Viral Video: ಎಡ್ವಾರ್ಡೋ ಎಡ್ವಾರ್ಡೋ ಎಲ್ಲಿದ್ದೀಯಪ್ಪಾ ಎಡ್ವಾರ್ಡೋ | This little boy lost his dad in the crowd in Argentina Viral video shows what happened next


Boy Lost His Father : ಅರ್ಜೆಂಟೈನಾದ ಬೀದಿಯ ಜನಸಂದಣಿಯಲ್ಲಿ ಈ ಹುಡುಗ ಅಪ್ಪನಿಂದ ತಪ್ಪಿಸಿಕೊಂಡಿದ್ದಾನೆ. ಮರುಗಿದ ಸುತ್ತಮುತ್ತಲಿನ ಜನರು, ಬೀದಿಬದಿಯ ಸಂಗೀತಗಾರರು ಒಟ್ಟಾಗಿ ಸೇರಿ ಏನು ಮಾಡಿರಬಹುದು? ಹೃದಯಸ್ಪರ್ಶಿ ವಿಡಿಯೋ ನೋಡಿ. 

Viral Video: ಎಡ್ವಾರ್ಡೋ ಎಡ್ವಾರ್ಡೋ ಎಲ್ಲಿದ್ದೀಯಪ್ಪಾ ಎಡ್ವಾರ್ಡೋ

ಅಪ್ಪಾ ಅಪ್ಪಾ ಎಲ್ಲಿದ್ದೀಯಾ

Dad and Son : ಅಯ್ಯೋ ನನ್ನ ಅಪ್ಪ ಎಲ್ಲಿ ಹೋದ? ಎಂದು ಚಿಕ್ಕಮಕ್ಕಳು ಸಂತೆಯಲ್ಲೋ, ಜಾತ್ರೆಯಲ್ಲೋ, ಕಿಕ್ಕಿರಿದ ಬೀದಿಗಳಲ್ಲಿ ಅಳುವಾಗ ಉಳಿದವರು ಸಾಮಾನ್ಯವಾಗಿ ಏನು ಮಾಡುತ್ತಾರೆ? ಪೊಲೀಸ್ ಗೀಲೀಸ್​ ಎಂದು ಧಡಬಡಿಸಿ ಮಕ್ಕಳನ್ನು ಮತ್ತಷ್ಟು ಆತಂಕಕ್ಕೆ ತಳ್ಳುತ್ತಾರೆ. ತಲೆಗೊಂದು ಮಾತಾಡಿ ಮತ್ತಷ್ಟು ಗಾಬರಿಗೆ ಬೀಳಿಸುತ್ತಾರೆ. ಆದರೆ ಅರ್ಜೆಂಟೈನಾದ ಬೀದಿಯಲ್ಲಿ ನಡೆದ ಈ ದೃಶ್ಯ ನೋಡಿದರೆ ಭಲೇ! ಎನ್ನಿಸದೇ ಇರದು. ಒಬ್ಬ ಹುಡುಗ ಈ ಗದ್ದಲಲ್ಲಿ ತನ್ನ ತಂದೆಯನ್ನು ಕಳೆದುಕೊಂಡಿದ್ದಾನೆ. ಅಳುತ್ತಿರುವ ಅವನನ್ನು ಗಮನಿಸಿದ ಇಲ್ಲಿರುವ ಜನಸಮೂಹ ಈ ಸಂದರ್ಭವನ್ನು ಅದೆಷ್ಟು ಸುಲಲಿತವಾಗಿ ರಚನಾತ್ಮಕವಾಗಿ ನಿಭಾಯಿಸಿದೆ ಎಂದರೆ, ಇದು ಸಿನೆಮಾ ದೃಶ್ಯವೊಂದರ ಚಿತ್ರೀಕರಣ ಇರಬೇಕು ಎನ್ನುವ ಮಟ್ಟಿಗೆ ಅನುಮಾನ ಹುಟ್ಟುಹಾಕಿದೆ. ಆದರೆ ಇದು ನಿಜವಾಗಿಯೂ ತತ್​ಕ್ಷಣವೇ ಸೃಷ್ಟಿಯಾದ ಸನ್ನಿವೇಶ. ಅಳುತ್ತಿದ್ದ  ಹುಡುಗನನ್ನು ನೋಡಿದ ಒಬ್ಬ ತನ್ನ ಹೆಗಲ ಮೇಲೆ ಹೊತ್ತುಕೊಂಡು ಅವನ ಅಪ್ಪನನ್ನು ಹುಡುಕಲು ಸಹಾಯ ಮಾಡಲು ಮುಂದಾಗಿದ್ದಾನೆ. ನಂತರ ಈ ವ್ಯಕ್ತಿ ಎಡ್ವಾರ್ಡೋ ಎಂದು ಹುಡುಗನ ಅಪ್ಪನ ಹೆಸರು ಹಿಡಿದು ಕೂಗಲು ಶುರು ಮಾಡಿದ್ದಾನೆ. ಸುತ್ತಮುತ್ತಲಿನ ಜನರೂ ತಮ್ಮ ಕೂಗನ್ನೂ ಸೇರಿಸಿದ್ದಾರೆ. ಅಷ್ಟೇ ಯಾಕೆ ಬೀದಿಬದಿಯಲ್ಲಿರುವ ಸಂಗೀತಗಾರರು ಲಯಬದ್ಧವಾಗಿ ಸತತವಾಗಿ ಎಡ್ವಾರ್ಡೋ ನಾಮಸ್ಮರಣೆ ಮಾಡಲು ಶುರು ಮಾಡಿದ್ದಾರೆ.

ಇಡೀ ಜನಸಮೂಹವೇ  ಇಂಥ ಸಿಹಿಯಾದ ಸನ್ನಿಗೊಳಗಾಗಿ ಎಡ್ವಾರ್ಡೋನನ್ನು ಜಪಿಸುವಲ್ಲಿ ಮುಳುಗಿದೆ. ಕೊನೆಗೆ ಅಪ್ಪನಿಗೆ ಈ ಕೂಗು ತಲುಪಿ ಮಗನನ್ನು ಹುಡುಕಿಕೊಂಡು ಬಂದೇಬಿಟ್ಟಿದ್ದಾನೆ! 2 ಮಿಲಿಯನ್​ ನೆಟ್ಟಿಗರು ವೀಕ್ಷಿಸಿದ ಈ ವಿಡಿಯೋ ನಿಮ್ಮನ್ನೂ ಮೃದುಗೊಳಿಸದೇ ಇದ್ದೀತೇ?

ಸುಮಾರು 2.3 ಲಕ್ಷ ಲೈಕ್ಸ್​ ಈ ವಿಡಿಯೋ ಪಡೆದ ಈ ವಿಡಿಯೋದಲ್ಲಿ ಅಪ್ಪಮಗ ಒಂದಾದ ದೃಶ್ಯವನ್ನು ನೋಡಿ ಅನೇಕ ನೆಟ್ಟಿಗರು ಹನಿಗಣ್ಣಾಗಿದ್ದನ್ನು ಹೇಳಿಕೊಂಡಿದ್ದಾರೆ. ಗುರುತಿಲ್ಲ ಪರಿಚಯವಿಲ್ಲ, ತಮ್ಮದೇ ಜಗತ್ತಿನಲ್ಲಿ ಮುಳುಗಿ ಹೋಗಿದ್ದ ಈ ಜನಸಮೂಹ ಅಪ್ಪ ಮಗನ ಪುನರ್ಮಿಲನಕ್ಕೆ ಅದೆಷ್ಟು ಸೂಕ್ಷ್ಮವಾಗಿ, ಸಂವೇದನಾಶೀಲತೆಯಿಂದ ಸ್ಪಂದಿಸಿದೆಯಲ್ಲವೆ?; ಕಲೆಗೆ ಲಯಸಾಧಿಸುವ ಶಕ್ತಿ ಇದೆ ಎನ್ನುವುದು ಹೀಗೆ ಆಗಾಗ ಸಾಬೀತಾಗುತ್ತಿರುತ್ತದೆ.

ಮತ್ತಷ್ಟು ಇಂಥ ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ

ತಾಜಾ ಸುದ್ದಿ

TV9 Kannada


Leave a Reply

Your email address will not be published.