Simpi Linganna’s Birth Anniversary : ಸಬಲೆಯಾಗಿರುವ ಆಕೆಗೆ ಬಿರುದು ಹಣೆಗಿಟ್ಟು ಬಿಗಿಯುವುದು ಬೇಡ ಗುರುಗಳೇ | Simpi Linganna Birth Anniversary Letter From Renuka Nidagundi


Simpi Linganna’s Birth Anniversary : ಸಬಲೆಯಾಗಿರುವ ಆಕೆಗೆ ಬಿರುದು ಹಣೆಗಿಟ್ಟು ಬಿಗಿಯುವುದು ಬೇಡ ಗುರುಗಳೇ

ಸಿಂಪಿ ಲಿಂಗಣ್ಣ, ರೇಣುಕಾ ನಿಡಗುಂದಿ

ಸಿಂಪಿ ಲಿಂಗಣ್ಣ | Simpi Linganna : ಗರತಿಯ ಹಾಡುಗಳಲ್ಲಿ ಗರತಿಯ ಬಾಳಸಂಹಿತೆಯೆಂಬ ಹೊತ್ತಗೆಯಲ್ಲಿ ಗರತಿಯ ಧರ್ಮವನ್ನು, ಆಕೆಯ ಕರ್ತವ್ಯಗಳನ್ನು, ಕುರಿತು ಅನೇಕ ಸಾಂದರ್ಭಿಕ ಜನಪದ  ತ್ರಿಪದಿಗಳ ಮೂಲಕ ವಿವರಿಸುತ್ತಾ ಹೋಗುತ್ತೀರಿ. ಗರತಿಯಾದವಳು ಬಾಳಿನ ಜಂಜಾಟದಲ್ಲಿಯೇ ಉಳಿದು ಅದನ್ನೆದುರಿಸಿ ಸಂಸಾರನೌಕೆಯನ್ನು ಪಾರುಗಾಣಿಸುವುದೇ ತನ್ನ ಧರ್ಮವೆಂದು ಬಗೆದಿದ್ದಾಳೆ. ಇತರ ಪಾತ್ರಗಳೆಲ್ಲ ಅವಳ ಸುತ್ತಲು ತಿರುಗುತ್ತವೆ. ಹಾಲುಂಡ ತವರಿಗೆ ಏನೆಂದು ಹರಸಲೇ? ಎನ್ನುವ ಅವಳು ತಾವರೆಯ ಗಿಡಹುಟ್ಟಿ ದೇವರಿಗೆ ನೆರಳಾಗಿ, ನಾ ಹುಟ್ಟಿ ಮನೆಗೆ ಎರವಾದೆ ಎಂದೂ ನೋಯುವವಳೂ ಅವಳೇ. ಒಟ್ಟಿನಲ್ಲಿ ಹೆಣ್ಣೇ ಸಂಸಾರದ ಕಣ್ಣು ಎನ್ನುವ ಲೋಕೋಕ್ತಿಯನ್ನು ಮೀರುವ ಇವತ್ತು ಆಕೆ ಗಂಡಸಿಗೆ ಸರಿಸಮಾನಳಾಗಿ ಕುಟುಂಬದ ನೊಗವನ್ನು ಹೊರಬಲ್ಲಳು.  ಬೌದ್ಧಿಕವಾಗಿ, ಆರ್ಥಿಕವಾಗಿಯೂ  ಸಬಲೆಯಾಗಿರುವ ಹೆಣ್ಣುಮಕ್ಕಳಿಗೆ  ದೊಡ್ಡ ಪಟ್ಟವೇನೂ ಬೇಡ ಗುರುಗಳೇ. ಗರತಿಯ ಬಿರುದು ಹಣೆಗಿಟ್ಟು ಆಕೆಯನ್ನು ಧರ್ಮದ ನೇಣುಗಂಬಕ್ಕೆ ಬಿಗಿಯುವುದೂ ಬೇಡ.

ರೇಣುಕಾ ನಿಡಗುಂದಿ, ಲೇಖಕಿ, ಅನುವಾದಕಿ (Renuka Nidagundi)        

*

ನಲ್ಮೆಯ ಸಿಂಪಿ ಲಿಂಗಣ್ಣನವರಿಗೆ,
ಗೌರವಪೂರ್ವಕ ನಮನಗಳು ಹಾಗೂ ಹುಟ್ಟುಹಬ್ಬದ ಶುಭಾಶಯಗಳು.

ಜಾನಪದ ಸಂಶೋಧಕರೂ, ಪ್ರಬಂಧಕಾರರೂ, ನಾಟಕಕಾರರೂ ಆಗಿ ನೂರಾರು ಕೃತಿಗಳನ್ನು ಕನ್ನಡಿಗರಿಗೆ  ನೀಡಿದ ತಮ್ಮ ಹುಟ್ಟಿದ ದಿನವಿಂದು.  ಶಿಕ್ಷಕರಾಗಿ ಸಾವಿರಾರು ಮಕ್ಕಳಿಗೆ  ಓದಿಸಿದವರು. ಜನಪದ ಹಾಡುಗಳನ್ನು ಸಂಗ್ರಹಿಸಿ  “ಗರತಿಯ ಹಾಡು ಮತ್ತು ಜೀವನ ಸಂಗೀತದಲ್ಲಿ ಪ್ರಕಟಿಸಿ ಜನಪದೀಯ ಸಾಹಿತ್ಯವನ್ನು  ಜನಸಾಮಾನ್ಯರಿಗೆ ತಲುಪುವಂತೆ ಮಾಡಿದ್ದು ಅತ್ಯಂತ ಶ್ಲಾಘನೀಯ ಕೆಲಸ. ನಾವೂ ನಮ್ಮ ಪ್ರಾಥಮಿಕ ಶಾಲೆಯಲ್ಲಿರುವಾಗ ಕೂಸಿದ್ದ ಮನೆಗೆ ಬೀಸಣಿಕೆ ಯಾಕೆ…ಕೂಸು ಕಂದವ್ವ ಒಳಹೊರಗೆ, ಕೂಸು ಕಂದವ್ವ ಒಳಹೊರಗೆ ಸುಳಿದಾರೆ, ಬೀಸಣಿಗೆ ಗಾಳಿ ಬೀಸ್ದಾಂಗ… ಎಂದು ಪಠ್ಯಪುಸ್ತಕದಲ್ಲಿನ ಎಲ್ಲ ಜನಪದ ಹಾಡುಗಳನ್ನು ರಾಗಹಚ್ಚಿ ಹಾಡುತ್ತಿದುದು ನೆನಪಾಯಿತು.

ಅದೇ ಇವತ್ತಿನ ಕಾಲಮಾನದಲ್ಲಿ ಕುಳಿತು ನಿಮ್ಮ ಗರತಿಯ ಬಾಳಸಂಹಿತೆಯನ್ನು ಓದುವಾಗ ನೀವು ಸ್ವರ್ಗದಲ್ಲಿ ಕುಳಿತು ಇಪ್ಪತ್ತೊಂದನೇ ಶತಮಾನದ ಮಹಿಳೆಯರ ಬಗ್ಗೆ, ಅವರ ಸಮಸ್ಯೆಗಳ ಬಗ್ಗೆ ಚರ್ಚಿಸಬೇಕು, ಅಲ್ಲಿಂದಲೇ ಒಂದು ಸಂವಾದವನ್ನು ಏರ್ಪಡಿಸಬೇಕು ಅನಿಸುತ್ತದೆ. ಯಾಕೆಂದರೆ ಗರತಿಯ ಬಾಳಸಂಹಿತೆಯನ್ನು ಅಕ್ಕರೆಯಿಂದ ಬರೆದ ತಮಗೇ ಈ  ಹೆಣ್ಣುಮಕ್ಕಳ ಮನದ ದುಗುಡ ದುಮ್ಮಾನಗಳು ಅರ್ಥವಾಗಬಹುದು ಎನ್ನುವ ಆಶಯ ನನ್ನದು.

ಹೆಣ್ಣಿನ ಧರ್ಮ, ಮಗಳಾಗಿ, ಮಡದಿಯಾಗಿ, ಸೊಸೆಯಾಗಿ, ಅಕ್ಕ-ತಂಗಿಯರಾಗಿ ಸದ್ಗುಣಿಯಾದ  ಹೆಣ್ಣು ಯಾವ ರೀತಿ ಇರಬೇಕು, ಯಾವ ರೀತಿ ನಡೆನುಡಿಗಳನ್ನು ನಡವಳಿಕೆಯನ್ನು ಹೊಂದಿರಬೇಕು ಎಂಬುದನ್ನು  ಹದಿನಾರನೇ ಶತಮಾನದಲ್ಲಿ  ಸಂಚಿ ಹೊನ್ನಮ್ಮ  “ಹದಿಬದೆಯ ಧರ್ಮ” ವನ್ನು ಬರೆದಳು.  ನೀವೂ ಅದನ್ನು ಅಧ್ಯಯನ ಮಾಡೇ ಮಾಡಿರುತ್ತೀರಿ.

ಆಕೆ ಹೇಳುತ್ತಾಳೆ :-

ಪತಿಯ ಪಾದಾಬ್ಜ ಭಕ್ತಿಯೆ ತಮಗೆ
ಇಹಪರ ಗತಿಯೆಂದು ಕಡುವಿಡಿದಿರ್ಪ
ಸತಿಯರಿರ್ಪೆಡೆಯೊಳು ಕೃತಯುಗ
ವೊಂದಲ್ಲದಿತರಯುಗಕ್ಕಿಂಬಿಲ್ಲ

ಪತಿಯ ಪಾದವೆಂಬ ತಾವರೆಯಡಿಯಲಿ ಪವಿತ್ರ ಭಕ್ತಿಯಿಂದಿರುವುದೇ ಸತಿಯರಿಗೆ ಇರುವೆಡೆಯಲ್ಲಿ, ಹೋಗುವೆಡೆಯಲ್ಲಿ ಮುಕ್ತಿಯೆಂಬ ಸದ್ಗತಿ ದೊರೆವುದು. ಗಂಡನ ಬಗ್ಗೆ ಪ್ರೀತ್ಯಾದಾರವುಳ್ಳ ಸಾಧ್ವಿಯರು ಇರುವ ಕಾಲವನ್ನು ಕೃತಯುಗವೆಂದು ಕರೆಯುವರು. ಅಂತಹ ಕಡೆ ಬೇರೆ ಯುಗಧರ್ಮಗಳಿಗೆ ಜಾಗವೇ ಇರುವುದಿಲ್ಲ.

TV9 Kannada


Leave a Reply

Your email address will not be published.