದು. ಅನುಭವ್ ಸಿನ್ಹಾ ನಿರ್ದೇಶನದ ಚಿತ್ರದಲ್ಲಿ ಆಯುಷ್ಮಾನ್ ಖುರಾನಾ (Ayushmann Khurrana) ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದೀಗ ಚಿತ್ರದ ನಾಯಕಿ ಆಂಡ್ರಿಯಾ ಕೆವಿಚುಸಾರನ್ನು (Andrea Kevichusa) ಪರಿಚಯಿಸಲಾಗಿದೆ. ಅವರು ಮೂಲತಃ ನಾಗಾಲ್ಯಾಂಡ್​ನವರು. ಚಿತ್ರದಲ್ಲಿ ಅವರ ಪಾತ್ರ ರಿವೀಲ್ ಆಗುತ್ತಿದ್ದಂತೆ ಬಾಲಿವುಡ್​ನಲ್ಲಿ ಈಶಾನ್ಯ ಭಾರತದ ಭರವಸೆಯ ನಟಿಗೆ ಅದ್ದೂರಿ ಸ್ವಾಗತ ಸಿಕ್ಕಿದೆ. ತಮ್ಮ ಮೊದಲ ಚಿತ್ರದಲ್ಲಿ ಅವರು ‘ಐಡೋ’ ಎಂಬ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಬಾಲಿವುಡ್​​ನಲ್ಲಿ ಈಶಾನ್ಯ ಭಾರತದ ನಟಿಯರಿಗೆ ಅವಕಾಶ ಕಡಿಮೆ ಎಂಬ ಬಗ್ಗೆ ಮೊದಲಿನಿಂದ ದೊಡ್ಡ ಮಟ್ಟದಲ್ಲಿ ಚರ್ಚೆಯ ನಡುವೆ ಇದೀಗ ನಾಗಾಲ್ಯಾಂಡ್​ನ ಆಂಡ್ರಿಯಾ ನಾಯಕಿ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ತಾರೆಯರಿಗೆ ಖುಷಿ ತಂದಿದೆ. ಹೀಗಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಆಂಡ್ರಿಯಾರನ್ನು ಬಾಲಿವುಡ್​ಗೆ ಸ್ವಾಗತಿಸಿ ಪ್ರೀತಿಯಿಂದ ಪೋಸ್ಟ್ ಹಂಚಿಕೊಳ್ಳಲಾಗುತ್ತಿದೆ. ಹಿರಿಯ ನಟಿ ನೀನಾ ಗುಪ್ತಾ ಆಂಡ್ರಿಯಾ ಶ್ವೇತ ವರ್ಣದ ಸೀರೆಯಲ್ಲಿ ಮಿಂಚುತ್ತಿರುವ ಫೋಟೋವೊಂದನ್ನು ಶೇರ್ ಮಾಡಿಕೊಂಡು, ‘‘ಗೆಲ್ಲೋದು ಯಾರು? ಭಾರತ’’ ಎಂದು ಬರೆದುಕೊಂಡಿದ್ದಾರೆ. ಜತೆಗೆ ಶೀರ್ಷಿಕೆಯಲ್ಲಿ ‘‘ಭಾರತದ ಜನರೇ ಆಲಿಸಿ, ‘ಅನೇಕ್​’ ಚಿತ್ರದ “Aido” ನಿಮ್ಮ ಮುಂದೆ. ನಮ್ಮ ಸುಂದರ ನಾಗಾಲ್ಯಾಂಡ್‌ನ ಆಂಡ್ರಿಯಾ ಕೆವಿಚುಸಾ ಅವರನ್ನು ನಿಮಗೆ ಪರಿಚಯಿಸುತ್ತಿದ್ದೇವೆ’’ ಎಂದು ಬರೆದಿದ್ದಾರೆ.

ನೀನಾ ಗುಪ್ತಾ ಪೋಸ್ಟ್:

TV9 Kannada