T20 World Cup 2021: ಇಂಗ್ಲೆಂಡ್​-ನ್ಯೂಜಿಲೆಂಡ್ ಫಲಿತಾಂಶ ನಿರ್ಧರಿಸಿದ ಆ 2 ಕ್ಯಾಚ್ | Jonny Bairstow has a ‘Trent Boult moment’ from 2019 final, touches rope after taking a catch


T20 World Cup 2021: ಇಂಗ್ಲೆಂಡ್​-ನ್ಯೂಜಿಲೆಂಡ್ ಫಲಿತಾಂಶ ನಿರ್ಧರಿಸಿದ ಆ 2 ಕ್ಯಾಚ್

T20 World Cup 2021

ಕ್ರಿಕೆಟ್ ಅಂಗಳದಲ್ಲಿ ಕ್ಯಾಚಸ್ ವಿನ್ ದಿ ಮ್ಯಾಚ್ಸ್ ಎಂಬ ಮಾತಿದೆ. ಅದು ಅಕ್ಷರಶಃ ನಿಜ ಎಂದೆನಿಸಿದ್ದು 2019 ರ ಏಕದಿನ ವಿಶ್ವಕಪ್ ಫೈನಲ್ ಪಂದ್ಯದ ವೇಳೆ. ಏಕೆಂದರೆ ರೋಚಕ ಹಣಾಹಣಿಗೆ ಸಾಕ್ಷಿಯಾಗಿದ್ದ ಆ ಪಂದ್ಯದಲ್ಲಿ ಅಂತಹದೊಂದು ಕ್ಯಾಚ್ ಬಿಟ್ಟು ನ್ಯೂಜಿಲೆಂಡ್ ಸೋತಿದ್ದು ಈಗ ಇತಿಹಾಸ. ಹೌದು, 2019ರ ಫೈನಲ್​ ಪಂದ್ಯದಲ್ಲಿ ಇಂಗ್ಲೆಂಡ್​​ಗೆ 9 ಎಸೆತಗಳಲ್ಲಿ 22 ರನ್​ಗಳ ಅವಶ್ಯಕತೆಯಿತ್ತು. ಜಿಮ್ಮಿ ನೀಶಮ್ ಎಸೆತವನ್ನು ಬೆನ್​ ಸ್ಟೋಕ್ಸ್ ಲಾಂಗ್​ ಆನ್​ನತ್ತ ಭರ್ಜರಿಯಾಗಿ ಬಾರಿಸಿದರು. ಚೆಂಡು ನೇರವಾಗಿ ಬೌಂಡರಿ ಲೈನ್​ನಲ್ಲಿದ್ದ ಟ್ರೆಂಟ್ ಬೌಲ್ಟ್ ಕೈ ಸೇರಿಸಿತು. ಆದರೆ ನಿಯಂತ್ರಣ ತಪ್ಪಿದ ಬೌಲ್ಟ್ ಬೌಂಡರಿ ಲೈನ್​ ಅನ್ನು ತುಳಿದಿದ್ದರು. ಬೌಲ್ಟ್ ಮಾಡಿದ ಆ ಒಂದು ಸಣ್ಣ ತಪ್ಪಿನಿಂದಾಗಿ ನ್ಯೂಜಿಲೆಂಡ್​ ಗೆಲುವನ್ನು ಇಂಗ್ಲೆಂಡ್ ಕಸಿದುಕೊಂಡಿತು. ಬಳಿಕ ಟೈ ಆದ ಪಂದ್ಯವು, ಸೂಪರ್​ನತ್ತ ಸಾಗಿತು. ಅಂತಿಮವಾಗಿ ಇಂಗ್ಲೆಂಡ್ ತಂಡವು ಬೌಂಡರಿ ಲೆಕ್ಕಚಾರದೊಂದಿಗೆ ಚಾಂಪಿಯನ್ ಪಟ್ಟ ಅಲಂಕರಿಸಿತು.

ಇದೇ ಕಾರಣದಿಂದ ಬುಧವಾರ ಟಿ20 ವಿಶ್ವಕಪ್​ನಲ್ಲಿ ನಡೆದ ಮೊದಲ ಸೆಮಿಫೈನಲ್ ಪಂದ್ಯವು ಭಾರೀ ಕುತೂಹಲಕ್ಕೆ ಕಾರಣವಾಗಿತ್ತು. ಏಕೆಂದರೆ ಏಕದಿನ ವಿಶ್ವಕಪ್ ಫೈನಲ್ ಬಳಿಕ ನ್ಯೂಜಿಲೆಂಡ್ ಹಾಗೂ ಇಂಗ್ಲೆಂಡ್ ಮತ್ತೆ ನಿರ್ಣಾಯಕ ಪಂದ್ಯದಲ್ಲಿ ಮುಖಾಮುಖಿಯಾಗಿತ್ತು. 15 ಓವರ್​ವರೆಗೂ ಪಂದ್ಯವು ಇಂಗ್ಲೆಂಡ್ ಹಿಡಿತದಲ್ಲಿತ್ತು. ಕೊನೆಯ 4 ಓವರ್​ಗಳಲ್ಲಿ ನ್ಯೂಜಿಲೆಂಡ್​ಗೆ ಗೆಲ್ಲಲು 57 ರನ್​ಗಳ ಅವಶ್ಯಕತೆಯಿತ್ತು. ಈ ವೇಳೆ ಕ್ರೀಸ್​ಗೆ ಆಗಮಿಸಿದ ಜಿಮ್ಮಿ ನೀಶಮ್ ಇಡೀ ಪಂದ್ಯದ ಚಿತ್ರಣ ಬದಲಿಸಿದರು. ಕಾಕತಾಳೀಯ ಎಂಬಂತೆ ಈ ಬಾರಿ ಕೂಡ ಪಂದ್ಯದ ಫಲಿತಾಂಶವನ್ನು ನಿರ್ಧರಿಸಿದ್ದು ಲಾಂಗ್​ ಆನ್​ನಲ್ಲಿನ ಒಂದು ಕ್ಯಾಚ್ ಎಂಬುದು ವಿಶೇಷ.

ಹೌದು, 17ನೇ ಓವರ್‌ನಲ್ಲಿ, ಕ್ರಿಸ್ ಜೋರ್ಡನ್ ಎಸೆತವನ್ನು ಜಿಮ್ಮಿ ನೀಶಮ್ ಲಾಂಗ್ ಆನ್‌ನತ್ತ ಬಾರಿಸಿದ್ದರು. ಜಾನಿ ಬೈರ್‌ಸ್ಟೋ ಓಡಿ ಬಂದು ಚೆಂಡು ಹಿಡಿಯುವಲ್ಲಿ ಯಶಸ್ವಿಯಾದರು. ಆದರೆ ನಿಯಂತ್ರಣ ತಪ್ಪಿದ ಬೈರ್​ಸ್ಟೋ ಲಿಯಾಮ್ ಲಿವಿಂಗ್​ಸ್ಟೋನ್​ನತ್ತ ಚೆಂಡೆಸೆದು ರಿಲೇ ಕ್ಯಾಚ್ ಮಾಡಲು ಯತ್ನಿಸಿದರು. ಆದರೆ ಅದಾಗಲೇ ಬೈರ್​​ಸ್ಟೋ ಮೊಣಕಾಲು ಬೌಂಡರಿ ಗೆರೆಗೆ ತಾಗಿತ್ತು. ಅಂಪೈರ್ ಸಿಕ್ಸ್​ ಎಂದು ತೀರ್ಪು ನೀಡಿದರು. ಸಿಕ್ಕ ಜೀವದಾನವನ್ನು ಬಳಸಿಕೊಂಡ ನೀಶಮ್ 11 ಎಸೆತಗಳಲ್ಲಿ 27 ರನ್​ ಬಾರಿಸಿ ಇಂಗ್ಲೆಂಡ್ ಪರವಿದ್ದ ಪಂದ್ಯವನ್ನು ಸಂಪೂರ್ಣ ನ್ಯೂಜಿಲೆಂಡ್​ನತ್ತ ವಾಲಿಸಿದರು. ಅಂತಿಮವಾಗಿ ಡೆರಿಲ್ ಮಿಚೆಲ್ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿ 19 ಓವರ್​ನಲ್ಲಿ ನ್ಯೂಜಿಲೆಂಡ್​ಗೆ 5 ವಿಕೆಟ್​ಗಳ ಭರ್ಜರಿ ಜಯ ತಂದುಕೊಟ್ಟರು.

2019 ರಲ್ಲಿ ಟ್ರೆಂಟ್ ಬೌಲ್ಟ್ ಬೌಂಡರಿ ಲೈನ್​ ತುಳಿದು ಬೆನ್​ ಸ್ಟೋಕ್ಸ್​ಗೆ ಜೀವದಾನ ನೀಡಿ ಪಂದ್ಯವನ್ನು ಕೈ ಚೆಲ್ಲಿದರೆ, ಕಾಕತಾಳೀಯ ಎಂಬಂತೆ ಈ ಬಾರಿ ಜಾನಿ ಬೈರ್​ ಸ್ಟೋ ಕ್ಯಾಚ್ ಹಿಡಿದು ಬೌಂಡರಿ ಲೈನ್ ಮುಟ್ಟುವ ಮೂಲಕ ಜಿಮ್ಮಿ ನೀಶಮ್​ಗೆ ಜೀವದಾನ ನೀಡಿ ಪಂದ್ಯವನ್ನು ಕಳೆದುಕೊಂಡರು.  ಇಲ್ಲಿ ಮತ್ತೊಂದು ವಿಶೇಷ ಎಂದರೆ ಹೀಗೆ ಕ್ಯಾಚ್ ನೀಡಿ ಜೀವದಾನ ಪಡೆದಿದ್ದು ಎಡಗೈ ಬ್ಯಾಟರ್​ಗಳು ಎಂಬುದು. ಅಷ್ಟೇ ಅಲ್ಲದೆ ಇಬ್ಬರೂ ಕೂಡ ಆಲ್​ರೌಂಡರ್​ ಎಂಬುದು. ಒಟ್ಟಿನಲ್ಲಿ 2019ರ ಏಕದಿನ ವಿಶ್ವಕಪ್​ ಫೈನಲ್ ಬಳಿಕ, ಮತ್ತೊಮ್ಮೆ ನ್ಯೂಜಿಲೆಂಡ್ ಹಾಗೂ ಇಂಗ್ಲೆಂಡ್ ರೋಚಕ ಹಣಾಹಣಿಯ ಪಂದ್ಯದೊಂದಿಗೆ ಕ್ರಿಕೆಟ್​ ಪ್ರೇಮಿಗಳಿಗೆ ಮನರಂಜನೆಯ ರಸದೌತಣ ಒದಗಿಸಿದರು.

ಇದನ್ನೂ ಓದಿ: Team India: ಟೀಮ್ ಇಂಡಿಯಾದ ಈ ಜೋಡಿ ವಿಶ್ವಕಪ್ ಗೆದ್ದು ಕೊಡಲಿದೆ ಎಂದ ಮಾಜಿ ಕ್ರಿಕೆಟಿಗ

ಇದನ್ನೂ ಓದಿ: Team India: ಟೀಮ್ ಇಂಡಿಯಾದ ಮುಂದಿನ ಸರಣಿಗಳ ವೇಳಾಪಟ್ಟಿ ಹೀಗಿದೆ

ಇದನ್ನೂ ಓದಿ: India T20 squad: ಟೀಮ್ ಇಂಡಿಯಾಗೆ ಹೊಸ ನಾಯಕ: ಯುವ ಪಡೆಯನ್ನು ಪ್ರಕಟಿಸಿದ ಬಿಸಿಸಿಐ

(Jonny Bairstow has a ‘Trent Boult moment’ from 2019 final, touches rope after taking a catch)

TV9 Kannada


Leave a Reply

Your email address will not be published.