ಕಾಲಚಕ್ರ ತಿರುಗಿದಾಗ ಎಲ್ಲವೂ ಬದಲಾಗುತ್ತದೆ. ವಿರಾಟ್ ಕೊಹ್ಲಿ ವಿಷಯದಲ್ಲೂ ಅದೇ ಆಗುತ್ತಿದೆ. ಭಾರತ ತಂಡದ ಎಲ್ಲಾ ಫಾರ್ಮಾಟ್‌ಗಳ ನಾಯಕತ್ವವನ್ನು ತೊರೆದ ಬಳಿಕ, ಇದೀಗ ಕಳೆದ 4 ಬಾರಿ ನಿರಂತರವಾಗಿ ಅವರ ಕೈಯಲ್ಲಿದ್ದ ಐಸಿಸಿ ತಂಡದ ಸಾರಥ್ಯವನ್ನು ಸಹ ಕೈತಪ್ಪಿದೆ. ಹೌದು, 2021 ರ ಐಸಿಸಿ ಏಕದಿನ ತಂಡದಲ್ಲಿ ಕೊಹ್ಲಿಗೆ ಸ್ಥಾನವಿಲ್ಲ.

ವಿರಾಟ್ ಕೊಹ್ಲಿ ಕಳೆದ 4 ವರ್ಷಗಳಿಂದ ಪ್ರತಿ ವರ್ಷ ICC ODI ವರ್ಷದ ತಂಡದ ನಾಯಕರಾಗಿ ಆಯ್ಕೆಯಾಗಿದ್ದರು. ಆದರೆ, ಈ ಬಾರಿ ತಂಡದ ನಾಯಕನಾಗಿ ಆಯ್ಕೆಯಾಗಿಲ್ಲ. ಜೊತೆಗೆ ತಂಡದಲ್ಲಿ ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಗಿಲ್ಲ.

2016 ರಿಂದ 2019 ರವರೆಗೆ ಪ್ರತಿ ವರ್ಷ, ವಿರಾಟ್ ಕೊಹ್ಲಿ ICC ODI ತಂಡದ ನಾಯಕರಾಗಿದ್ದರು. 2020 ರಲ್ಲಿ ಐಸಿಸಿ ತಂಡವನ್ನು ಆಯ್ಕೆ ಮಾಡಿರಲಿಲ್ಲ. ಆದರೆ, 2021 ರಲ್ಲಿ, ಕ್ರಿಕೆಟ್‌ನ ಉನ್ನತ ಸಂಸ್ಥೆ ತಂಡವನ್ನು ಆಯ್ಕೆ ಮಾಡಿದಾಗ, 4 ವರ್ಷಗಳ ಬಳಿಕ ನಾಯಕತ್ವದಲ್ಲಿ ಬದಲಾವಣೆಯಾಯಿತು.

2021ರ ಐಸಿಸಿ ಏಕದಿನ ತಂಡದ ನಾಯಕನಾಗಿ ಈ ಬಾರಿ ವಿರಾಟ್ ಕೊಹ್ಲಿ ಬದಲಿಗೆ ಬಾಬರ್ ಆಜಮ್ ಅವರನ್ನು ಆಯ್ಕೆ ಮಾಡಿದೆ. ಬಾಬರ್ ಅವರನ್ನು ಐಸಿಸಿ ವರ್ಷದ ಟಿ20 ತಂಡದ ಸಾರಥಿಯಾಗಿ ಆಯ್ಕೆ ಮಾಡಲಾಗಿದೆ.

ಐಸಿಸಿ ವರ್ಷದ ಏಕದಿನ ತಂಡದ ನಾಯಕರಲ್ಲಿ ಇದುವರೆಗೆ ಭಾರತೀಯರೇ ಮೇಲುಗೈ ಸಾಧಿಸಿದ್ದಾರೆ. ಕಳೆದ 13 ವರ್ಷಗಳಲ್ಲಿ, ಈ ತಂಡವನ್ನು ಐಸಿಸಿ 12 ಬಾರಿ ಆಯ್ಕೆ ಮಾಡಿದೆ. ಇದರಲ್ಲಿ 9 ಬಾರಿ ಭಾರತೀಯ ನಾಯಕರನ್ನು ಆಯ್ಕೆ ಮಾಡಲಾಗಿದೆ. ಇನ್ನು ಇದುವರೆಗೆ ಐಸಿಸಿ ವರ್ಷದ ಏಕದಿನ ತಂಡದ ನಾಯಕನಾಗಿ 5 ಬಾರಿ ದಾಖಲೆ ಬರೆದಿರುವ ದಾಖಲೆ ಭಾರತದ ಎಂಎಸ್ ಧೋನಿ ಹೆಸರಿನಲ್ಲಿದೆ. ಹಾಗೆಯೇ ವಿರಾಟ್ ಕೊಹ್ಲಿ 4 ಬಾರಿ ನಾಯಕರಾಗುವ ಮೂಲಕ ಈ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಇವರಲ್ಲದೆ, ರಿಕಿ ಪಾಂಟಿಂಗ್ (2010), ಎಬಿ ಡಿವಿಲಿಯರ್ಸ್ (2015) ಮತ್ತು ಬಾಬರ್ ಅಜಮ್ (2021) ತಲಾ ಒಂದು ಬಾರಿ ನಾಯಕರಾಗಿದ್ದಾರೆ.