Hijab Row: ಉಡುಪಿಯ ಪ್ರತಿಭಟನಾನಿರತ ವಿದ್ಯಾರ್ಥಿನಿಯರು ತರಗತಿಯಲ್ಲಿ ಮೊದಲು ಹಿಜಾಬ್ ಧರಿಸುತ್ತಿರಲಿಲ್ಲ; ಸಹಪಾಠಿ ಹೇಳಿಕೆ | Karnataka Hijab Row Udupi College student reveals those protesting students did not wear Hijab at first details inside


Hijab Row: ಉಡುಪಿಯ ಪ್ರತಿಭಟನಾನಿರತ ವಿದ್ಯಾರ್ಥಿನಿಯರು ತರಗತಿಯಲ್ಲಿ ಮೊದಲು ಹಿಜಾಬ್ ಧರಿಸುತ್ತಿರಲಿಲ್ಲ; ಸಹಪಾಠಿ ಹೇಳಿಕೆ

ಹಿಜಾಬ್ ಧರಿಸಿರುವ ವಿದ್ಯಾರ್ಥಿನಿಯರು

ಉಡುಪಿ: ಕಾಲೇಜುಗಳಲ್ಲಿ ಹಿಜಾಬ್ ವರ್ಸಸ್ ಕೇಸರಿ ಫೈಟ್ (Hijab-Kesari Row) ವಿಚಾರಕ್ಕೆ ಸಂಬಂಧಪಟ್ಟಂತೆ ಹಲವಾರು ವಿಚಾರಗಳು ಹೊರಬರುತ್ತಿವೆ. ಈ ಅಂಶಗಳ ಮೂಲಕ ಹಿಜಾಬ್ ವಿವಾದ (Hijab Row) ಉದ್ದೇಶಪೂರ್ವಕವಾಗಿ ಹುಟ್ಟಿಕೊಂಡ ವಿವಾದವೇ ಎನ್ನುವ ಅನುಮಾನ ಮೂಡಿದೆ. ಕಾರಣ, ಧರಣಿ ನಡೆಸುತ್ತಿರುವ ವಿದ್ಯಾರ್ಥಿನಿಯರ ಸಹಪಾಠಿಯೋರ್ವಳು ನೀಡಿರುವ ಹೇಳಿಕೆ. ಇದರಲ್ಲಿ ಪ್ರಕರಣದ ಕುರಿತು ಮತ್ತಷ್ಟು ವಿಚಾರಗಳು ಬಯಲಾಗಿದೆ. ಧರಣಿ ನಡೆಸುತ್ತಿರುವ ವಿದ್ಯಾರ್ಥಿನಿಯರು ತರಗತಿಗಳಲ್ಲಿ ಮೊದಲಿಗೆ ಹಿಜಾಬ್ ಧರಿಸುತ್ತಿರಲಿಲ್ಲ ಎಂದು ಸಹಪಾಠಿ ಹೇಳಿಕೆ ನೀಡಿದ್ದಾಳೆ. ‘ಉಡುಪಿಯ ಕಾಲೇಜಿನಲ್ಲಿ ಹಿಜಾಬ್ ಧರಿಸಲು ಅನುಮತಿ ಇಲ್ಲ. ಪ್ರಾಂಶುಪಾಲರೇ ಈ ಬಗ್ಗೆ ಸಾಕಷ್ಟು ಬಾರಿ ಹೇಳಿದ್ದರು. ಬೇರೆ ಮುಸ್ಲಿಂ ವಿದ್ಯಾರ್ಥಿನಿಯರಿಗೆ ಸಮಸ್ಯೆ ಇಲ್ಲ. ಈ 6 ವಿದ್ಯಾರ್ಥಿನಿಯರಿಗೆ ಮಾತ್ರ ಹಿಜಾಬ್ ಸಮಸ್ಯೆ. ಇವರನ್ನು ಯಾರೋ ಪ್ರಭಾವಿಸಿದ್ದಾರೆ’ ಎಂದು ಸಹಪಾಠಿ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

ಎಬಿವಿಪಿ ಪ್ರತಿಭಟನೆಯಲ್ಲಿ ಪ್ರಸ್ತುತ ಹಿಜಾಬ್ ವಿವಾದದಲ್ಲಿ ಕಾಣಿಸಿಕೊಂಡಿರುವ 6 ಜನ ವಿದ್ಯಾರ್ಥಿನಿಯರು ಕಾಣಿಸಿಕೊಂಡಿದ್ದರು. ಇದನ್ನು ನೋಡಿದ ಸಂಘಟನೆಯೊಂದು ಈ ವಿದ್ಯಾರ್ಥಿನಿಯರ ಮನಸ್ಸನ್ನು ಪರಿವರ್ತಿಸಲು ಯತ್ನಿಸಿದೆ ಎನ್ನುವ ಆರೋಪ ಕೇಳಿಬಂದಿದೆ. ಇದಕ್ಕೆ ಸಂಬಂಧಪಟ್ಟಂತೆ ಮಾತನಾಡಿರುವ ಪ್ರತಿಭಟನಾನಿರತ ವಿದ್ಯಾರ್ಥಿನಿಯರ ಸಹಪಾಠಿ, ‘‘ಎಬಿವಿಪಿ ಪ್ರತಿಭಟನೆಗೆ ಯಾರನ್ನೂ ಒತ್ತಾಯ ಮಾಡಿಲ್ಲ. ಈ ವಿದ್ಯಾರ್ಥಿನಿಯರು ಸ್ವಇಚ್ಛೆಯಿಂದಲೇ ಬಂದಿದ್ದರು’ ಎಂದು ಹೇಳಿಕೆ ನೀಡಿದ್ದಾರೆ.

‘ಈ ಗಲಾಟೆ ಆರಂಭವಾದ ನಂತರ ಸಮಸ್ಯೆ ಬಗೆಹರಿಸಲು ಕಾಲೇಜು ತುಂಬಾ ಪ್ರಯತ್ನಿಸಿದೆ. ಹಿಜಬ್ ತೆಗೆದೇ ಕುಳಿತುಕೊಳ್ಳಿ ಎಂದು ಆದೇಶಿಸಿದ್ದರು. ಆದರೂ ಹಠ ಮಾಡಿ ಅವರು ಹೊರಗೆ ಕುಳಿತುಕೊಳ್ಳುತ್ತಿದ್ದರು. ತರಗತಿಯಲ್ಲಿ ಹಿಜಾಬ್ ಧರಿಸಿರೋ ಫೋಟೋ ಸುಳ್ಳು. ಇತರ ಮುಸ್ಲಿಂ ವಿದ್ಯಾರ್ಥಿನಿಯರು ಕಾಲೇಜಿನ ಕಾನೂನು ಪಾಲಿಸುತ್ತಾರೆ. ಬರುವಾಗ ಹಿಜಾಬ್ ಧರಿಸಿ ಬರುತ್ತಾರೆ; ಹೋಗುವಾಗ ಹಿಜಾಬ್ ತೆಗೆದು ಹೋಗುತ್ತಾರೆ. ಈ ವಿದ್ಯಾರ್ಥಿನಿಯರು ಮಾತ್ರ ಹೀಗೆ ಮಾಡುತ್ತಿದ್ದಾರೆ’ ಎಂದು ಹೋರಾಟಗಾರ್ತಿಯರಲ್ಲಿ ಮೂವರ ಸಹಪಾಠಿಯಾಗಿರುವ ವಿದ್ಯಾರ್ಥಿನಿ ಮಾಹಿತಿ ನೀಡಿದ್ದಾರೆ.

ಪ್ರತಿಭಟನಾನಿರತ ವಿದ್ಯಾರ್ಥಿನಿಯರು ಮೊದಲು ಹಿಜಾಬ್ ಹಾಕುತ್ತಿರಲಿಲ್ಲ: ಸಹಪಾಠಿ

ಪ್ರತಿಭಟನೆ ನಡೆಸುತ್ತಿರುವ ಮೂರು ವಿದ್ಯಾರ್ಥಿನಿಯರಿಗೆ ಈಕೆ ಸಹಪಾಠಿಯಾಗಿದ್ದಾಳೆ. ಆಕೆ ನೀಡಿರುವ ಮಾಹಿತಿಯ ಪ್ರಕಾರ, ‘ಈ ವಿದ್ಯಾರ್ಥಿನಿಯರು ತರಗತಿಯಲ್ಲಿ ಹಿಜಾಬ್ ಹಾಕುತ್ತಿರಲಿಲ್ಲ. ರೂಲ್ಸ್ ಗೊತ್ತಿರದವರು ಕಾಲೇಜು ಆರಂಭದಲ್ಲಿ ಹಾಕಿಕೊಂಡು ಬರುತ್ತಿದ್ದರು. ರೂಲ್ಸ್ ತಿಳಿಸಿದ ನಂತರ ಎಲ್ಲರೂ ಹಿಜಾಬ್ ತೆಗೆದಿರಿಸಿದರು. ಈ ವಿದ್ಯಾರ್ಥಿನಿಯರು ಕೂಡ ಒಂದುವರೆ ವರ್ಷ ಹಿಜಾಬ್ ಧರಿಸಿರಲಿಲ್ಲ. ನಮ್ಮ ಕಾಲೇಜಿನ ಇತರ ಮುಸ್ಲಿಂ ವಿದ್ಯಾರ್ಥಿನಿಯರಿಗೆ ಯಾವುದೇ ಸಮಸ್ಯೆ ಇಲ್ಲ. ಇವರಿಗೆ ಯಾರೋ ಪ್ರೇರಣೆ ಕೊಟ್ಟು ಒತ್ತಾಯ ಮಾಡಿಸುತ್ತಿದ್ದಾರೆ’ ಎಂದು ಹೇಳಿದ್ದಾಳೆ.

ಹಿಜಾಬ್ ವಿವಾದದಿಂದ ಉಂಟಾಗುತ್ತಿರುವ ಸಮಸ್ಯೆಗಳ ಕುರಿತು ಆತಂಕ ಹಂಚಿಕೊಂಡಿರುವ ವಿದ್ಯಾರ್ಥಿನಿ, ‘‘ಸೆಕೆಂಡ್ ಪಿಯುಸಿ ಪರೀಕ್ಷೆ ವೇಳಾಪಟ್ಟಿ ಬಂದಿದೆ. ಈ ರೀತಿ ಮಾಡಿದರೆ ನಮಗೆ ಕಲಿಕೆ ಮಾಡಲು ಸಾಧ್ಯವಿಲ್ಲ. ಅವರು ಚೆನ್ನಾಗಿ ಕಲಿಯಬೇಕು, ನಾವೂ ಕಲಿಯಬೇಕು. ಗಲಾಟೆಯಾದರೆ ನಮಗೆ ಏಕಾಗ್ರತೆ ಬರುವುದಿಲ್ಲ. ಹಿಜಾಬ್ ವಿವಾದವನ್ನು ಬೇಗ ಮುಗಿಸಿ. ಆದಷ್ಟು ಬೇಗ ತರಗತಿಯನ್ನು ಆರಂಭಿಸಿ’’ ಎಂದು ಕೋರಿಕೊಂಡಿದ್ದಾರೆ.

TV9 Kannada


Leave a Reply

Your email address will not be published.