Vijay Deverakonda Birthday: ಮನೆ ಖರೀದಿಗೆ ಹಣ ಇಲ್ಲದಿದ್ದಾಗ ವಿಜಯ್​ ದೇವರಕೊಂಡ ಮಾಡಿದ್ದೇನು? | Vijay Deverakonda Birthday: This is what Vijay Deverakonda did for money


Vijay Deverakonda Birthday: ಮನೆ ಖರೀದಿಗೆ ಹಣ ಇಲ್ಲದಿದ್ದಾಗ ವಿಜಯ್​ ದೇವರಕೊಂಡ ಮಾಡಿದ್ದೇನು?

ವಿಜಯ್ ದೇವರಕೊಂಡ

Vijay Deverakonda: ವಿಜಯ್​ ದೇವರಕೊಂಡ ಅವರು ಒಂದು ಮನೆ ಕೊಂಡುಕೊಳ್ಳುವ ಕನಸು ಹೊಂದಿದ್ದರು. ಆ ಕನಸನ್ನು ನನಸು ಮಾಡುವ ಸಲುವಾಗಿ ಅವರು ಹಗಲಿರುಳು ಕಷ್ಟಪಟ್ಟಿದ್ದರು.

ಖ್ಯಾತ ನಟ ವಿಜಯ್​ ದೇವರಕೊಂಡ (Vijay Deverakonda) ಅವರು ಈಗ ಸ್ಟಾರ್​ ಹೀರೋ ಆಗಿ ಬೆಳೆದಿದ್ದಾರೆ. ‘ಅರ್ಜುನ್​ ರೆಡ್ಡಿ’, ‘ಗೀತ ಗೋವಿಂದಂ’ ಮುಂತಾದ ಸಿನಿಮಾಗಳಿಂದ ಅವರಿಗೆ ಭರ್ಜರಿ ಗೆಲುವು ಸಿಕ್ಕಿತು. ಅವರೀಗ ಬಾಲಿವುಡ್​ಗೂ ಕಾಲಿಟ್ಟಿದ್ದಾರೆ. ಅವರಿಗೆ ದೇಶವ್ಯಾಪಿ ಅಭಿಮಾನಿಗಳು ಇದ್ದಾರೆ. ಹಾಗಂತ ವಿಜಯ್​ ದೇವರಕೊಂಡ ಅವರು ನಡೆದುಬಂದ ಹಾದಿ ಸುಗಮವಾಗಿ ಇರಲಿಲ್ಲ. ಹಣಕ್ಕಾಗಿ ಅವರು ಕೂಡ ತುಂಬ ಕಷ್ಟಪಟ್ಟಿದ್ದಾರೆ. ತಮಗೆ ಇಷ್ಟ ಇಲ್ಲದಿದ್ದರೂ ಕೂಡ ಕೆಲಸಗಳನ್ನು ಅವರು ಮಾಡಬೇಕಾಗಿತ್ತು. ಇಂದು (ಮೇ 9) ವಿಜಯ್​ ದೇವರಕೊಂಡ ಅವರು ಜನ್ಮದಿನ (Vijay Deverakonda Birthday) ಆಚರಿಸಿಕೊಳ್ಳುತ್ತಿದ್ದಾರೆ. ಹುಟ್ಟುಹಬ್ಬದ ಪ್ರಯುಕ್ತ ಅವರಿಗೆ ಅಭಿಮಾನಿಗಳು, ಸ್ನೇಹಿತರು ಹಾಗೂ ಸೆಲೆಬ್ರಿಟಿಗಳು ಶುಭಾಶಯ ತಿಳಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ವಿಜಯ್​ ದೇವರಕೊಂಡ ಅವರ ಜೀವನದ ಕುರಿತ ಹಲವು ಘಟನೆಗಳನ್ನು ಮೆಲುಕು ಹಾಕಲಾಗುತ್ತಿದೆ. ವಿಜಯ್​ ದೇವರಕೊಂಡ ಅವರಿಗೆ ಈಗ 33 ವರ್ಷ (Vijay Deverakonda Age) ವಯಸ್ಸು. ಜೀವನದಲ್ಲಿ ಒಂದು ಹಂತಕ್ಕೆ ಅವರು ಸೆಟ್ಲ್​ ಆಗಿದ್ದಾರೆ. ಆದರೆ ಆರಂಭದ ದಿನಗಳಲ್ಲಿ ಅವರು ಹಣಕ್ಕಾಗಿ ತುಂಬ ಕಷ್ಟಪಟ್ಟಿದ್ದರು. ಈ ಹಿಂದೆ ನೀಡಿದ ಸಂದರ್ಶನದಲ್ಲಿ ಈ ವಿಚಾರಗಳ ಕುರಿತು ವಿಜಯ್​ ದೇವರಕೊಂಡ ಮಾತನಾಡಿದ್ದರು.

2011ರಿಂದಲೂ ವಿಜಯ್​ ದೇವರಕೊಂಡ ಅವರು ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಆರಂಭ ದಿನಗಳಲ್ಲಿ ಪೋಷಕ ಪಾತ್ರಗಳನ್ನು ಮಾಡುತ್ತಿದ್ದ ಅವರು 2016ರಲ್ಲಿ ‘ಪೆಳ್ಳಿ ಚೂಪುಲು’ ಚಿತ್ರದ ಮೂಲಕ ಹೀರೋ ಆದರು. ಕೆಲವೇ ವರ್ಷಗಳಲ್ಲಿ ಅವರು ಸ್ಟಾರ್​ ಹೀರೋ ಆಗಿ ಗುರುತಿಸಿಕೊಂಡರು. 2017ರಲ್ಲಿ ಬಂದ ‘ಅರ್ಜುನ್​ ರೆಡ್ಡಿ’ ಸಿನಿಮಾ ಬ್ಲಾಕ್​ ಬಸ್ಟರ್​ ಹಿಟ್​ ಆಯಿತು. ಆ ನಂತರ ವಿಜಯ್​ ದೇವರಕೊಂಡ ಅವರ ಬದುಕು ಬದಲಾಯಿತು. ಆರಂಭದ ದಿನಗಳಲ್ಲಿ ಅವರು ಒಂದು ಮನೆ ಕೊಂಡುಕೊಳ್ಳುವ ಕನಸು ಹೊಂದಿದ್ದರು. ಆ ಕನಸನ್ನು ನನಸು ಮಾಡುವ ಸಲುವಾಗಿ ಅವರು ಹಗಲಿರುಳು ಕಷ್ಟಪಟ್ಟಿದ್ದರು.

ಅನುಪಮಾ ಚೋಪ್ರಾ ಅವರ ಫಿಲ್ಮ್​ ಕಂಪಾನಿಯನ್​ಗೆ ನೀಡಿದ ಸಂದರ್ಶನದಲ್ಲಿ ಈ ಕುರಿತು ವಿಜಯ್​ ದೇವರಕೊಂಡ ಹೇಳಿಕೊಂಡಿದ್ದರು. ವೃತ್ತಿಜೀವನದ ಶುರುವಿನಲ್ಲಿ ಕೇವಲ ಹಣಕ್ಕೋಸ್ಕರವೇ ಅವರು ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದರಂತೆ. ‘ಜೀವನದಲ್ಲಿ ನೀವು ತೆಗೆದುಕೊಳ್ಳುವ ನಿರ್ಧಾರಗಳಲ್ಲಿ ಹಣ ಎಂಬುದು ಎಷ್ಟು ಮಹತ್ವದ ಪಾತ್ರ ವಹಿಸುತ್ತದೆ’ ಎಂದು ಕೇಳಿದ ಪ್ರಶ್ನೆಗೆ ವಿಜಯ್​ ದೇವರಕೊಂಡ ಈ ರೀತಿ ಉತ್ತರಿಸಿದ್ದರು: ‘ಈಗ ಹಣದ ವಿಚಾರ ಜೀರೋ. ಕಂಟೆಂಟ್​ ಇಷ್ಟವಾದರೆ ಮಾತ್ರ ನಾನು ಕೆಲಸ ಮಾಡುತ್ತೇನೆ. ಆದರೆ ಈ ಹಿಂದೆ ನಾನು ಕೇವಲ ಹಣಕ್ಕೋಸ್ಕರವೇ ಕೆಲಸ ಮಾಡುತ್ತಿದ್ದೆ. ಸಣ್ಣ ಪುಟ್ಟ ಪಾತ್ರಗಳನ್ನು ಸಹ ಒಪ್ಪಿಕೊಳ್ಳುತ್ತಿದ್ದೆ. ಮನೆ ಖರೀದಿಸಬೇಕು ಎಂದುಕೊಂಡಾಗ ನನಗೆ ಹಣದ ಕೊರತೆ ಆಯಿತು. ಆಗ ಒಂದು ಮ್ಯೂಸಿಕ್​ ವಿಡಿಯೋದಲ್ಲಿ ನಟಿಸಲು ಒಪ್ಪಿಕೊಂಡೆ’ ಎಂದು ವಿಜಯ್​ ದೇವರಕೊಂಡ ಹೇಳಿದ್ದರು.

‘ಹಣ ನನಗೆ ತುಂಬ ಮುಖ್ಯವಾಗಿತ್ತು. 10 ಸಾವಿರಕ್ಕಿಂತಲೂ ಹೆಚ್ಚಿನ ಸಂಭಾವನೆ ಸಿಗುವ ಯಾವುದೇ ಕೆಲಸವನ್ನಾದರೂ ನಾನು ಮಾಡುತ್ತಿದ್ದೆ. ಈಗ ನಾನು ಹಣದಿಂದ ಎಗ್ಸೈಟ್​ ಆಗುವುದಿಲ್ಲ. ನನ್ನ ಕೆಲವು ಖರ್ಚುಗಳನ್ನು ನಿಭಾಯಿಸಲು ಮಾತ್ರ ನನಗೆ ಈಗ ಹಣ ಬೇಕಾಗುತ್ತದೆ. ಅದರ ಹೊರತಾಗಿ ಎಷ್ಟೇ ಹಣ ಕೊಟ್ಟರೂ ನನಗೆ ಇಷ್ಟ ಇಲ್ಲದ ಕೆಲಸವನ್ನು ನಾನು ಮಾಡುವುದಿಲ್ಲ’ ಎಂದು ವಿಜಯ್​ ದೇವರಕೊಂಡ ಹೇಳಿದ್ದರು.

ವಿಜಯ್​ ದೇವರಕೊಂಡ ನಟಿಸುತ್ತಿರುವ ‘ಲೈಗರ್​’ ಸಿನಿಮಾ ಮೇಲೆ ಹೆಚ್ಚು ನಿರೀಕ್ಷೆ ಇದೆ. ಈ ಚಿತ್ರಕ್ಕೆ ಪುರಿ ಜಗನ್ನಾಥ್​ ನಿರ್ದೇಶನ ಮಾಡುತ್ತಿದ್ದಾರೆ. ವಿಜಯ್​ ದೇವರಕೊಂಡ ಅವರಿಗೆ ಜೋಡಿಯಾಗಿ ಅನನ್ಯಾ ಪಾಂಡೆ ನಟಿಸುತ್ತಿದ್ದಾರೆ. ಅತಿಥಿ ಪಾತ್ರದಲ್ಲಿ ಮೈಕ್​ ಟೈಸನ್​ ಕೂಡ ಅಭಿನಯಿಸುತ್ತಿರುವುದು ವಿಶೇಷ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

TV9 Kannada


Leave a Reply

Your email address will not be published. Required fields are marked *